2 KORINTUS 12 - Kitta' Passitallikang Bau KAREBA BAJI'

Paulus nguppa panjanjang surang tanra 12:1-10

¹ Nakke parallu a'bangga-bangga, manna toje'i passala injo tide' jua matu-matunna, mingka nakke a'ra'i kupappissekang sikonjo panjanjang surang tanra-tanra battu ri Karaeng.

² Kuisse'i passala'na se're inni tau tappa' ri Almase; sampulomu patantaung allalona – apa rie'i lalang ri batangkale, gelei kuisse', apa rie'i pantarang batangkale, gelei kuisse', Allataalamo laisse'i – tau injo sikalinna riangka'i nai' rialla' makatallu battu ri suruga.

³ Kuisse' todo'i passala'na tau injo – apa rie'i lalang ri batangkale apa rie'i pantarang batangkale, gelei kuisse', Allataalamo laisse'i –

⁴ ia sikalinna riangka'i mange ri Firdaus na ia lalangngerei sikonjo pau gele injo akkulle ripau-pau, nugele injo akkulle lapapau rupatau.

⁵ Ri tau injo nakke parallu a'bangga-bangga, mingka ritujunna kalengku gelea laa'bangga-bangga, passangadinna risikonjo kalammaangku.

⁶ Saba' so'di injo nakke a'ra' todo'a a'bangga-bangga, nakke gelemo tau ba'ga, kanara nakke appau kanabaang. Mingka kuallei kalengku, solanna anda rie' tau appikkiri ripassala'ku la'bi battu rinulajanjang injo ri nakke iyareka rinulalangngere injo battu ri nakke.

⁷ Na solanna nakke anda tampo kanara tanra nugele injo samara, injo nakke risare se're passu'ma' lalang ri assingku, iamo intu se're tau suro-surona Ibilisi nobo' ri nakke, solanna nakke anda tampo.

⁸ Patteteang ripassala injo nakke pintallumma a'nga'ngara mange ri Karaeng, solanna suro-surona Ibilisi injo soho'i battu ri a'rakangku.

⁹ Mingka pappihalinna Karaeng mae ri nakke, ”Ganna'mu barakka'Ku mange ri kau, saba' lalang rikalammaammu a'jari sangka'i kahasaKu.” Injomo saba'na, nakke la'bi kungai a'bangga-bangga lalang rikalammaangku, solanna kahasa Almase naung ri nakke.

¹⁰ Kanara injomo, nakke sannang surang rella lalang rikalammaang, lalang ripassissa, lalang rikasukkarang, lalang rikamarasaiang surang kasinsaraang passabakang Almase. Saba' ampa nakke lamma, injo gassinga.

Bata-batai Paulus 12:11-21

¹¹ Toje'i nakke maeng a'jari ba'ga; mingka kau massa-massa ri nakke. Sitoje'na kaui parallu lappakala'biri mae ri nakke. Saba' manna injo nakke tide' jua matu-matungku manna siso'di', mingka ri iangase'na passala nakke gelea lasauru risikonjo suro sara'de' injo.

¹² Tanra-tanra rise're inni suro maeng ripappijanjangammu ritangnga-tangngamu lalang risikuanna kasabbarang patteteang ritanra-tanra, kajariang gele samara surang sikonjo kahasa.

¹³ Saba' lalang ripassala anteeang kau riparibokoang ripassinrapangang risikonjo jamaah maraeng, maraenganna lalang ripassala inni, iamo intu ma'nassana nakke gelea a'jari pamberaki ri kau? Ampungilaloi kanara geleku adele!

¹⁴ Sitoje'na konni-konnina nakke pintallumma a'naha-naha laa'lampa mange ri kaui, na nakke gelea laa'jari pamberaki ri kau. Saba' gele kakalumannyangammu kuboja, mingka kau jua. Saba' gele ana'-ana' laappasse're kakalumannyangang mange ri tau toana, passangadinna tau toa injomo ri ana'-ana'na.

¹⁵ Injomo saba'na kungai kupa'koro'bangang anungku, la'bipa pole kupa'koro'bangangi kalengku ri kau. Jari, ampa nakke sanna' ngamaseang ri kau, ngura nakke pela' gele larikamaseang?

¹⁶ Baji'mu, nakke to'jua gele a'jari pamberaki ri kau, mingka – kau appau – lalang rikasara'dekangku nakke maeng appalinga-linga ri kau surangang bura-bura.

¹⁷ Apa nakke maeng ngalle passahalang battu ri kau patteteang rise're tau battu ri iyai tumaeng injo kusuro mange ri kaui?

¹⁸ Toje'i nakke maeng assuro ri Titus laa'lampa na assurang-surangi ia nakke assuro urang siana' julu katappakang maraeng injo. Barang Titus ngallei passahalang battu ri kau? Gelejua kambe ruaiya tallasa assituru' nyaha assimpole na gelejua kambe anggeokang assituru' ta'ra assimpole?

¹⁹ Sanna' sallomu kau a'nga're ma'nassana kambe a'ra' assa'bi ri kalemba mange ri kaui. Ri a'rakanna Allataala na passabakang Almase kambe appau: Iangase'na inni, urang siana' mala'biri'ku, a'jari laappakajarre' rikatappakammu.

²⁰ Saba' nakke bata-bata ma'nassana ampa nakke rie' kurapikangiko gelei assimpole nukukaa'raki injo na kau anrapikangi ri nakke gelei assimpole numukaa'raki injo. Nakke bata-bata palarie'na passisalaang, siriati, pakkukukang, kalenna jua lapariati, pitina, laga'-lagarang daa, katampoang, surang pa'beserang bakka'.

²¹ Nakke bata-bata ma'nassana ampa nakke rie' pole, Allataalaku appakatuna ri nakke ri a'rakammu na nakke lapa'risi ri lohe tau nukanara rihattu riolo anggeokangi kadorakaang na gelepai jarra battu rikarammasang, kabalerang surang risikonjo passala gele injo siratang rigeokang.