2 TIMOTIUS 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus, suro ri Isa Almase passabakang ria'ra'na Allataala laappala'bang talli' passala tallasa lalang ri Isa Almase.

² Mange ri Timotius, ana' kukamaseang injo: Barakka' pangamaseang na dame salehangang battu ri Allataala Amma na ri Isa Almase, Karaengta, minahang ri kau.

Pau sukkuru surang pappiu'rangi lasabbara 1:3-18

³ Nakke appanai' sukkuru ri Allataala kujampangi lalang ri ati alusu si'nong assimpole nulageokang injo puwa-puwaku. Na nakke sanging ngu'rangi ri kau lalang risikonjo pangera dowaangku, baji' injo allo iyareka bangngi.

⁴ Ampa kuu'rangii atti' ere matammu, injo a'ra'moko isse' kuurang assijanjang solanna sangka' karannuangku.

⁵ Saba' kuu'rangi katojekanna tappa'mu, iamo intu makase're tallasa patteteang ri puwamu Lois surang Eunike idommu na kukatappaki todo'i tallasa lalang ri kalemmu.

⁶ Injomo saba'na kupappiu'rangiangi mange ri kau laappala'bang pangamaseanna Allataala numutarima injo battu ri Allataala rihattu kupatilompanna limangku rateanna ulummu.

⁷ Saba' Allataala assarei mae ri ditte gele nyaha mallakang, mingka nyaha laappaenteng katerasang, pangamaseang surang kabajikang.

⁸ Jari, akolalo siri' assa'bi ri passala'na Karaengta na akalalo siri' kanara ri nakke, se're tau ritarungku kanara Ia, mingka minahanglaloko assinsara passabakang Injili'Na rikaterasang Allataala.

⁹ Iamo appakasalama' ri ditte surang akkeo' ri ditte laa'jari tau anunna, gele assituru' ripanggeokangta, mingka assituru' ria'ra' surang barakka' pangamaseanNa to'jua, numaeng lapasareang injo mae ri ditte patteteang ri Isa Almase minang rigelenapa ripaa'jari lino inni

¹⁰ na konni-konnina ripappisa'biangi passabakang rie'na Pappasalama'ta Isa Almase, nupatteteang ri Injili maeng latepo'-tepo'mu kahasana kamateang inni na appabattui tallasa gele injomo akkulle lapanra'.

¹¹ Patteteang ri Injili innimo nakke maeng ripattantu a'jari pappala'bang, a'jari suro surang langajara.

¹² Injomo saba'na nakke assinsara risikuanna inni, mingka nakke gelea siri'; kanara kuisse'i mange ri inai nakke tappa' surang jarre' ma'nassana Ia kahasai akkatuho apa numaeng lapassareang injo Allataala mae ri nakke sa'genna larapi' hattunna Karaeng.

¹³ Bitantanglaloi iangase'na numaeng mulangngere injo battu ri nakke a'jari se're paminahangang riajarang baji' na geokanglaloi injo lalang rikatappakang na pangamaseang lalang ri Isa Almase.

¹⁴ Katutui pa'barang-barangang ballo inni, numaeng lapassareang injo Allataala mange ri kau, passabakang ri Nyaha Tangkasa ammari injo lalang ri ditte.

¹⁵ Muisse'i ma'nassana iangase'na turie' injo ri tana Asia Ki'di' a'bokoi ri nakke; antama' todo'i Figelus surang Hermogenes.

¹⁶ Bisannabali Karaeng lapassareangi pambarakkakinNa mange ripassiana'na Onesiforus tumaeng a'mole-mole injo allengung-lengung mae ri nakke. Ia gelei siri' lauranga assijanjang ri pattarungkuang.

¹⁷ Rihattunna ri Roma, ia tulusu a'bojai ri nakke na maeng tomma laurang assijanjang.

¹⁸ Bisannabali Karaeng lapappijanjangangi barakka' pangamaseanNa mange ri ia rihattu pariekanna Karaeng. Sanna' lohe panjampangi numaeng lageokang rihattunna ia rie' ri Efesus injo la'bi muissekangi kau na nakke.