PAU-PAUWANNA SIKONJO SURO-SURO 13 - Kitta' Passitallikang Bau KAREBA BAJI'

¹ Rihattu injo lalang ri jamaah Antiokhia rie' sikura nabbi surang guru, iamo intu: Barnabas na Simeon turiareng injo Niger, na Lukius tau Kirene, na Menahem tuassipa'bakkakangi karaeng Herodes, na Saulus.

² Rie' se're allo rihattu assambajanginna mange ri Karaeng Isa surang appuasa, appaumu Nyaha Tangkasa injo, ”Sa'la'i Barnabas surang Saulus tujungKu lalajamai numaeng Kutantuang injo mange ri iyai.”

³ Jari appuasa surang ngera dowaang ngase'i na sungka'i maengimo lapatompang pala' limanna mange ri tau rua injo, lalappasangimu ruaiya a'lampa.

Saulus surang Barnabas ri pulo Siprus 13:4-12

⁴ Saba' risuroi ri Nyaha Tangkasa, Barnabas surang Saulus a'lampai mange ri Seleukia, na battu ri injo a'lopi mange ri Siprus.

⁵ Riambattuna ri Salamis appala'bangimu Pauna Allataala lalang risikonjo sapo passambajanganna tau Yahudi. Yahya turiareng injo Markus minahangi a'jari suro-suroang ri iyai.

⁶ Lala'bangi pulo injo sa'genna battu mange ri Pafos. Ri injo assiuppai se're tau Yahudi turiareng Baryesus. Ia se'rei pasehere na nabbi palusu.

⁷ Ia a'bahaangi pamarenta ri pulo injo, Sergius Paulus, se'rei tau sara'de'. Pamarenta injo lakeo'i Barnabas surang Saulus, saba' ia a'ra'i lalangngere pauna Allataala.

⁸ Mingka Elimas, pasehere injo – appakonjomu battuang arenna – laampang-ampangi na lapalekko-lekko pamarenta injo battu rikatappakanna.

⁹ Mingka Saulus, turiareng injo pole Paulus, turassi ri Nyaha Tangkasa, latangarai,

¹⁰ na appaui, ”Oe ana' Ibilisi, rassiko lohe rupanna bura na sipa' daa, kau balinna sikonjo katojekang, geleko laammono' appalekko Pa'lalangang Karaeng nulambusu injo.

¹¹ Konni-konnina, janjangi, rie'mu limanna Karaeng latempako, na laa'jari butako, larie'i sikurangallo sallona kau gele laanjanjang matanna allo.” Rihattu injo toje' jua tau injo appisa'ring laappu kalammang kapu' na akkara'-karahamamo naparallui a'boja tau lanrenreng.

¹² Rilajanjanna numaeng kajariang injo, tappa'mu pamarenta injo; ia takkajanna'i riajaranna Karaeng.

A'lampai mange ri Antiokhia ri tana Pisidia 13:13-49

¹³ Maeng injo Paulus surang urang-uranna labokoimu Pafos na a'lopii mange ri Perga ri tana Pamfilia; mingka Yahya a'bokoi ri iyai ampai muliang mange ri Yerusalem.

¹⁴ Battu ri Perga latarrusang lampana, jari ambattuimu ri Antiokhia ri tana Pisidia. Ri allo Passambajangang a'lampa ngase'i mange ri sapo passambajangang, ampai attolong-tolong ri injo.

¹⁵ Sungka'i la'busumo laaji hukkung Tora' surang kitta'na sikonjo nabbi, sikonjo pagahena sapo passambajangang injo assuromu akkuta'nang mange ri iyai, ”Urang siana', ampa ri kau intu rie' pappasang nulaappakajarrei' ri umma' inni, paui mae!”

¹⁶ Jari ammentengi Paulus. A'bisara jo'jo'i ampai appau, ”Oe kau tau Israele na kau tutappa' intu ri Allataala, pilangngerii!

