2 KORINTUS 2 - Kitta' Passitallikang Bau KAREBA BAJI'

¹ Nakke maemma ngalle katappukang lalang ri atiku ma'nassana gelema lamuliang mange ri kaui ampa langerangi kapa'risang ri ditte.

² Saba', ampa kupakapa'risi atimu, inaimo akkulle a'jari rannu ampa gele tau kupa'ri'-pa'risi injo.

³ Mingka iamo injo pattujunna sura'ku inni, iamo intu solanna ampa nakke rie', andama pa'risi kanara iyai rituparallu injo lapaa'jaria rannu. Saba' nakke tappa'a ripassala'mu ngase' ma'nassana kate'neangku injo kate'neammu todo'.

⁴ Nakke ngukiri mange ri kaui surangang ati bata-bata na pa'risi surang appaatti' lohe ere mata, gele solanna pa'risi todo'i nyahamu, mingka solanna muisse' ngase'i anteekamua bakka'na pangamaseangku mange ri kau ngase'.

Parallui riampungi tau rie' injo salana 2:5-11

⁵ Mingka ampa rie' tau a'jari passabakang rikapa'risang, injo gele nyahaku lapa'risi, mingka nyahamui ngase', iyareka rie' sikura tau ri kaui. Gelei kupakala'bi passala inni.

⁶ Mange ri tau appakonjo injo ganna' tommoi ampa rihukkungi battu ri kaui,

⁷ mingka sibale'na kau ngase' sibaji'na parallu assare ampung surang assihi-sihi mange ri ia, solanna ia andai panra' kanara kapa'risang sanna' injo.

⁸ Injomo saba'na nakke assare pappiu'rangi ri kau, solanna ngamaseang tojekiko mange ri ia.

⁹ Saba' appakonjomu pattujungku ngukiri sura' mange ri kau, iamo intu lanyo'ri ri kaui, apa kau tunru' juako lalang risikuanna.

¹⁰ Saba' inai ri kau ngampungi kasalaanna, injo kuampungi todo'i. Saba' ampa nakke ngampungi – so'di injo rie' nuparallu kuampungi – passala injo kugeokangi kanara kau ri a'rakanna Almase,

¹¹ solanna Ibilisi andai appa'lingu ri ditte, saba' ditte riisse'i apa a'ra'na.

Kabata-bataang surang kalongganganna Paulus ri Troas surang ri Makedonia 2:12-17

¹² Rihattungku ambattu ri Troas laappala'bang Injili Almase, kurumpa'i ma'nassana Karaeng maeng ambungkarai babaang jama-jamaang ri injo.

¹³ Mingka atiku gelei a'ra' sannang, kanara gelena kurumpa' urang siana' julu katappakangku Titus. Injomo saba'na nakke ngerakanaa na a'lampaa mange ri Makedonia.

¹⁴ Mingka sukkuru' ri Allataala lalang ri Almase nusanging laurangkang ripa'lalangang pambetaanNa. Patteteang ri kambe Ia appala'bang pangisse' ri antee-tee mae ripassala Almase.

¹⁵ Saba' ri Allataala assimpolekang rasa hondu battu ri Almase ritangnga-tangngana turipakasalama' injo na ri iyai tulamate injo.

¹⁶ Ritulapanra' inni kambemo assimpole a'jari passabakang kamateang rinuappakamate injo na mange ri turipakasalama' injo kambe rasa hondu katallasang nuappakaattallasa injo. Mingka inaimo akkulle appalingka jama-jamaang appakonjo?

¹⁷ Saba' kambe gelekang assimpole tau maraeng ngalle lohe passahalang ri pauna Allataala. Sibale'na, lalang ri Almase kambe a'bisara anteekamua sitoje'na surangang ati si'nong battu riparenta Allataala na ri a'rakanNa.