2 PETRUS 3 - Kitta' Passitallikang Bau KAREBA BAJI'

Allonna Karaeng 3:1-16

¹ Urang siana' mala'biri'ku, inni sura' makapinruammo, nukuukiri injo mange ri kau. Lalang ri ruaiya sura' injo nakke apparri-parri appakabaji' pappahammu lalang risikonjo pappiu'rangi,

² solanna muu'rangi pau riolo numaeng lapau sikonjo nabbi tangkasa na ngu'rangi parenta Karaeng surang Pappakasalama' numaeng lapabattu injo risikonjo suro mange ri kaui.

³ Nukaminang parallu muisse' iamo intu ma'nasana rihattu kala'busang larie' lohe patua-tua lalang risikonjo pattua-tuana, iamo intu tau attallasa laturuki injo hawa napasuna.

⁴ Paunai, ”Ri antee mae talli' passala Pariekanna Allataala injo? Saba' pakaramula ri puwa-puwata mate, iangase'na tide' jua paminrana, assimpole rihattunna lino ripaa'jari.”

⁵ Iyai laattu-attuangi gele a'ra' lapiisseki ma'nassana rikanara pauna Allataala, langi' maeng a'jarimu pakaramula riolo, lino inni todo' assala'na nubattu ri ere surang kanara ri ere,

⁶ na ma'nassana kanara ere injo. Lino rihattu injo ripakapanra' na ripakalannya' kanara ri a'ba bakka'.

⁷ Mingka rikanara pau Allataala injo todo' langi' na lino konni-konnina takkatuho battu ri api na ritaroi tujunna allo pangadelang surang rihattu kamateanna sikuanna tau gele tappa' ri Allataala.

⁸ Mingka, Urang siana' mala'biri'ku ngase', rie' se're nugele akkulle mukaluppai, iamo intu ma'nassana ri a'rakanna Karaeng siallo assimpolei sisa'bu taung na sisa'bu taung assimpole juai siallo.

⁹ Karaeng gelei talaa' lapaa'rupa talli'Na, manna injo rie' tau larapangi assimpole nutalaa', mingka Ia sabbarai mange ri kaui, saba' Ia a'ra'i solanna gele rie' manna sitau languppa kapanrakang mingka sikuanna tau laa'gilingi na lajarrai.

¹⁰ Mingka allonna Karaeng larie'i assimpole palukka'. Rihattu injo langi' lalannya' ripassabakang gunturu sanna' bakka'na na sikonjo bentenna lino laa'jari ahu rikanara bola' api, na lino inni surang sikuanna nurie' ribahonnna lalannya' ngase'.

¹¹ Jari, ampa iangase'na inni lapanra' appakonjo, anteemu kamua kau parallu tallasa tangkasa na tunru'

¹² rihattu attajangimmu na appakalassiri hattu pariekanna Allataala. Rihattu injomo langi' laili' lalang ri api na sikonjo benteng-bentenna lino inni laa'jari ahu rikanara bola'na api injo.

¹³ Mingka assituru' lalang risapattaNa, ditte attajangki langi' surang lino bau ri antee mae rie' kanabaang.

¹⁴ Injomo saba'na, Urang siana' mala'biri'ku, riattajanta ri iangase'na injo, paralluko apparri-parri solanna Allataala lauppaiko gele rie' sallaammu surang gele rie' karammasammu ri a'rakanNa, lalang ripa'dameang surangang Ia.

¹⁵ Rapanglaloi kasabbaranna Karaengta assimpole sa'la' hattu ri kau languppa kasalamakang, assimpole numaeng riukiri injo mange ri kau battu ri Paulus, urang siana'ta, assituru' ripangisse' nuripassareang injo mange ri ia.

¹⁶ Passala injo lageokangi lalang risikonjo sura'na, ampa ia a'bisara risikonjo passala inni. Lalang risikonjo sura'na rie' passala nusukkara laripahang, sa'genna tau gele injo appahang na gele jarre' katappakanna, lapalilii a'jari kapanrakang mange ri iyai to'jua, assimpole nulageokangi injo todo' mange risikonjo ukirang maraeng.

Panongko' 3:17-18

¹⁷ Mingka kau, Urang siana' mala'biri'ku, maeng muisse'mu passala inni riolo. Injomo saba'na, akkaletutuko, solanna gele rie' turirenreng antama' rikalinguanna tau gele injo ngisse' hukkung, na solanna gele tappela' pa'bitantangang jarre'mu.

¹⁸ Mingka a'bakka'laloko lalang ribarakka' pangamaseang na pangisse' ri karaeng surang Pappasalama'ta, Isa Almase. Mange ri Iamo kala'birang, konni-konnina na sa'genna situlusu'na.