PAU-PAUWANNA SIKONJO SURO-SURO 14 - Kitta' Passitallikang Bau KAREBA BAJI'

¹ Ri Ikonium suro rua injo antama'i ri sapo passambajanganna tau Yahudi, na lapakabaji' ta'rannai ngajara, jari lohemo tau a'jari tappa', baji' injo tau Yahudi iyareka tau Yunani.

² Mingka tau Yahudi, gele injo a'ra' tappa' ripaunai, lapakahussangi tau gele injo Yahudi na lapakanangnga ngase'i urang siana' julu katappakang injo.

³ Jari, Paulus surang Barnabas salloi ammari ri injo. Sanna' baraniinna a'bisara saba' Karaeng tulapattoje' injo kareba passala pangamaseanNa assare mange ri iyai kahasa appaa'jari tanra-tanra surang kajariang numasagala.

⁴ Mingka tau lohe ri kota injo ta'bage ruai: rie' tuminahang mange ri tau Yahudi, rie' todo' tau minahang mange ri suro-suro injo.

⁵ Jari pakaramulamu tau gele injo Yahudi na tau Yahudi assurang-surangi ponggahanai apparri-parri lalasissai surang labundukii batu.

⁶ Laisse'na passala injo, a'lampaimu suro-suro injo mange ri kota Likaonia iamo intu ri Listra surang Derbe na tampa' riampi'-ampi'na.

⁷ Ri injomu appala'bangi Injili.

⁸ Ri Listra rie' se're tau bura'ne tuli attolong jua labua', saba' kelu' bangkenna na pesu'i minang riampana rilaherang na gelepai minang akkulle a'lingka.

⁹ Ia lapilangngeri Paulus a'bisara. Paulus latangarai tau injo na lajanjangi ma'nassana ia tappa'i na akkulle ripakagassing.

¹⁰ Maeng injo appaui Paulus lalang risa'ra bakka', ”Ammenteng ka'jangko!” A'lumpa'mu tau injo ammenteng, jari pakaramulamu a'lingka mange-mange.

¹¹ Rihattu lajanjanna tau lohe nulageokang injo Paulus, appau bakkakimu lalang bisara Likaonia, ”Somba-sombaang injo naummu mae ritangnga-tangngata assintanja' rupatau.”

¹² Barnabas laarengi Zeus na Paulus laarengi Hermes, saba' iamo a'bisara.

¹³ Jari rie'mu imanna somba-sombaang Zeus, nupassambajanganna rie'i pantarang kota, ngerangi sapi pallaki na lohe rupanna taju'-taju' kaju ta'rante-rante mange ri babaang kota laassidakka koro'bang assurangi tau lohe lamange ri suro-suro injo.

¹⁴ Rilalangngere'na suro-suro injo, iamo intu Barnabas surang Paulus, lasessekimu pakeanna, maeng injo mangei a'bora tangnga ri tau lohe injo ampai appau:

¹⁵ ”Oe kau ngase', ngura appakonjo panggeokammui? Kambe inni tau samara to'juakang assimpole kaui. Kambe rie' ri inni laappala'bang Injili mange ri kau, solanna mubokoi ngase'i sikonjo panggeokang tide' inni matu-matunna na a'gilingko mange ri Allataala attallasa injo, Tumaeng injo appaa'jari langi' surang lino, tamparang na sikonjo assinna.

¹⁶ Ri jammang riolo mariolo Allataala lalappasangi rupatau inni laturuki a'ra' kale-kalena,

¹⁷ mingka Ia gele lakaluppai rilapappiissekanna kalenNa lohe rupanna panggeokang baji', iamo intu appaturungi bosi battu ri langi' na assare hattu-hattu baji' mange ri kaui. Ia lapakabaji' kasia'na nyahamu battu ri kanre surang karannuang.”

¹⁸ Manna appakonjoi pauna suro-suro injo, iyai gele akkulle appisangka ri tau lohe laassare injo passidakka koro'bang mange iyai.

¹⁹ Mingka riekimu tau Yahudi injo battu ri Antiokhia na Ikonium na iyai injo latimu-timu tau lohe injo solanna minahangi mange ri iyai. Jari iyai labundukimu batu Paulus na larenrengi ansulukang ri kota injo, saba' pangisse'nai ma'nassana ia matemu.

²⁰ Mingka rihattunna tau tappaki injo ri Isa ammenteng ngase' risiappuna Paulus, ia ambaungi ampai antama' ri kota injo. Ri mintara'na mae ia a'lampai surangi Barnabas mange ri Derbe.

Muliangi mange ri Antiokhia 14:21-28

²¹ Paulus surang Barnabas appala'bangi Injili ri kota Derbe na lohe tau a'ra' a'jari ana' gurung. Maeng injo muliangimu mange ri Listra, Ikonium na Antiokhia.

²² Ri tampa' injomo iyai lapakasa'ga' nyahana ana'-ana' gurung injo ampai lapiu'rangi ngase' solanna tuli jarre'i rikatappakang, na lapaui ma'nassana ampa laantama'ki ri Pakkaraengang Allataala paralluki languppa lohe kamarasaiang.

²³ Risikonjo jamaah, suro-suro injomo anjo'jo' tutoa-toa jamaah na sungka'i maeng ngera dowaang na appuasai, lapassareangimu tutoa-toa injo ri Karaeng tumange ri Ia jua lakatappaki.

²⁴ Paulus na Barnabas lala'bangi sibatu Pisidia na ambattui ri Pamfilia.

²⁵ Ri injo iyai appala'bang Pauna Allataala ri Perga, ampai a'lampa mange ri Atalia.

²⁶ Battu ri injo a'dongko' lopi mange ri Antiokhia; ri tampa' injomo riolo iyai ripassareang mange ripangamaseanna Allataala lalapapakaramula jamaang nulapa'maeng injomo.

²⁷ Riambattuinnamo ri injo lakeokimu jamaah injo laasse're, maeng injo lalagarangimu sikuanna nulageokang Allataala ripatteteannai, na ma'nassana Ia maeng lapambungkarangi babaang risikuanna tau maraeng mange rikatappakang.

²⁸ Ri injomu iyai sallo ammari assurang sikuanna tau tappa' injo ri Isa.