¹⁷ Allataalana tau Israele inni maeng lapilei puwa-puwata na labua'i umma' injo a'jari lohe, rihattunna ammari ri Massere assimpole tubattu-battu. Lalang ri limanNa nutappajonjo injo Ia laurang ngase'i ansulu' battu ri tana Massere.

¹⁸ Patampulo taung sallona Ia sabbara risikonjo panggeokanna ri parang luara.

¹⁹ Sungka'i maeng labeta tuju bangsa maraeng ri tana Kanaan, Ia lapa'dahu-dahuangi tana injo mange ri iyai laa'jari kaharisanna.

²⁰ Larie'i patambilangang limampulo taung sallona. Rimaennamo injo Ia assare hakking mange ri iyai sa'genna larapi' jammanna Nabbi Samuel.

²¹ Maeng injo ngeraimu isse' se're karaeng na Allataala lapassareangi mange ri iyai Saul ana'na Kish battu rituina Benyamin, patampulo taung sallona marenta.

²² Sungka'i risambei Saul, Allataala laangka'i Daud a'jari karaeng ri iyai. Passala'na Daud, Allataala assare passa'bi, Kuuppamu Daud ana'na Isai, se'rei tulappakarannu ri atiKu surang tulaanggeokang sikuanna a'ra'Ku.

²³ Assituru' rinumaeng injo latallikang Allataala, battu rituinamo Allataala laappaenteng Pappakasalama' mange ri taunna Israele, iamo intu Isa Almase.

²⁴ Rihattu larie'namo Yahya maeng lapa'nga'ngarammu panrio tanra pajarra mange risikuanna tau Israele.

²⁵ Sungka'na la'birimmo a'maeng jama-jamaanna Yahya Pario, ia appaui: Pa'ngare'mui nakke inni inai? Nakke gele Almase. Sitoje'na Ia larie'i mae ribokoangangku. Manna lamu'nusu sandala battu ri bangkenNa nakke gelea siratang.

²⁶ Oe urang siana' mala'biri'ku, kau tau antama' injo lo'loranna Abraham na kau ngase' tau tappa' intu ri Allataala, kareba kasalamakang injo maemmu ripabattu mae ri ditte.

²⁷ Taunna Yerusalem na sikonjo ponggahana gele laakui Isa. Riassareimmu hukkungang mate mange ri Ia, iyaimo laappa'rupa pauna sikonjo nabbi nuriaji injo ampa allo Passambajangang.

²⁸ Manna injo appakonjo gelejuai anrumpaki se're passala nuakkulle laa'jari pa'bettesang rihukkungang mate injo, mingka iyai laerai mange ri Pilatus solanna Ia rihuno.

²⁹ Sungka'i maemmo lapa'rupa sikuanna nuta'ukiri ripassala'na Isa, lapanaungimu Isa battu risalli', ampai lapaonrangi Isa lalang ri kuburu.

³⁰ Mingka Allataala lapakaattallasai muliang battu rikamateang.

³¹ Rie'i sikurangallo sallona Ia sanging lapappijanjangang kalenna mange ri iyai tuminahang injo ri Ia battu ri Galilea mange ri Yerusalem. Iyaimo injo a'jari sa'biNa mae ri umma' inni.

³² Konni-konnina kambe appabattu kareba pappakarannu mange ri kaui ma'nassana sapatta nulasareang injo mange ri puwa-puwata,

³³ maeng ripa'rupamu ri Allataala mae ri ditte, tuina, rilapakaattallasa'na muliang Isa, assimpole rie' ta'ukiri lalang ri Zaburu makarua: Kaumo Ana'Ku! Nakkemo a'jari AmmamMu allo inni.

³⁴ Injo pole, Allataala maeng lapakaattallasai muliang Isa battu risikuanna tau mate na Ia gelemu laripassareang muliang mange rikamateang, assimpole numaeng lapau injo Allataala, Nakkemo laassare mange ri kaui talli' tangkasa nuakkulle ripatappa', numaeng Kupassareang injo mange ri Daud.

