2 KORINTUS 4 - Kitta' Passitallikang Bau KAREBA BAJI'

Kakalumannyangang suruga lalang ri gusi 4:1-15

¹ Saba' ribarakka' pangamaseang Allataala maeng tatarima panjampangi inni. Injomo saba'na, kambe gelekang tappu' panrannuang.

² Mingka gelei tangai sikonjo panggeokang appakasiri' tassa'bu-sa'bu injo; kambe gelei daa akkala'ba na gelei tapalusu pauna Allataala. Sibale'na, tapappijanjangangi katojekang na surangang ri appakonjona tapa'bisonaangi kalemba laritilingi assituru' ati alusu'na sikuanna tau ri a'rakanna Allataala.

³ Ampa Injili nutapala'bang injo tattongko' juapai, Injili injo tattongko'i mange ri iyai tulamate injo,

⁴ iamo intu sikuanna tau gele injo tappa', nupikkiranna maeng ripakabuta ri Ibilisi tukahasana jammang inni, sa'genna gele lajanjangi sinara Injili passala kala'birang Almase iamo ja'banganna Allataala.

⁵ Saba' gele kalemba tapappiissekang, mingka Isa Almase iamo Karaeng, na kalemba assimpole atammu kanara ria'ra'na Almase.

⁶ Saba' Allataala maengi appau, ”Battu lalang rikalammang laambassi' sinara!”, Ia todo' labua'i sinara'Na assau lalang ri atita, solanna ditte nguppa sinara battu ripangisse' passala kala'birang Allataala nukajanjangang injo ri rupanna Almase.

⁷ Mingka kakalumannyangang inni taampunnai lalang ri gusi, solanna kaissekangi ma'nassana kagassingang alla'bi-la'bi injo assala'na nubattu ri Allataala, gele nubattu ri kambe.

⁸ Lalang risikuanna passala inni kambe ripakasissa, mingka gelei a'baru'bu' ta'epe', kala'busangkang riakkala, mingka gelekang tappu' panrannuang;

⁹ kambe ripakamarasai, mingka gelekang ribokoi akkale-kale, ripatappasakang, mingka gelekang mate.

¹⁰ Kambe tulusu taerangi kamateanna Isa lalang ri batangkalemba, solanna katallasanna Isa kajanjangang todo'i lalang ri kalemba.

¹¹ Saba' kambe, tuattallasa inni juapa, tarru'-tarrusu ripassareang mange rikamateang passabakang Isa, solanna tallasa'na Isa a'jari kajanjangang todo'i lalang ri kalemba nulamate inni.

¹² Ri appakonjona, kamateang pela' gassingi lalang ri kalemba na tallasa injo pela' gassingi lalang ri kau.

¹³ Mingka kanara kambe ngampunnai nyaha katappakang gele assisala, assimpole rie' ta'ukiri: ”Nakke tappa', injomo saba'na nakke appau-pau”, jari tappa' todo'kang na injomo saba'na kambe appau-pau todo'kang.

¹⁴ Saba' kambe taisse'i ma'nassana Allataala, tumaeng lapakaattallasa injo Karaeng Isa, injo kambe lalapakaattallasa todo' assurangang Isa. Allataala todo'mo lalapassia'rakangkang surangang kau mange ri kalenNa.

¹⁵ Saba' iangase'na injo a'jari kanara kau, solanna barakka' nupela' bakka' passabakang pela' lohena tau a'jari tappa', lapassabaki pela' lohemo kasukkurang mange rikala'biranna Allataala.

Andai tappu' panrannuammu, manna pole rihattu kamateang 4:16–5:10

¹⁶ Injomo saba'na, gelekang tappu' panrannuang, mingka manna injo tubu kasara'ba inni pela' toa, mingka tubu alusu'ba allo-alloi pela' ripakabau.

¹⁷ Saba' kamarasaiang ringang rikonni-konnina, laappabattui ri kambe kala'birang tide' tappu'na nualla'bi risikuanna, sarro la'bi bakkakanna battu rikamarasaiamba.

¹⁸ Saba' kambe gelekang appariati nukajanjangang, passangadinna nugele kajanjangang, saba' nukajanjangang intu sinampe' juai, mingka nugele intu kajanjangang iamo tide' tappu'na.