PAU-PAUWANNA SIKONJO SURO-SURO 15 - Kitta' Passitallikang Bau KAREBA BAJI'

Pa'rappungang ri Yerusalem 15:1-21

¹ Lohe tau rieki battu ri Yudea lamange ri Antiokhia na lapangajarangi mange ri urang siana' julu katappakang ri injo, ”Ampa geleiko risunna' assituru' kabiasaang nulapasuroang injo Musa, geleiko akkulle ripakasalama'.”

² Mingka Paulus na Barnabas labaliang terasai na lapassala bakka'i panguppanai. Jari latappukimu, solanna Paulus na Barnabas surang lohe pole tau maraeng battu ri jamaah injo a'lampa mange ri suro-suro injo na tutoa-toa ri Yerusalem lalabisarai palakara injo.

³ Iyai rirurungi ri jamaah injo sa'genna ansulukang kota, jari a'lingkaimu a'molong ri Fenisia surang ri Samaria na lapau-paui passala pajarrainna tau gele injo Yahudi. Passala injo sanna' lapakarannuinna nyahana sikonjo urang siana' julu katappakang rie' ri injo.

⁴ Riambattuinnamo ri Yerusalem riruppaimu ri jamaah surang risikonjo suro na tutoa-toa, jari iyai lalagarai sikuanna nulageokang Allataala patteteang ri iyai.

⁵ Mingka rie' sikura tau battu ri sossorang Farisi, tutappaki todo'mo, ammentengi na appaui, ”Tau gele injo Yahudi parallui risunna' na parallui laturuki hukkunna Musa.”

⁶ Jari a'rappungimu sikuanna suro surang tutoa-toa lalabisarai palakara injo.

⁷ Sungka'i sallomo sipa'bisara, ammentengi Petrus na appaui mange ri iyai, ”Oe Urang siana' mala'biri'ku, muissekimu ma'nassana minang ri pakaramulana Allataala anjo'jo' ri nakke battu ri kaui, solanna patteteang battu ri nakke lohe bangsa tau maraeng allangngere kareba Injili na a'jarii tappa'.

⁸ Allataala, Tulaisse' injo atina rupatau inni, assare passa'bi mange ri iyai riassarena Nyaha Tangkasa mange ri iyai assimpole mae ri ditte,

⁹ na Ia gele sikali appassisala ri ditte surangang iyai, ri maennamo Ia latangkasi atinai rikanara tappa'.

¹⁰ Ampa appakonjo, ngura kau a'ra'i muso'ri Allataala na naroiko ri salangganna ana'-ana' gurung injo se're erangang bera' nugele akkulle lasompo, baji' injo puwa-puwata riolo iyareka ditte todo'?

¹¹ Sibale'na, ditte tappa'ki ma'nassana passabakang pangamaseang Karaeng Isa Almase ditte ripakasalama'ki assimpole todo' iyai.”

¹² Jari ammakkang ngase'mu umma' injo, na lapilangngeri ngase'i Paulus surang Barnabas labisara risikonjo tanra na kajariang gele samara nulageokang Allataala patteteang ri iyai ritangnga-tangngana bangsa tau maraeng.

¹³ Sungka'i maemmu a'bisara Paulus surang Barnabas, appaui Yakobus, ”Oe urang siana', pilangngeri sadaa:

¹⁴ Maemmu lalagara Simon ma'nassana ri pakaramulana Allataala lapappijanjangangi barakka'na mange risikuanna bangsa tau maraeng lalang lapilena se're umma' battu ri iyai laa'jari umma'Na.

¹⁵ Passala injo assituru' i pauna sikonjo nabbi assimpole nuta'ukiri injo:

¹⁶ Maeng injo Nakke lamuliang na laappaenteng pole sapo pammarianna Daud numaeng anra'ba injo, na pasosaranna laKupaenteng pole na lakupakajarre'i,

¹⁷ solanna sikuanna tau maraeng a'boja ri Karaeng la'bipa pole laassurangi sikuanna bangsa tau maraeng tuKukeo' injo laa'jari umma'Ku, appakonjomu pau Karaeng tuanggeokang injo risikuanna inni,

¹⁸ tumaeng riisse' injomo minang ripakaramulana.

¹⁹ Kanara injomo panguppaku ma'nassana geleki akkulle a'bua' kasukkarang mange ri iyai battu risikuanna bangsa tau maraeng injo tua'gilingi injomo mange ri Allataala,

²⁰ mingka ditte paralluki ngukiri sura' mange ri iyai, solanna parallui alliliangi kanre-kanreang numaeng lapakarammasa injo somba-sombaang, battu ripanggeokang daa na assi binantang mate rijarro' injo surang battu ri rara.

