2 TESALONIKA 2 - Kitta' Passitallikang Bau KAREBA BAJI'

Kadorakaang rigelenapa rie' Karaeng 2:1-12

¹ Passala pariekanna Karaengta Isa Almase na asse'reta surangang Ia injo taerai mange ri kaui, Urang siana',

² solanna andaiko lassiri ammangnga-mangnga surang balisa, baji' injo ripanjanjang, iyareka ripappala'bangang iyareka sura' nuripau injo battu ri kambe, assimpolekalena larapi'mu hattunna Karaeng.

³ Akolalo lapa'lingui tau manna antee jua kamua ta'ranna! Saba' rigelenapa hattu injo parallui la'bi riolo larie' tua'boko ri Allataala na parallui ripappisa'biang riolo rupatau doraka inni, tuparallu injo panra',

⁴ iamo intu bali lapakala'biri injo kalenna ri iangase'na nuripau iyareka turisomba assimpole Allataala jari ia attolongi ri Sapo Allataala na a'ra'i lapappisa'biang kalenna ma'nassana iamo Allataala.

⁵ Geleika muu'rangi ma'nassana passala injo maeng a'mole-molemu kupau mange ri kaui, rihattungku juapa assurang-surang kau?

⁶ Na konni-konnina muisse'i apa ngampang ri ia, sa'genna ia ampamu lapappisa'biang kalenna rihattu numaeng latantuang injo mange ri ia.

⁷ Saba' lalang riharasia kadorakaang injo pakaramulamu anjama, mingka konni-konnina rie' juapa nungampang. Ampa maemmu ripela' nungampang injo konni-konnina,

⁸ rihattu injomo tau doraka inni ampamu lapappisa'biang kalenna, mingka Karaeng Isa lalahunoi lalang rinapasa babaNa na lapakatide'i lalang rilapappijanjanganna kalenNa rihattu pariekanNa.

⁹ Parie'na pandorakai inni jama-jamaanna Ibilisi, na lalapinahangi lohe rupanna panggeokang numara'-maraeng, tanra-tanra surang kajariang nugele samara palusu,

¹⁰ lalang ribura-bura mange risikuanna tau parallu injo lapanra' saba' iyai gelei latarima surang gelei angngai ri kareba baji' battu ri Allataala nuakkulle injo appakasalama' ri iyai.

¹¹ Injomo saba'na Allataala lapakalingu ngase'i, nulapassabakangi iyai tappa' mange ripau bura,

¹² solanna sikuanna tau gele tappa' mange rikareba baji' battu ri Allataala na angngai sipa' daa larihukkung ngase'i.

Ripile laripakasalama' 2:13-17

¹³ Mingka kambe parallu latulusu appanai' sukkuru mange ri Allataala kanara kau, Urang siana', turikamaseang injo ri Karaeng, saba' Allataala minang ripakaramulana maeng lapileiko laripakasalama' patteteang ri Nyaha nuappakatangkasa ri kau na patteteang rikareba baji' battu injo ri Allataala numukatappaki injo.

¹⁴ Injomo saba'na, Ia maeng akkeo' ri kau patteteang ri Injili nutapala'bang injo, jari nguppaiko dahuang rikala'biranna Isa Almase, Karaengta.

¹⁵ Injomo saba'na, ammenteng ka'jangiko na a'bitantanglaloko risikonjo pangajarang numutarima injo, baji' rinutapau injo, iyareka rinutaukiri injo.

¹⁶ Na Ia, Karaengta Isa Almase, surang Allataala, Ammanta, nulalang ribarakka'Na maeng ngamaseammu ri ditte na assare pallengung-lengung tide' la'busu'na na tulusu tajalli mange ri Ia,

¹⁷ bisannabali allengung-lengungi na lapakaterasai nyahamu lalang risikonjo jama-jamaang na pappau baji'.