2 KORINTUS 13 - Kitta' Passitallikang Bau KAREBA BAJI'

Pappiu'rangi kala'busang 13:1-10

¹ Inni makapintallummu nakke rie' mange ri kaui: Rie' ta'ukiri battu ri pappauna rua iyareka tallu tau sa'bi se're inni palakara a'jari assa.

² Mange ri iyai, turihattu riolo a'bua' kadorakaang, na mange ri iangase'na tumaraeng injo, la'bi riolomu maeng kupau na lakupaui pole sikalipa – konni-konnina rihattungku dere battu ri kau assimpole rihattu rimakapinrungku rie' – ma'nassana nakke gelea a'lumu-lumu nyaha mange ri iyai rihattungku rie' pole.

³ Saba' a'rakiko se're tanra kajanjangang ma'nassana Almase appau-pau surangang ripatteteangku, na Ia gelei lamma mange ri kaui, mingka akkahasai ritangnga-tangngamu.

⁴ Saba' manna injo Ia maengi risalli' rikanara kalammaang, mingka Ia attallasai kanara kahasana Allataala. Toje'i kambe lamma lalang ri Ia, mingka kambe laattallasa assurang-surang Ia tujummu kanara kahasa Allataala.

⁵ Paressai kalemmu, apa kau tulusu jarre' jua lalang rikatappakang. Salidikisai kalemmu! Barang geleiko tappa' ri kalemmu ma'nassana Isa Almase rie'i lalang ri kau? Saba' ampa gelei appakonjo, injo geleiko attahang lalang ripasso'ri.

⁶ Mingka pa'minasangku muisse'i ma'nassana gele kambe tugele injo attahang ripasso'ri.

⁷ Kambe ngera dowaang mange ri Allataala, bisannabali andaiko anggeokang sipa' daa gele solanna kambe kaissekang attahang ripasso'ri, mingka solanna kau akkulle anggeokang nubaji', manna injo sitoje'na kambe gelekang attahang ripasso'ri.

⁸ Saba' tide' pakkulle ri kambe laa'bali kanabaang, nuakkulle tageokang iamo intu tujunna kanabaang.

⁹ Saba' kambe a'rannu-rannu, ampa lammakang na kau a'jari sa'ga'. Na iamo inni nutapangera dowaang injo, iamo intu solanna a'jari sangkakiko.

¹⁰ Iamo injo saba'na sikalipa pole nakke ngukiri sura' mange ri kaui rihattungku dere ri kau, solanna ampa nakke rie' ritangnga-tangngamu, nakke gelema parallu appau terasa assituru' kahasa numaeng injo lapassareang Allataala mae ri nakke laappaenteng na gele laappakasosara.

Sallang Pappikatu 13:11-13

¹¹ Kala'busanna, Urang siana'ku, a'rannu-rannulaloko, parri-parri kalemmu solanna a'jari sangka'. Tarimalaloi sikonjo pappiu'rangingku! Paralluiko assituru'-turu', na attallasako lalang dame salehangang; jari Allataala, poong pangamaseang surang dame salehangang injo minahangi ri kau!

¹² Assareko barasallang mange ri tau maraeng lalang ri passikamaseangang. Sallanna battu risikuanna tau tappa' mange ri kau ngase'.

¹³ Barakka' ri Karaeng Isa Almase, surang pangamaseang ri Allataala, na passamaturukang ri Nyaha Tangkasa minahang ri kau ngase'.