2 KORINTUS 6 - Kitta' Passitallikang Bau KAREBA BAJI'

Paulus lalang ripanjampanginna 6:1-10

¹ Assingkamua urang sipanjamaang, kambe appiu'rangi ri kau, solanna andaiko appakaassolong pappidalle' battu ri Allataala numaeng mutarima injo.

² Saba' Allataala appau, ”RihattungKu angngai, Nakke appilangngeri ri kau, na rihattungKu appakasalama', Nakke laattulung ri kau.” Sitoje'na, hattu inni iamo hattu langai injo; sitoje'na, allo innimo allo pappakasalamakang injo.

³ Lalang ripassala manna apajua kambe gelekang appakatatto'ro tau, solanna gelei ritua-tuai panjampangimba.

⁴ Sibale'na, lalang risikuanna passala tapappijanjangangi ma'nassana kambemo pajampanginna Allataala, iamo intu: Lalang ripanahangang napasu surangang passukku' kasabbarang lalang rikasissaang, kasinsaraang na kamarasaiang,

⁵ lalang appisa'ring panra'bung, lalang ri pattarungkuang surang kajujaang, lalang kareso, lalang a'jaga-jaga surang appuasa;

⁶ lalang ri ati tangkasa, pangisse', kasabbarang, na kalammorang pa'mai'; lalang Nyaha Tangkasa surang pangamaseang lambusu;

⁷ lalang appala'bang katojekang surang kakahasaanna Allataala; surangang make sikonjo sanjata kaadelang laa'bali iyareka lanyila'

⁸ hattu ripakala'biri iyareka ri tua-tuai; hattu risalla iyareka ripau baji'; hattu rirapang assimpole pabura-bura, toje'i tau naba,

⁹ assingkamua tau gele riisse', mingka baji' kaissekanna; assimpole tau lamate, na toje'i kambe tallasakang, assimpole tau rirabung, mingka gelekang mate;

¹⁰ assimpole tau pa'risi kamateang, mingka tulusu a'rannu-rannu; assimpole tau kaasi-asi, mingka appakakalumannyang lohe tau; assimpole tau tide' anunna, manna injo kambe taampunnai sikuanna.

Andamo pole rie' karammasang passala ri kapere 6:11–7:1

¹¹ Oe tau Korintus! Kambe maeng a'bisara lambusu mange ri kaui, tassungke luarai atiba mange ri kaui.

¹² Mange ri kaui rie' tampa' luara lalang ri atiba, mingka mae ri kambe so'di' jua tampa' tassadia lalang ri atimui.

¹³ Injomo saba'na, konni-konnina, solanna assillehai – nakke appau assimpole mange ri ana'-ana'ku –: Sungke luarai atimu!

¹⁴ Akolalo a'bahaang baji' surangang tau gele injo tappa'. Saba' passimpoleang apa rie' rikanabaang surang rikadorakaang? Iyareka anteekamua sinara inni akkulle assiama' surang kalammang?

¹⁵ Apa passimpoleanna nurie' ri Almase surangang Setang? Apa dahuang sikuanna tau tappa' surangang sikuanna tau gele tappa'?

¹⁶ Apa passisambunganna Sapo Allataala surangang barahala? Saba' dittemo sapo battu ri Allataala attallasa injo assimpole pauna Allataala inni, ”Nakke laammari surangang iyai na attallasa ritangnga-tangnganai, na Nakke laa'jari Allataala ri iyai, na iyai laa'jari umma'Ku.

¹⁷ Injomo saba'na: Ansulu'laloko battu ri iyai, na sa'la'i kalemmu battu ri iyai, pauna Karaeng Allataala, na akolalo serui nurammasa injo, solanna Nakke narima ri kau.

¹⁸ Na Nakke a'jari ammammu, na kau laa'jari ana'-ana'Ku bura'ne surang ana'-ana'Ku bahine appakonjomu pauna Karaeng Tukaminang kahasa injo.”