2 TESALONIKA 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus, Silwanus na Timotius. Mange ri jamaah tau Tesalonika lalang ri Allataala Ammanta surang lalang ri Karaeng Isa Almase.

² Barakka' pangamaseang na dame salehangang battu ri Allataala, Ammanta, surang battu ri Karaeng Isa Almase minahang ri kau.

Sukkuru surang ngera dowaang 1:3-12

³ Kambe parallu tulusu appau sukkuru mange ri Allataala kanara kau, Urang siana'. Na toje'i sipato'na appakonjoi, kanara pela' jarre'na katappakammu na passikamaseammu pela' baji'i ritangnga-tangngamui,

⁴ sa'genna lalang risikonjo jamaah Allataala kambe a'bangga-bangga ripassala'mu kanara kasabbarammu na katappakammu lalang risikonjo passissa surang ri kamarasaiang muuppa injo.

⁵ Injo se'rei butti adele'na pangadelang Allataala, nulapappijanjangang injo ma'nassana siratangiko laa'jari taunna Pakkaraengang Allataala, kau konni-konnina sissa kanara ri Pakkaraengang injo.

⁶ Saba' Allataala toje'i adele'na lalapa'balasangiko ripassissanai ri tulasissa injoko

⁷ na assare kalogaang mange ri kaui turisissa intu, na mange todo' ri kambe, rihattunna Karaeng Isa ri suruga lapappisa'biang kalenNa assuran-surang sikonjo malaeka'Na narassi kahasa, lalang ri bola' api.

⁸ Ia laa'bua'i pa'balasang mange ri iyai tugele injo a'ra' tappa' ri Allataala na gelei a'ra' tunru' ri Injili'na Isa, Karaengta.

⁹ Iyai inni languppa hukkungang kapanrakang situlusu'na, ripakaderei ri a'rakanna Karaeng na gelei languppa dahuang rikakahasaang kala'biranNa,

¹⁰ ampa Ia ambattu mae rihattu injo laripakala'biri ritangnga-tangngana tau tappa'Na na laripakabakka'i risikuanna tau tappa', saba' passa'bi nutaerang injo mange ri kaui maeng mukatappaki.

¹¹ Injomo saba'na kambe sanging pangera dowaang todo'kang tujummu, solanna Allataalata larapangiko siratang tallasa assituru' ria'ra'Na na lalang rikagassinganNa laappakasangka' risikonjo numukaa'raki laanggeokang nubaji' surang laappakasangka' sikuanna jama-jamaang katappakammu,

¹² jari arenna Isa, Karaengta, ripakala'biri lalang ri kau na kau lalang ri Ia, assituru' barakka' pangamaseanna Allataalata surang Karaeng Isa Almase.