2 KORINTUS 10 - Kitta' Passitallikang Bau KAREBA BAJI'

Pammentenganna Paulus 10:1-11

¹ Nakke, Paulus, nulapau tau: se're tugele barani ampa assia'rakangki, mingka baranii ampa nakke derea battu ri kau, nakke appiu'rangi mange ri kaui passabakang ri Almase tulumu nyaha na baji' pa'mai'na.

² Kuerai mange ri kaui: Ako passa-passaa kupappijanjangang kabaraniangku seppa' mange ri kaui, assimpole nakke a'ra' laa'geo' kasara mange risikuanna tau a'ngare' injo ma'nassana kambe tallasakang asituru' a'ra'na lino inni.

³ Toje'i kambe attallasa juapakang ri lino, mingka kambe gelekang attujo-tujo assimpole pattujunna katallasang ri lino,

⁴ saba' sanjata tapake injo lalang ripattujo-tujoamba gele sanjata ri lino inni, mingka sanjata nurisangkaki rikahasana Allataala, nuakkulle appakasosara sikonjo tembo' pa'lengukang.

⁵ Kambe tapela'i sikonjo naha-naha daana tau inni na tapakalammai sikonjo pa'lengukang nuripaenteng injo rikatampoanna rupatau laa'bali pangisse' ri Allataala. Kambe a'bali sikonjo pikkirang na lataerangi mange ri Almase,

⁶ na kambe sadia todo'kang laassare hukkungang risikuanna tau gele tunru', ampa attoje'-toje' patunru'mu.

⁷ Tilingilalo buttina ri a'rakang matammu! Ampa rie' se're tau toje'i tappa'na ma'nassana iamo anunna Almase, parallui appikkiri lalang ri atina ma'nassana kambe anunna todo'kang Almase assimpole ia.

⁸ La'bipa pole, ampa nakke alla'bi-la'bi banggaku rikahasa, nulapassareang injo Allataala mae ri kambe laappaenteng na gele lamma ri kau, jari lalang ripassala injo nakke nguppa kasirikang.

⁹ Mingka nakke gelea a'ra' kajanjangang assimpolekalena nakke laappakamalla' ri kau surangang sikonjo sura'ku.

¹⁰ Saba', lakua tau passala ri nakke, sikonjo sura'na toje' terasai na karrasa, mingka ampa assia'rakangki lumu nyahai na sikonjo pauna tide' jua battuanna.

¹¹ Mingka sibaji'na sikuanna tau appau appakonjo parallui lapiisseki ma'nassana panggeokang ri kambe, ampa assia'rakangki, assimpole pau-pau ri kambe lalang risikonjo sura'ba, ampa geleki assia'rakang.

Panguppana Paulus ripassala kalenna 10:12–11:6

¹² Toje'i gelekang barani tapaantama'i iyareka tapaassinrapangi kalemba surangang sikuanna tau lagallara injo kalenna. Iyai injo kalenna laukkuru na laapassinrapangangi surangang kalenna to'jua. Sanna' toje'i ba'gana!

¹³ Sibale'na kambe gelekang a'ra' a'bangga-bangga, passangadinna tulusu rie' lalang risimbanna panjamaang nulatantuang Allataala mae ri kambe, nualla'bang injo todo' mange ri kaui.

¹⁴ Saba' lalang ripappala'bangang Injili'na Almase kambe maemmakang ambattu mange ri kaui, sa'genna kambe gelekang a'limbang ripassimbangang panjamaamba, assimpolekalena kambe gelepakang ambattu mange ri kaui.

¹⁵ Kambe gelekang a'bangga-bangga ri jama-jamaang lageokang injo tau maraeng ripanjamaang nugele injo ritantuang ri kambe. Mingka tajallikang ma'nassana ampa katappakammu pela' a'bakka'i, injo kambe languppa kala'birang la'bi bakka' pole battu ri kau, ampa ripassinrapangangi surangang ripanjamaang nuritantuang injo mae ri kambe.

¹⁶ Ri appakonjona, kambe akkullekang appala'bang Injili ri kampong-kampong maraeng nula'bi dereang battu ri kampommu na gele a'bangga-bangga rihassele nulauppai injo tau maraeng ri kampong panjamaang nuritantuang injo mange ri iyai.

¹⁷ ”Mingka inai jua a'bangga-bangga, parallui a'bangga-bangga kanara jama-jamaanna Karaeng.”

¹⁸ Saba' gele tau laakui injo kalenna attahang ripasso'ri, passangadinna tau riakui injo ri Karaeng Isa.