2 TESALONIKA 3 - Kitta' Passitallikang Bau KAREBA BAJI'

Ngera dowaang na anjama 3:1-15

¹ Sitarrusu'na, Urang siana', pangera dowaangangkang, solanna paunna Karaeng pela' baji' latarimana tau surang ripakala'biri, assimpole numaeng kajariang injo ri kau,

² na solanna kambe lappasa battu risikonjo tuapparukka surang risikuanna tau daa injo sipa'na, saba' gele iangase'na tau languppa katappakang.

³ Mingka Karaeng intu mallangi. Ia laappakaterasa ri nyahamu na lakalahakiko battu riiangase'na nudaa.

⁴ Na kambe tappa'kang mange ri Karaeng ma'nassana apa numaeng tapappasangang mange ri kaui, mugeokammu na lamugeokangi juapai.

⁵ Bisannabali Karaeng tulusu lapaolo nyahamu mange ripangamaseanna Allataala surang rikasabbaranna Almase.

⁶ Mingka assarekang pappasang mange ri kaui, Urang siana', lalang arenna Karaeng Isa Almase, solanna mupakaderei kalemmu battu risikonjo urang siana' julu katappakang tugele injo lajama jamaanna na gelei assituru' pangajarang numaeng mutarima injo battu ri kambe.

⁷ Saba' muisse'i, anteekamua kau parallu minahang ripanggeokang baji'ba, kanara gelekang takkaluppa anjama ritangnga-tangngamu,

⁸ na gelekang nganre kale-kale jua kanrena tau, mingka akkaresokang na anjama terasakang allo bangngi, solanna andai a'jari pamberaki manna mange ri inai jua mange ri kaui.

⁹ Gele kanara kambe tide' dahuamba ri injo, mingka kanara a'ra'kang tapaa'jari kalemba pinahangang mange ri kaui, solanna minahangiko.

¹⁰ Saba', rihattumba pole rie' ritangnga-tangngamu, tapappiu'rangiangi inni mange ri kaui: Ampa rie' se're tau, gelei a'ra' anjama, andalaloi nganre.

¹¹ Tapaui inni saba' allangngerekang ma'nassana rie' tau ri kau gelei baji' tallasa'na na gelei a'ra' anjama, mingka gelei sahe ripassala nutide' matu-matunna.

¹² Tau appakonni inni kambe appainga' surang appiu'rangi lalang ri Karaeng Isa Almase, solanna iyai tulusu sannang lageokang jamaanna na ri appakonjona nganre rikanrena to'jua.

¹³ Na kau, Urang siana', akolalo lanre anggeokang nubaji'.

¹⁴ Ampa rie' tau gele a'ra' appilangngeri apa numaeng tapau lalang ri sura' inni, tanrailaloi na ako a'bahaang surangang ia, solanna ia a'jarii siri',

¹⁵ mingka akolalo rapangi ia assimpole bali, mingka piu'rangii assimpole urang siana' julu katappakang.

Sallang Pappikatu 3:16-18

¹⁶ Bisannabali Ia, Karaeng dame salehangang, lapassareangi situlusu'na dame salehanganNa mae ri kau lalang risikonjo passala. Karaeng minahang ri kau ngase'.

¹⁷ Sallang battu ri nakke, Paulus. Sallang inni kuukirii surangang limangku to'jua ngukiri. Innimo tanra lalang risikonjo sura': Appakonni ukirangku.

¹⁸ Barakka' pangamaseanna Isa Almase, Karaengta, minahangi ri kau ngase'!