2 KORINTUS 7 - Kitta' Passitallikang Bau KAREBA BAJI'

¹ Urang siana' mala'biri'ku, saba' ditte konni-konnina riampunnai sapatta injo, mae ngase'ki ritangkasi kalenta battu risikuanna nuapparammasa batangkale surang bateng, na ri appakonjona ripakasangka'i katangkasanta lalang tunru' ri Allataala.

Karannuang rimaenna kapa'risang 7:2-16

² Sarei tampa' mae ri kambe lalang ri atimu! Kambe gelekang a'bua' nudaa manna mange rise're tau, gele rie' manna se're tau tapa'rugi, na kambe gelekang a'boja passahalang manna battu rise're tau.

³ Nakke appau appakonni, gele laassare hukkungang mange ri kau, saba' maeng kupaui sumpae' ma'nassana kaui nguppa tampa' lalang ri atiba, sa'genna ditte assikamateang.

⁴ Sanna' lambusu'ku mange ri kaui; mingka sanna' todo' kupakala'biri'mu. Lalang risikonjo kasissaamba nakke sanna' risihi-sihi surang karannuangku alla'bi-la'bi.

⁵ Injo pole rihattumba ri Makedonia, kambe gelekang nguppa kasannangang tujunna batangkalemba. Ri antee-teekang mae sanging panguppa kamarasaiang: Pa'beserang battu pantarang na kamallakang battu lalangang.

⁶ Mingka Allataala, tuassihi-sihi injo tau tuna ati, maeng assihi-sihimu mae ri kambe riparie'namo Titus.

⁷ Gele sangga ripariekanna jua, mingka ri panyihi-nyihi lauppa injo pole ritangnga-tangngamu. Saba' ia maeng lapappiissekangi mae ri kambe passala pa'bojaimmu, pa'nganroimmu, sumanga'mu ngurangang ri nakke, sa'genna pela' attamba lohemo karannuangku.

⁸ Jari, manna injo nakke maeng appakapa'risi atimu surangang sura'ku injo, mingka nakke gelei kupassesse'lalangang. Riolo maengi kupassesse'lalangang, saba' kuisse'i ma'nassana sura' injo lapakapa'risi atimu – manna injo gelejuai sikura sallona –,

⁹ mingka konni-konnina rannua, gele kanara pa'risimmu, mingka kanara kapa'risammu laapaa'jariiko jarra. Saba' kapa'risammu injo iamo intu nuassituru' a'ra'na Allataala, sa'genna manna siso'di' tide' karugiammui kanara kambe.

¹⁰ Saba' kapa'risang assituru' a'ra' Allataala appabattui kajarraang nungerang kasalamakang na gele risesse'lalangi, mingka kapa'risang nubattu ri lino inni appabattui kamateang.

¹¹ Saba' pariatisai anteekamua kapa'risang assituru' injo a'ra'na Allataala ngerangi mange ri kaui katojekang bakka', la'bipa pole pangallei rikale, kalikingang, kamallakang, pa'bojai sarro, sumanga', panghukkungang! Lalang ri iangase'na injo maeng musa'bikangimu ma'nassana tide' salamu lalang ripassala injo.

¹² Injomo saba'na, ampa nakke maeng ngukiri sura' mange ri kaui, injo gele kanara tau anggeokang nusala, iyareka kanara tau sissa ripanggeokang sala, mingka solanna karellaammu mae ri kambe a'jari kajanjangangi mange ri kaui ri a'rakanna Allataala.

¹³ Injomo saba'na, a'jari ta'lengung-lengungkang. Rimaraenganna panyihi-nyihi nutauppa injo, la'bipa pole karannuamba kanara rannuna Titus, saba' kau ngase' mupakassannangi nyahana.

¹⁴ Kupa'bangga-banggaangiko mange ri ia, na kau gelei mupakaammassa nyahaku. Kambe tulusu tapaui apa nunaba mange ri kaui, appakonjo todo'i kabanggaamba ri a'rakanna Titus toje'i nabana.

¹⁵ Na attamba bakka'i pangamaseamba mange ri kaui, ampa lau'rangi kajarrekammu ngase', anteekamua ta'rammu anruppai pariekanna surangang malla' na bentere.

¹⁶ Nakke rannua, saba' nakke akkulle appitappa' ri kau lalang risikonjo passala.