2 PETRUS 2 - Kitta' Passitallikang Bau KAREBA BAJI'

Nabbi surang guru palusu 2:1-22

¹ Appaanteekamua sikonjo nabbi palusu riolo ammumba ritangnga-tangngana umma' Allataala, appakonjo todo'i ri kaui larie' guru palusu. Iyai injo laappaantama' pangajarang lingu laappaakapanra', la'bipa pole iyai lalasangkali Tukahasa maeng injomo allappasi ri iyai na ri appakonjona lassirii appabattu kapanrakang mange ri iyai.

² Lohe tau laminahang rita'ra tallasa'nai nurikahasai rinapasu, na rikanaranamo Pa'lalangang Kanabaang ri tua-tuai.

³ Na kanara ngoana guru palusu injo apparri-parrii laa'boja passahalang battu ri kau lalang laga'-lagarang burana. Mingka ripanggeokang appakonjona injo hukkungang maeng sadiamu na kapanrakanna gelemu latappasoho'.

⁴ Saba' Allataala gelei lapassayang sikonjo malaeka' anggeokang injo kadorakaang mingka lalapamballung ngase'i antama' ri naraka riinjomu iyai rirante ri tampa' kalammang laritaro sa'genna larapi' hattu pangadelang.

⁵ Allataala gele todo'i lapassayang lino inni riolo mariolo; Ia sangga Nuhung jua lapakasalama', tuappala'bang injo kanabaang, na tuju tau maraenganna, rihattunna Ia appabattu a'ba bakka' ribahonna lino tampa' pammarianna tau gele injo tappa' ri Allataala.

⁶ Allataala assare hukkungang mange ri kota Sodom surang Gomora, na lapakala'busui lalang ri bosi api halerang surang lapaa'jarii pappiu'rangi ri iyai tuattallasa gele injo tappa' ri Allataala rihattu ribokoanganna mae.

⁷ Mingka Ia lapakasalama'i Lot, tau naba injo, tutarru'-tarrusu injo assinsara rikanara ta'ra tallasa'na tau gele injo ngisse' hukkung na sangga hawa napasuna jua lapinahangi.

⁸ Saba' tau naba inni ammari ritangnga-tangnganai na allo-alloi lajanjang surang lalangngere panggeokang daana tau lohe injo, sa'genna sissai batenna.

⁹ Jari, kajanjangammu ma'nassana Karaeng akkullei appakasalama' risikuanna tau pasambajang battu ripasso'ri surang lataroi tau daa injo larisissa rihattunna pangadelang,

¹⁰ kaminang ri iyai tulaturuki injo napasuna nuappakarammasa injo ri kalenna na latua-tuai pamarentaanna Allataala. Iyai injo sanna' baranina surang tampona, sa'genna gele rie' malla'na attua-tua risikonjo mahallo' la'biri,

¹¹ nusitoje'na malaeka' injo, numanna la'bi gassingang na la'bi kahasaang battu ri guru palusu injo, gelei make pau pattua-tua, ampa malaeka' injo attuntu' hukkung mange risikonjo mahallo' la'biri ri a'rakanna Allataala.

¹² Mingka guru palusu injo assimpolei binantang tide' akkala'na, assimpolei binantang nurilaherang larijakkala ampai rihuno. Iyai injo attua-tua mange rinugele injo laisse', jari kanara panggeokang daanai injo, iyai laripakamate assimpolei binantang lambara.

¹³ Iyai injo languppa passareang daa assimpole sahala risipa' daanai. Iyai langaii paa'labo-labo inni rihattu allona, injo larapangi se're nubaji'. Iyai injo sanging loro surang rammasa, tuhuja injo lalang ri hawa napasunai ampa iyai injo attolongi nganre nginung surangang kaui.

¹⁴ Matanna rassi napasu passangkilang na iyai injo gele rie' lanrena anggeokang nudoraka. Iyai injo ngelo-ngeloi ri tau lamma injo. Atina narammu rikangowaang. Iyai injo sanging tau busung!

¹⁵ Saba' iyai injo maeng a'boko ripa'lalangang nunaba injo, jari linguimu, maeng injo minahangi ripa'lalanganna Bileam, ana'na Beor, tulangai injo narima sahala risikonjo panggeokang daa.

¹⁶ Mingka Bileam nguppai pappiu'rangi terasa ripanggeokang daana, saba' kaladai tekekang pepe injo a'bisara lalang risa'ra rupatau na latahangi kababbalanna nabbi injo.

¹⁷ Guru palusu injo iamo intu assimpolei mata ere a'mara, assimpolei rammang lairi' anging ka'bu. Mange ri iyai maeng sadiamu tampa' lalang rikalammang kaminang akkapu' injo.

¹⁸ Saba' iyai injo a'bisara pau tampoi na tide' matu-matunna surang lapake hawa napasu balere'na langelo-ngeloi ri tau bau injo juapa lalappasang kalenna battu ri tau tallasa injo lalang rikalinguang.

¹⁹ Iyai attalli'i laassare kalalosaang mange ri tau maraeng, nusitoje'na iyai to'jua iamo intu ata rikamateang, saba' inai ribeta ri tau maraeng, injo ia a'jari atai battu ri tau injo.

²⁰ Saba' ampa iyai, rikanara pangisse'na ri Karaeng surang Pappasalama'ta, Isa Almase, maeng lalappasang kalenna battu risikonjo karammasanna lino inni, mingka minahangi pole lalang ri injo, kala'busanna la'bi daa tallasa'na battu rinumaeng allalo injomo.

²¹ Injomo saba'na, mange ri iyai tumaeng laisse' injomo Pa'lalangang Kanabaang inni, mingka maeng injo a'bokoi poleang battu riparenta tangkasa injo, la'bi bajikangi ampa gelei minang laisse' nuripabattu injo mange ri iyai.

²² Mange ri iyai siratangi ripauna pakkalebarang inni: ”Asu inni muliangi pole mange ripirua'na, na bahi ririo inni, muliangi pole ri pattombanganna.”