³⁵ Injomo saba'na Ia lapau todo'i lalang ri Zaburu maraeng, Ditte gele rilappasang Tau Tangkasa'Ta laanjanjang kamateang.

³⁶ Saba' Daud lageokangi a'ra'na Allataala ri jammanna, maeng injo ia mate na lapaonrangi risa'ri kuburu puwa-puwana, na ia laripassareang mintodo'i mange rikamateang.

³⁷ Mingka Isa, tulapakaattallasa injo muliang Allataala, gelei laanjanjang kamateang.

³⁸ Jari, piisseki, Urang siana', passabakang ri Iamo na ripappiissekangi mange ri kaui pangampungang kadorakaang. Rihukkung Musa geleko akkulle ripa'naba.

³⁹ Na lalang ri Iamo sikuanna tau tappa' ripa'naba.

⁴⁰ Injomo saba'na, tutuiko, solanna andai tattuju mange ri kau apa numaeng lapau lalang ri kitta'na sikonjo nabbi:

⁴¹ Pariatisai, oe kau pasalla-salla intu, takkajanna'ko na lannya'moko, saba' Nakke laanggeokang se're jama-jamaang lalang rijammammu, se're jama-jamaang nugele akkulle lamukatappaki, ampa rilagarai mange ri kau.”

⁴² Rihattunnamo Paulus surang Barnabas ansulukang battu ri sapo passambajangang, rierai lalabisara juapa passala injo ri allo passambajangang laria'raki injo.

⁴³ Sungka'i maemmo assambajangi, lohemo tau Yahudi na tau minahang injo ri ajarang Yahudi tutappa' ri Allataala, lapinahangi Paulus surang Barnabas; ruaiya suro injo laajarai na lapiu'rangi solanna tuli tallasa lalang ripangamaseanna Allataala.

⁴⁴ Ri allo passambajangang ribokoanganna mae rie' ngase'mu tau ri kota injo a'rappung laappilangngeri pauna Allataala.

⁴⁵ Mingka, rihattunna tau Yahudi injo anjanjang lohe tau, rassimu siriati na attua-tuai, iyai appiburai ripauna Paulus.

⁴⁶ Mingka lalang rikabaraniang Paulus surang Barnabas appau, ”Toje'i mange ri kauimo pauna Allataala parallu ripabattu la'bi riolo, mingka gele mutarimai na muare'i kalemmu gele siratang languppa tallasa mannannungang. Injomo saba'na a'gilimmakang mange ri bangsa tau maraeng.

⁴⁷ Saba' iamo inni nulapassuroang injo Karaeng mae ri kambe: Nakke maeng appattantu ri kau laa'jari sinara mange risikuanna tau maraeng solammu ngerang kasalamakang sa'genna appa'na lino inni.”

⁴⁸ Lalangngere'na injo rannu ngase'mu tau battu injo ri bangsa tau maraeng na lapakala'biri ngase'i pauna Allataala, na sikuanna tau ritantuang ri Allataala languppa tallasa mannannungang, a'jari tappa'i.

⁴⁹ Jari pauna Karaeng ripala'bammu risibatu tampa' injo.

A'lampai mange ri Ikonium, Listra surang Derbe 13:50–14:20

⁵⁰ Mingka tau Yahudi injo appakahussangi ri bahine rikangalikang tutappa' injomo ri Allataala na sikonjo tubakka'na ri kota injo. Iyaimo appa'rieki passissa ri Paulus surang Barnabas na ladatalai battu ri tampa' injo.

⁵¹ Mingka, Paulus surang Barnabas lapakakkasa limpurang ri bangkenna laa'jari pappiu'rangi mange ri tau rie' ri injo, maeng injo a'lampai mange ri Ikonium.

⁵² Sikuanna tau tappa' ri Isa rie' ri Antiokhia tulusu rassii karannuang na rikahasai ri Nyaha Tangkasa.