2 KORINTUS 8 - Kitta' Passitallikang Bau KAREBA BAJI'

Panjampangi pangamaseang 8:1-15

¹ Urang siana', kambe a'ra'i tapappiissekang mange ri kaui passala barakka' nuripassareang injo mange risikonjo jamaah ri Makedonia.

² Rihattunna nguppa passo'ri bera' lalang rilohe rupanna kasissaang, sukku' rannuna na manna injo iyai sanna' kaasi-asina, mingka iyai kalumannyangi lalang ri kabajikang.

³ Nakke assa'bi ma'nassana iyai maeng assarei assituru' nurie' injo ri iyai, la'bipa pole battu rinurie' injo ri iyai.

⁴ Lalang karellaannai to'jua laerai na lapassakang, solanna nguppai todo'i barakka' langalle dahuang lalang ripanjampangi mange risikuanna tau tappa'.

⁵ Iyai assarei la'bi loheang battu rinutapattajalliang injo. Lapassareangi kalenna, makase're mange ri Allataala, maeng injo rikanara a'ra'na Allataala mange todo' ri kambe.

⁶ Injomo saba'na, kambe tapassai Titus, solanna ia a'lingka-lingkai mange ri kaui na lapa'maengi panjampangi pangamaseang injo numaeng lapakaramula injomo.

⁷ Injomo saba'na, konni-konnina, assimpoleiko tau kalumannyang lalang risikuanna – lalang rikatappakang, lalang ripappau, lalang ripangisse', attoje'-toje' assare sokongang, surang lalang ripangamaseammu mae ri kambe – appakonjo todo'i sibaji'na kau kalumannyang lalang ripanjampangi pangamaseang inni.

⁸ Kupaui passala inni gele assimpole passuro, mingka, pappiisse' ri karesona lohe tau maraeng laassare sokongang, a'ra'i lakuso'ri kalambusang pangamaseammu.

⁹ Kanara maeng muissekinnamo barakka' Karaengta Isa Almase ma'nassana manna injo Ia kalumannyangi, rikanaramui Ia a'jari kaasi-asi, solanna kau a'jari kalumannyang rikanara kaasi-asiNa.

¹⁰ Iamo inni panguppaku ripassala injo, numa'ring rie' matu-matunna mange ri kaui. Toje'i minang ri taung riolo pakaramulamu mugeokangi na ngalleiko katappukang lamupa'maengi todo'i.

¹¹ Pa'maeng todo'i panggeokang injo konni-konnina! Parallui panggeokanna assituru' surangang karellaammu, na geokangilaloi injo surangang nurie' injo ri kau.

¹² Saba' ampa rellako laassare, laritarima intu passaremu, ampa passaremu assituru' nurie' injo ri kau, na gele assituru' apa nutide' injo ri kau.

¹³ Saba' ripierangiko gele solanna sikuanna tau maraeng nguppa karingangang, mingka solanna rie' passillehaang.

¹⁴ Parallui konni-konnina kala'biammu anggannaki rikakuranganna, bisannabali kala'biannai injo lagannaki kakurangammu, solanna rie' passillehaang.

¹⁵ Assimpole rie' ta'ukiri: ”Tau apparappung injo lohe, gelei kala'biang na tau so'di' injo laparappung, gelei kakurangang.”

Titus risuro 8:16-24

¹⁶ Sukkuru mange ri Allataala nurikanara kau assare attoje'-toje' appakonjo todo' lalang ri atina Titus lanyokong mange ri kaui.

¹⁷ Toje'i ia lapinahang passuroamba, mingka kanara sumanga' bakka' injomo ia lalang karellaang a'lampa mange ri kaui.

¹⁸ Assurang-surangkang assuro ri urang siana'ta, turipakala'biri risikonjo jamaah kanara jama-jamaanna lalang ripappala'bangang Injili.

¹⁹ Gele sangga injo jua! Ia maeng todo'i rijo'jo' risikonjo jamaah langurang ri kambe lalang ripanjampangi pangamaseang inni, rinutageokang injo laappakala'biri Karaeng na assimpole tanra rikarellaamba.

²⁰ Saba' kambe a'ra'i taliliang passala inni: Ma'nassana rie' tau akkulle assalla ri kambe lalang ripassala panjampangi nutageokang inni na hassele'na assimpole inni.

²¹ Kanara kambe nubaji' tapikkiri, gele sangga ri a'rakanna Karaeng Isa, mingka ri a'rakanna todo' rupatau inni.

²² Assurang-surang iyai assurokang pole se're tau maraeng, iamo intu urang siana' julu katappakanta, tupinsikurammo sallona taparessa na a'buttii sanging apparri-parri laassare sokongang. Konni-konnina ia pela' apparri-parri kanara bakka'na katappakanna mange ri kaui.

²³ Titus iamo intu urangku assurang-surang anjama mange ri kaui; urang siana' julu katappakamba maraeng injo iamo risuro risikonjo jamaah na se'rei kala'birang ri Almase.

²⁴ Injomo saba'na pappijanjangangi mange ri iyai ri a'rakanna sikonjo jamaah tanra pangamaseammu surang tanra kabanggaangku ri kau.