2 TIMOTIUS 3 - Kitta' Passitallikang Bau KAREBA BAJI'

Geo'-geo'na rupatau inni rihattu lakiama'namo lino 3:1-9

¹ Piissekilaloi ma'nassana ri allo-allo kala'busang inni larie' hattu sukkara.

² Rupatau inni kalenna to'jua langai na a'jari atai ri doe'. Iyai labakkaki pauna na tampo, iyai laa'jari papitina, iyai lamaronta' mange ri tau toa na gelei ngisse' attarima kasi, gelei lapaduli agama inni,

³ gelei ngamaseang, gelei a'ra' a'dame, langai appakadaa tau, gelei akkulle latahang kalenna, gagarangi, gelei langai nubaji' inni,

⁴ langaii a'bali'ballang, gelei lambere pikkiranna, assimpole tusara'de', la'bi lapinahangi hawa napasu daana kalaminahangi ri Allataala.

⁵ Rilahere'na iyai injo lageokangi sambajanna, mingka sitoje'na iyai injo labokoi sambajang inni. Kadereilaloi iyai injo!

⁶ Saba' ritangnga-tangnganai injo rie' tau antama' sa'bu-sa'bu ri saponna tau maraeng na labuju'-buju'i bahine lamma nurassi injo kadorakaang na rikahasaii rilohe rupanna napasu daa,

⁷ numanna injo sanging a'ra'i riajara, mingka gelei minang akkulle ngisse' kanabaang.

⁸ Assimpole Yanes surang Yambres labaliangi Musa, appakonjo todo'i iyai a'bali rikanabaang. Iyai ba'ga akkala'na na katappanna gelei attahang ripasso'ri.

⁹ Mingka attantumu iyai gelei la'bi bajikang, saba' assimpole ripassala'na Yanes surang Yambres, kaba'gaanna lakajanjangangi mange risikuanna tau.

Katappakang a'bakka' lalang ripassissa surang lalang ripangajiang Kitta' Tangkasa 3:10-17

¹⁰ Mingka kau maeng minahang ripangajarangku, ta'ra tallasa'ku, pammentengangku, katappakangku, kasabbarangku, pangamaseangku, surang kasannangangku.

¹¹ Maeng muisse'mu ma'nassana passissa na kasinsaraang nukuuppa injo ri Antiokhia surang ri Ikonium na ri Listra. Sikuanna passissa injo kuuppai na Karaeng maeng appalappasa ri nakke battu ri iangase'na.

¹² Toje'i sikuanna tau a'ra' injo tallasa assambajang lalang ri Isa Almase languppai kasissaang,

¹³ na tau daa injo sipa'na surang pabura-bura injo laattamba daai sipa'na, iyai injo laappakalingu na laripakalingu.

¹⁴ Mingka sibaji'na kau tuli a'bitantang ri kanabaang numaeng mutarima surang mukajarreki injo, surangang sanging muu'rangii tau maeng lapangajarang injo mange ri kau.

¹⁵ U'rangilalo todo'i ma'nassana minang ri kidi-kidimu maeng muisse'mu Kitta' Tangkasa inni nuassare injo pangisse' mange ri kau na ngurangi ri kau mange rikasalamakang patteteang rikatappakang mange ri Isa Almase.

¹⁶ Iangase'na nurie' ta'ukiri ri Kitta' inni lapassareangi Allataala na a'matu-matui langajara, laappakakajanjangang nusala, laappakabaji' panggeokang na langurang tau antama' rikanabaang.

¹⁷ Ri appakonjona sikuanna rupatau anunna Allataala nuripisangkaki risikonjo panggeokang baji'.