2 KORINTUS 9 - Kitta' Passitallikang Bau KAREBA BAJI'

Appasse're doe' tujunna Yerusalem 9:1-5

¹ Passala panjampangi mange ri sikuanna tau tappa' gele juamu parallu nakke langukiri mange ri kaui.

² Nakke maeng kuisse'mu karellaanna atimu nukupa'bangga-banggaang injo mange risikuanna tau Makedonia. Pauku, ”Akhaya sadiamu minang ri taung riolo.” Na jama-jamaammui appa'rie' sumanga' mange ri lohe tau.

³ Kusuro sikonjo urang siana' injo, bisannabali kabanggaamba ri kau andai a'jari tide' matu-matunna, mingka solanna kau sadia toje' assimpole numaeng injo kupau,

⁴ solanna, ampa sikuanna tau ri Makedonia rie' mae minahang ri nakke andai lajanjang geleipako sadia, sa'genna kambe – lagele appau ri kau – laappisa'ring siri' rikatappakang ri kambe injo.

⁵ Injomo saba'na, nakke parallu laassare pappakabakka' sumanga' risikonjo urang siana' laa'lampa rioloangku, solanna iyai la'bi riolo laparutusu passare numaeng musapattaang injo riolo, bisannabali sallo' tassadiai assimpole tanra kabajikanna atimu na gele assimpole passare nuripassa.

Assare lalang rikarannuang injo ngerangi barakka' 9:6-15

⁶ Pariatilaloi inni: Tau a'lamung injo so'di', siso'di' to'jua laduru, na tau lohe injo lalamung, lalohe todo' intu laladuru.

⁷ Parallui para assare assituru' rikarannuang atina, andai lalang rikasimpungang ati iyareka kanara passa, saba' Allataala ngamaseangi ri tau assare injo lalang rikarannuang.

⁸ Rie' pole, Allataala akkulle appakakala'bi-la'biang risikuanna barakka' mange ri kaui, solanna kau tulusu kagannakang lalang ri iangase'na na kala'bi-la'biang lalang rilohe rupanna panggeokang baji'.

⁹ Assimpole rie' ta'ukiri: ”Ia a'dahu-dahu, Ia assare mange ri tau kaasi-asi, kanabaanNa larie'i situlusu'na.”

¹⁰ Ia tuappakasadia injo lamungang ri palamung, na roti larikanre, Ia pole laappakasadia lamungang ri kau na lapakaa'lappi-lappi surang laapakaattimboi panggeokang kanabaammu;

¹¹ kau laripakakalumannyang jari assareiko lalang ri kabajikang pa'mai', kanara kambe, injomo saba'na lohemo tau appanai' sukkuru mange ri Allataala.

¹² Saba' panjampangi pangamaseang numugeokang inni gele sangga anggannakinna jua rikaparalluanna sikuanna tau tappa', mingka appakaa'lappi-lappi todo'i sukkuru mange ri Allataala.

¹³ Passabakang kau maeng attahang ripasso'ri lalang ripanjampangi injo, iyai appakala'biri Allataala kanara kajarrekammu lalang ripangakuang Injili Almase surang kanara kabajikanna atimu lalang a'dahu-dahu sikuanna ri iyai surang mange risikuanna tau,

¹⁴ na lalang ripangera dowaannai, iyai a'bojai todo'i ri kau kanara barakka' ri Allataala nukala'bi-la'biang injo ri kau.

¹⁵ Sukkuru mange ri Allataala kanara pangamaseanNa nugele injo akkulle ripau-pau.