2 KORINTUS 3 - Kitta' Passitallikang Bau KAREBA BAJI'

Panjampangi ripassitallikang bau 3:1-18

¹ Apa kambe pakaramulamakang isse' attampo-tampo? Iyareka parallukang assimpole tau maraeng injo ngerang sura' pappakala'biri mange ri kaui iyareka battu ri kaui?

² Kaumo sura' pappakala'biri battu ri kambe nuta'ukiri lalang ri atiba, nulaisse' surang akkullei laaji risikuanna tau.

³ Saba' maeng kaissekammu ma'nassana kaumo sura' Almase, nuriukiri ripanjampangi ri kambe, riukiri gele battu ri daha', mingka surangang Nyaha battu ri Allataala attallasa injo, gele todo' ri batu, mingka ri assi, iamo intu lalang ri atina rupatau inni.

⁴ Appakonjomu bakka'na katappakang ri kambe mange ri Allataala patteteang ri Almase.

⁵ Battu ri kambe gelei akkulle tarapang assimpole jama-jamaamba to'jua; gele, pakkulleba iamo intu jama-jamaanna Allataala.

⁶ Iamo labua' todo'kang akkulle a'jari pajampangi battu rise're passitallikang bau, nugele battu ri hukkung riukiri, mingka battu ri Nyaha Tangkasa, saba' hukkung ta'ukiri intu appakamatei, mingka Nyaha Tangkasa appakaattallasai.

⁷ Panjampangi nungerang injo mange rikamateang ta'ukiri hurupu'i ri batu. Mingka, rihattunna ripassareang, lapinahangi kala'biranna Allataala. Saba' manna injo latei, a'caya rupanna Musa, jari matanna sikuanna tau Israele gelei akkulle latangara. Ampa panjampangi injo battui rikala'birang appakonjo.

⁸ Jari la'bipa pole bakka'na kala'birang numinahang ri panjampangi Nyaha.

⁹ Saba', ampa panjampangi langerang mange rihukkungang injo la'biri, anteekamua la'bi la'birina panjampangi mange injo rikanabaang.

¹⁰ Sitoje'na apa riolo nuriare' la'biri, ampa ripassinrapangangi surangang kala'birang nukaminang rate inni risikuanna, injo tide' sikali matu-matunna.

¹¹ Saba', ampa nulate injo lapinahangi kala'birang, anteemu kamua pole nugele injo late lapinahang kala'birang.

¹² Saba' ngampunnaikang tanjengang appakonjo, jari a'geo'kang surang rassi kabaraniang,

¹³ gele assimpole Musa, lalampang rupanna, solanna matanna sikuanna tau Israele andai lajanjang palannya'na sinara late injo.

¹⁴ Mingka pikkiranna maeng a'jari pokkolomu saba' sa'genna allo inni pallampang injo rie' juapai lalampangi ngase'i, ampa iyai ngaji passitallikang riolo injo nagelei risungkeang, saba' lalang jua ri Almase pallampang injo risungke.

¹⁵ La'bipa pole sa'genna allo inni, ampa laaji kitta'na Musa, rie' juapa pallampang latongko'i atina.

¹⁶ Mingka ampa atina se're tau a'giling mange ri Karaeng, pallampang injo rialle battu ri tau injo.

¹⁷ Karaeng iamo intu Nyaha Tangkasa; na ri antee-tee mae rie' Nyaha Karaeng, ri injomo rie' kalappasang.

¹⁸ Ditte ngase' inni ripappijanjangangi kala'biranna Allataala ri rupa gele ta'lampang. Saba' kala'birang injo assala'na battu ri Karaeng iamo Nyaha, jari ditte maemmuki ripinra a'jari assimpole surangang ja'banganNa, lalang kala'birang nupela' bakka' injo.