²¹ Saba' minang riolo mariolo hukkung Musa ripappiissekangi mange risikonjo kota, na sa'genna konni-konnina hukkung injo tuli riaji juapai ampa allo Passambajangang risikonjo sapo passambajangang.”

Pappihali mange ri Antiokhia 15:22-34

²² Jari sikonjo suro na tutoa-toa surang sikuana jamaah injo ngalleimu passsamaturukang lanjo'jo' battu ri iyai rie' sikura tau lohena larisuro mange ri Antiokhia laurangi Paulus surang Barnabas, iamo intu Yudas turiareng injo Barsabas surang Silas. Ruayai tau rikangalikang battu risikuanna urang siana' julu katappakang injo.

²³ Mange ri iyai risare sura' appakonni oninna: ”Sallang battu risikonjo suro surang ri tutoa-toa, battu risikonjo urang siana' mange risikuanna urang siana' julu katappakang rie' ri Antiokhia, Siria na Kilikia tubattu injo ri bangsa tau maraeng.

²⁴ Talangngeremu ma'nassana rie' bede' sikura tau ri kambe, tugele ngerang pappasang battu ri kambe, lapakasusa surang lapakagesara atimu passabakang riajarannai.

²⁵ Injomo saba'na sisukku'na atiba natapassamaturuki lamile na laassuro sikura tau mange ri kau larurungi Barnabas surang Paulus turikamaseang injo,

²⁶ iamo intu tau lapa'bisonaang injomo nyahana saba' arenNa Karaengta Isa Almase.

²⁷ Jari, tasuromu Yudas surang Silas lalapabattu passala inni mange ri kaui.

²⁸ Saba' iamo katappukanna Nyaha Tangkasa na katappukamba ngase', solanna mange ri kaui andai ripitanggongi la'bi lohe erangang battu rinuparallu inni:

²⁹ iamo intu parallui mupakadere kalemmu battu rikanre-kanreang numaeng ripassidakkaang injo mange ri somba-sombaang, battu ri rara, battu ri binantang mate rijarro' injo na rikabalerang. Ampa mujagai kalemmu mange risikonjo passala inni, nubaji'mo intu mugeokang. Sa'gennamo inni riolo, salama'.”

³⁰ Sungka'i ngerakana, Yudas surang Silas a'lampai mange ri Antiokhia. Ri injo lakeo'i sikonjo jamaah laasse're-se're, ampai lapassareang sura' injo mange ri iyai.

³¹ Sungka'i maemmo laaji sura' injo, rannu ngase'i jamaah injo saba' assinna assare panyihi-nyihi.

³² Yudas surang Silas, tunabbi injo todo', lohe panyihi-nyihi lapau mange ri sikonjo urang siana' julu katappakang na lapakaterasa nyahanai.

³³ Sungka'i sikuramo hattu sallona ruaiya ammari ri injo, sikonjo urang siana' julu katappakang injo lapa'biangimu a'lampa lalang dame lamuliang mange ri tau assuro injo ri iyai. [

³⁴ Mingka Silas latappuki laammari juapa ri injo.]

Passisala pahanganna Paulus na Barnabas 15:35-41

³⁵ Paulus surang Barnabas ammari sikurang hattu sallona ri Antiokhia. Iyai injo lohe tau maraeng uranna ngajara na appala'bang pau Karaeng.

³⁶ Rie'i sikurang hattu ribokoanganna mae appaui Paulus mange ri Barnabas, ”Baji'i muliangki mange ri urang siana' julu katappakang risikonjo kota, ri tampa' numaeng injo ripappala'bangi pau Karaeng, larijanjangi, barang nguraimu.”

³⁷ Barnabas a'ra' todo'i laurang Yahya turiareng injo Markus;

³⁸ mingka appau terasai Paulus ma'nassana gele baji' ngurang tau maeng injomo a'boko ri iyai ri Pamfilia na gele a'ra' assipanjamaang surangang iyai.

³⁹ Passala injomo appabattu passisala pahangang bakka', sa'genna assibokoimu na Barnabas laurang todo'i Markus a'dongko' lopi lamange ri Siprus.

⁴⁰ Mingka Paulus lapilei Silas, na rimaennamo risikonjo urang siana' julu katappakang ripassareang mange ripangamaseanna Karaeng

⁴¹ a'lampaimu lapila'bangi Siria surang Kilikia na lapakaterasa ngase'i nyahana sikonjo jamaah rie' ri injo.