2 PETRUS 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Simon Petrus, ata surang suro ri Isa Almase. Mange ri iyai tuassurang-surang injo kambe nguppa katappakang kanara kaadelanna Allataala surang Pappakasalama'ta, Isa Almase.

² Barakka' pangamaseang na dame salehangang kala'bi-la'biang ri kau passabakang pangisse' ri Allataala surang ri Isa, Karaengta.

Pakkeo' surang pileanna Allataala 1:3-15

³ Kahasa kakaraenganNa maeng lapassareammu mae ri ditte risikonjo nurie' matu-matunna laattallasa baji' passabakang pangisse'ta ri Ia tumaeng akkeo' injo ri ditte passabakang kahasaNa nula'biri surang nugele injo samara.

⁴ Battu ripa'lalangang injo Ia maeng lapassareammu mae ri ditte sikonjo talli' nulangkasa anggaranna na sanna' bakka'na, solanna patteteang ri injo kau akkulle ngalle dahuang lalang ripassareang nubattu ri Allataala, na lappasa battu ri napasu lino nuappakapanra' ri lino inni.

⁵ Iamo injo saba'na, paralluko lalang rikatojekang apparri-parri lanambai kabajikang mange rikatappakammu, na nambai kabajikang mange ripangisse'.

⁶ Na nambai ripanahangang kale mange ripangisse', nambai kasabbarang mange ripanahangang kale, na nambai katunrukang mange rikasabbarang.

⁷ Na nambai pangamaseang mange risikonjo urang siana' julu katappakang, mange rikatunrukang na nambai pangamaseang mange risikuanna tau na mange ripangamaseang urang siana' julu katappakang.

⁸ Saba' ampa iangase'na injo rie' kala'bi-la'biang ri kau, injo kau laripakadetto' na laripakabaji' pappahammu mange ri Isa Almase, Karaengta.

⁹ Mingka inai jua gele laampunnai iangase'na injo a'jarii buta surang daa geo'na, saba' ia lakaluppaii ma'nassana sikonjo kadorakaanna riolo maemmu rilappasi.

¹⁰ Injomo saba'na, Urang siana' mala'biri'ku, apparri-parri toje'ko, solanna pakkeo' surang pamilena Allataala mange ri kau. Saba' ampa mugeokangi, geleko laminang tatto'ro.

¹¹ Ri appakonjona, mange ri kau laripassareangi kaharisang laantama' ri Pakkaraengang mannannungang, iamo intu Pakkaraenganna Karaeng na Pappakasalama'ta, Isa Almase.

¹² Injomo saba'na, nakke tulusu a'ra' appiu'rangi mange ri kau ripassala iangase'na inni, manna injo maeng muisse'mu na jarre' riajarang kanabaang numaeng mutarima injo.

¹³ Kurapangi a'jari tanggongjawa'ku latuli appiu'rangi ri kau ri iangase'na injo rihattu gelenapa kubokoi barumbarung batangkalengku inni.

¹⁴ Saba' kuisse'i ma'nassana nakke gelemu sallo nakubokoi barumbarung batangkalengku inni, appaanteekamua numaeng ripappiissekang injo mae ri nakke battu ri Isa Almase, karaengta.

¹⁵ Mingka nakke tulusu laapparri-parri, solanna todo' ria'lampakumo kau sanging muu'rangi todo'i iangase'na injo.

Panjanjang ri allo riboko passala kala'biranna Almase maemmu ripaa'rupa 1:16-21

¹⁶ Saba' kambe gelekang minahang ritula-tulaanna rupatau inni nutide' injo matu-matunna, rihattu tappappiissekanna mange ri kau kahasa na pariekanna Karaengta, Isa Almase assimpole Karaeng, sibale'na kambemo sa'bi battu rikabakkakanNa.

¹⁷ Saba' Ia nguppai kabakkakang surang kala'birang battu ri Allataala Amma, rihattu rie'na sa'ra battu ri Tukaminang la'biri mange ri Ia, nulakua injo: ”Iamo inni Ana' Kukamaseang, mange ri Ia jua Nakke angngai.”

¹⁸ Kambemo allangngere sa'ra battu injo ri suruga, rihattunna kambe assurang-surang Ia rate ribaho bonto tangkasa.

¹⁹ Ri appakonjona, kambe pela' ripakajarre' rikanara pauna Allataala numaeng lapabattu risikonjo nabbi. Sanna'i baji'na ampa kau appariati assimpole appariati ribola' kanjoli injo ri tampa' kalammang sa'genna danniari na bintoeng bakka' ambassi' injo ri timoro sinara'na lasinari atimu.

²⁰ Nukaminang poong parallu muisse' iamo intu ma'nassana sikonjo panjanjang ripassala allo riboko nurie' injo lalang ri Kitta' Tangkasa gelei akkulle ritassere assituru' ria'ra' kale-kaleta,

²¹ saba' gelei minang panjanjang ripassala ri allo riboko ambattu ria'ra'na rupatau inni, mingka Nyaha Tangkasa lakahasai sikuanna tau a'bisara laappabattu pauna Allataala.