1 YAHYA 5 - Kitta' Passitallikang Bau KAREBA BAJI'

Katappakang appibetai lino 5:1-5

¹ Sikuanna tau tappa' ma'nassana Isa intu Almase, laherei battu ri Allataala; na sikuanna tau ngamaseang ri Ia tualleharang injo, ia ngamaseang todo'i ri tulahere injo battu ri Allataala.

² Lalang ri innimo ditte riisse'i ma'nassana ditte ngamaseang ana'-ana'na Allataala, iamo intu ampa ditte ngamaseang Allataala na anggeokang risikonjo passuroanNa.

³ Saba' iamo inni pangamaseang injo mange ri Allataala, iamo intu ma'nassana ditte rituruki sikonjo passuroanNa. PassuroanNa injo gelei terasa,

⁴ saba' sikuanna nulahere battu ri Allataala, ambetai lino. Na iamo inni pambeta nuappibetai injo lino: Katappakanta.

⁵ Inaimo laambeta lino, maraenganna ia tutappa' injo ma'nassana Isa intu Ana' Allataala.

Passa'bi ripassala Ana' Allataala 5:6-12

⁶ Iamo inni Ia tumaeng rie' injo lalang ri ere surang rara, iamo intu Isa Almase, gele sangga surangang ere jua, mingka pole surangang ere na surangang rara. Na Nyaha injomo assa'bi saba' Nyaha injo kanabaang.

⁷ Saba' rie' tallu nuassare passa'bi lalang ri suruga: Amma, Pau na Nyaha; na talluiya injo nuse're.

⁸ Na rie' tallu nuassare passa'bi lalang ri lino inni: Nyaha na ere surang rara na talluiya injo nuse're.

⁹ Ditte narima passa'bi ri rupatau, mingka passa'bi ri Allataala injo la'bi gassingi. Saba' iamo inni passa'bi battu injo ri Allataala, iamo intu ma'nassana Ia assa'bi ripassala Ana'Na.

¹⁰ Inai jua tappa' mange ri Ana' Allataala, ia ngampunnai passa'bi injo lalang ri kalenna; inai gele tappa' mange ri Allataala, ia la'bua'i Ia pabura-bura, saba' ia gelei tappa' mange ripassa'bi nulapassareang injo Allataala ripassala Ana'Na.

¹¹ Na iamo inni passa'bi injo: Allataala maeng lapassareammu katallasang mannannungang injo mae ri ditte na tallasa injo rie'i lalang ri ana'Na.

¹² Inai jua ngampunnai Ana', ia ngampunnai tallasa; inai gele ngampunnai Ana', ia gelei ngampunnai tallasa.

Pangisse' rikatallasang mannannungang 5:13-21

¹³ Iangase'na kuukirii mange ri kau, solanna kau tutappa' injo mange ri arenna Ana' Allataala, muisse'i ma'nassana kau ngampunnai tallasa mannannungang.

¹⁴ Na iamo inni kabaranianta latappa' mange ri Ia, iamo intu ma'nassana Ia lapitoli pangera dowaanta, ampa ditte ngera se're passala mange ri Ia assituru' a'ra'Na.

¹⁵ Na ampa ditte riisse'i ma'nassana Ia lapitoli apajua riera, injo ditte riisse' todo'i ma'nassana ditte maeng ri tarimamu sikuanna numaeng riera injo mange ri Ia.

¹⁶ Ampa rie' se're tau lajanjangi urang siana'na anggeokang kadorakaang, iamo intu kadorakaang nugelejua ngerang kamateang, sibaji'na ia parallui ngera dowaang mange ri Allataala na Ia laassare tallasa mange ri ia, iamo intu iyai tuanggeokang kadorakaang gele injo ngerang kamateang. Rie' kadorakaang ngerang kamateang: Ripassala'na injo gelei kupau ma'nassana ia parallui ngera dowaang.

¹⁷ Iangase'na nudaa injo kadorakaang, mingka rie' kadorakaang nugele ngerang kamateang.

¹⁸ Ditte riisse'i ma'nassana sikonjo tulahere injo battu ri Allataala, gelei sitarrusu'na anggeokang kadorakaang; saba' Ia tulahere injo battu ri Allataala lalajagai, na tudaa injo gelei akkulle laseru.

¹⁹ Ditte riisse'i ma'nassana ditte assala'ta nubattu ri Allataala na sibatu lino rie'i lalang rikahasana tudaa injo.

²⁰ Mingka, ditte riisse'i ma'nassana Ana' Allataala maemmu rie' na assarei pangisse' mae ri ditte, solanna ditte ngisse' ri Tunaba injo; na ditte rie' lalang ri Tunaba, lalang ri Ana'Na Isa Almase. Iamo Allataala nunaba surang tallasa mannannungang.

²¹ Ana'-ana'ku, akkaletutulaloko mange risikonjo barahala.