2 TIMOTIUS 2 - Kitta' Passitallikang Bau KAREBA BAJI'

Pakkeo' laminahang marasai 2:1-13

¹ Injomo saba'na, oe ana'ku, a'jari terasako ripassabakang barakka' pangamaseang patteteang ri Isa Almase.

² Apa numaeng mulangngere battu ri nakke ri a'rakanna tau lohea, passareangi injo mange ri tau akkulle injo ripatappa', tusara'de' injo ngajara tau maraeng.

³ Minahanglaloko assinsara a'jari se're parajuri' baji' battu ri Isa Almase.

⁴ Se're inni parajuri' nuattangnga injo a'bundu' gelei lapariati kalenna ripassala katallasanna, solanna ri appakonjona ia ringaii ri kamandanna.

⁵ Se're inni patanding akkulle juai nguppa piala a'jari lomoro se're, ampa ia attandingi assituru' atorang pattandingang.

⁶ Se're inni pakoko anjama terasa parallui iamo kaminang riolo lakasia'i hassele karesona.

⁷ Pariatilaloi apa numaeng kupau injo, saba' Karaeng lalasareko pappahang langisse' risikuanna.

⁸ U'rangii passala inni: Isa Almase, tumaeng attallasa injo muliang battu ritangnga-tangngana tau mate, tumaeng rilaherang injo a'jari tuina Daud, iamo injo kupala'bang lalang ri Injili.

⁹ Passabakang ripappala'bangang Injili innimo nakke marasai, la'bipa pole rirante assimpole se're palukka', mingka pauna Allataala gelei ta'rante.

¹⁰ Injomo saba'na, sabbarai kuerang iangase'na injo mange risikuanna tau pileang Allataala, solanna nguppai todo'i kasalamakang lalang ri Isa Almase lalang rikala'birang mannannungang.

¹¹ Toje'i pau inni, ”Ampa ditte mate lalang ri Ia, ditte pole laattallasa surangang Ia;

¹² Ampa sabbaraki, manna ditte minahangki marenta surangang Ia; ampa ditte a'boko ri Ia, Ia a'boko todo'i ri ditte;

¹³ ampa geleki mallang, Ia tuli mallangi, saba' Ia gelei akkulle labokoi kalenNa.”

Pappiu'rangi lalang laa'bali tungajara sala 2:14-26

¹⁴ Pappiu'rangiangi na pappasanganglaloi iangase'na injo lalang rikatojekang mange ri iyai ri a'rakanna Allataala, solanna iyai anda assigaga, saba' passala appakonjo injo tide' sikali matu-matunna, la'bipa pole appakakalirui ri tau allangngere injo.

¹⁵ Parri-parrilaloi solanna kau siratang ri a'rakanna Allataala assimpole se're pajama gele injo parallu siri', nulambusu appala'bang ajarang nunaba inni.

¹⁶ Mingka lilianglaloi pau bura surang nugele injo tangkasa nusangga lanambai jua rikamunapekang.

¹⁷ Pau-pauna a'lolo'i assimpole puru joong. Ri iyai injo antama' todo'i Himeneus na Filetus,

¹⁸ tumaeng a'lili injomo battu riajarang naba injo rihattu lapangajarannai ma'nassana pattallasangta muliang injo kajanjangammu na ri appakonjona manrakii katappakang risibageang tau.

¹⁹ Mingka poong nulataro injo Allataala sa'ga'i na segele'na iamo intu: ”Karaeng laisse'i inai anunNa” na ”Sikuanna tau lapau injo arenna Karaeng sibaji'na a'bokoi risikonjo sipa' daa.”

²⁰ Lalang ri sapo bakka' intu assinna gele sangga nubattu jua ri bulaeng surang salaka, mingka nubattu ri kaju surang ri tana; numakase're injo ripakei ritujuang la'biri na numaraeng injo ritujuang gele la'biri.

²¹ Ampa ri'e se're tau lapakatangkasa kalenna battu risikonjo passala nudaa, ia a'jarii assi sapo ritujuang la'biri, ia ritangkasi, rirapangi siratang laripake ri opuna sapo na ripappasadiaangi risikonjo jama-jamaang baji'.

²² Injomo saba'na kadereilalo napasuna taruna intu, bojalaloi kaadelang, kamallangang, pangamaseang na dame salehangang assurang-surang iyai tua'nga'ngara injo mange ri Karaeng lalang ri ati si'nong.

²³ Lilianglaloi sikonjo kasusaang ribua'-bua' injo, nuba'ga na gelei siratang. Muisse'i ma'nassana kasusaang injo appabattui pa'beserang,

²⁴ na se're inni atanna Karaeng gelei akkulle a'besere, mingka parallui lumu nyaha mange risikuanna tau. Ia parallui sara'de' ngajara, sabbara

²⁵ na lalang rikalumuang nyaha akkullei ngurang tau gassing injo a'gaga, saba' ma'ringi Karaeng assare sa'la' hattu mange ri iyai lajarra na laurang ngase'i sa'genna ngisseki kanabaang,

²⁶ na ri appakonjona iyai a'jarii ngu'rangi muliang, saba' ta'lappasai battu rijangona Ibilisi numaeng laalle passa injo laminahang ria'ra'na.