2 TIMOTIUS 4 - Kitta' Passitallikang Bau KAREBA BAJI'

Jamalaloi pakkeo' panjampangimmu 4:1-8

¹ Ri a'rakanna Allataala surang ri Isa Almase tulangadeli injo tau attallasa surang tau mate, nakke appasang lalang rikatojekang mange ri kau passabakang pariekanNa na passabakang PakkaraenganNa:

² Pala'banglaloi pauna Allataala, sanging sadiako baji' iyareka daa hattu, pappisa'biangi apa nusala, to'ro surang piu'rangilaloi lalang risikonjo kasabbarang surang pangajarang.

³ Saba' larie' hattunna, tau inni gelemu akkulle narima ajarang baji', mingka iyai laappasse're tulangajara injo assituru' a'ra'na laappakasannang ri tolinna.

⁴ Iyai injo lalapagilingi tolinna battu rikanabaang na labungkarai tolinna mange ritula-tulaang.

⁵ Mingka kau, kahasai kalemmu lalang risikuanna passala, sabbarako assinsara, geokanglaloi jama-jamaang appala'bang Injili na geokangi jamaang panjampangimmu!

⁶ Passala kalengku, raraku injo pakaramulamu ripaatti' laa'jari passidakka mange ri Allataala na hattu kamateangku gelemu sallo.

⁷ Nakke maeng kupa'maemmu pattandingang nubaji', nakke maeng ambattuma mange ribatasa'na na nakke maeng kukatuho katappakang inni.

⁸ Konni-konnina maeng sadiamu ri nakke songko' kakaraengang kanabaang nularipassareang mae ri nakke battu ri Karaeng, Hakking kaminang adele, ri allonna Karaeng; mingka gele sangga mae jua ri nakke, mingka mange todo' risikuanna tau attajang injo pariekanNa.

Pappasang kala'busang 4:9-18

⁹ Apparri-parrilaloko lassiri battu mae ri nakke,

¹⁰ saba' Demas maeng langaimu lino inni na a'bokoi ri nakke. Ia a'lampamu mange ri Tesalonika. Kreskes a'lampamu mange ri Galatia na Titus mange ri Dalmatia.

¹¹ Lukas mamo ammari ri nakke. Ruppaii Markus na urangi mae konni, saba' panjampanginna rie' matu-matunna ri nakke.

¹² Tikhikus maemmu kusuro mange ri Efesus.

¹³ Ampa maeko konni erang todo'i baju bakka' kutaro injo ri Troas ri saponna Karpus surang todo' sikonjo kitta'ku, kaminang parallu nuta'bua' injo battu ri kukkulu.

¹⁴ Aleksander, panre tambaga injo, sanna'mo lohena nudaa lageokang mae ri nakke. Karaeng lalabalasai assituru' panggeokanna.

¹⁵ Sibaji'na tutu todo'ko mange ri ia, saba' ia sanna' lagagana ajaranta.

¹⁶ Rihattu pakaramulana kusa'bii kalengku tide' manna se're tau nyokong ri nakke, a'boko ngase'i ri nakke – bisannabali passala injo gelei ripierangiang mange ri iyai –,

¹⁷ mingka Karaeng lapinahanga na assare kagassingang ri nakke, solanna nakke akkulle appala'bang Injili na lalangngere sikuanna tau gele injo Yahudi. Ri appakonjona nakke akkullea lappasa battu ri kamateang.

¹⁸ Karaeng laappalappasa ri nakke battu risikonjo sipa' daa. Ia appakasalama' ri nakke, sa'genna nakke antama' lalang ri PakkaraenganNa ri suruga. Mange ri Iamo kala'birang situli-tulinna!

Sallang Pappikatu 4:19-22

¹⁹ Sallang mange ri Priskila surang ri Akwila na mange ripassiana'na Onesiforus.

²⁰ Erastus ammari ri Korintus na Trofimus kubokoi lalang garring ri Miletus.

²¹ Apparri-parrilaloko mae konni rigelenapa hattu bosi. Sallang battu ri Ebulus surang Pudes na Linus surang Klaudia na battu risikuanna urang siana'.

²² Karaeng lapinahang nyahamu. Barakka' pangamaseanNa minahang ri kau!