1 YAHYA 4 - Kitta' Passitallikang Bau KAREBA BAJI'

Nyaha Allataala surang nyaha balinna Almase 4:1-6

¹ Urang siana' mala'biri'ku, akolalo tappa' mange risikonjo nyaha, mingka so'ri ngase'i sikonjo nyaha, apa injo assala'na nubattu ri Allataala; saba' lohe nabbi palusu maeng ammumba na a'lampai lapila'bangi sibatu lino.

² Lalang ri innimo ditte akkullei riisse' Nyaha Allataala: Sikonjo nyaha nungaku ma'nassana Isa Almase maemmu rie' assingkamua rupatau, injo assala'na nubattu ri Allataala,

³ na sikonjo nyaha gele injo ngaku ri Isa assala'na gele nubattu ri Allataala. Nyaha injo iamo nyaha balinna Almase na passala ri ia maemmu mulangngere ma'nassana ia larie'i na konni-konnina ia rie'mu lalang ri lino inni.

⁴ Kau assala'mu battu ri Allataala, ana'-ana'ku, na kau maeng ambeta ri sikonjo nabbi palusu injo; saba' Nyaha nurie' injo lalang ri kau, la'bi bakkakang kahasana battu risikonjo nyaha rie' lalang ri lino inni.

⁵ Iyai injo assala'na nubattu ri lino inni; injomo saba'na iyai a'bisarai risikonjo passala'na lino inni na lino inni appilangngerii ri iyai.

⁶ Kambe assala'na battu ri Allataala: Inai jua laisse'i Allataala, ia lapilangngerikang; inai assala'na gele battu ri Allataala, injo ia gelei appilangngeri ri kambe. Iamo injo tanrana Nyaha kanabaang surang nyaha appakalingu.

Allataala iamo intu poong pangamaseang 4:7-21

⁷ Urang siana' mala'biri'ku, saba' pangamaseang injo assala'na nubattu ri Allataala; na sikuanna tau ngamaseang; laherei battu ri Allataala na laisse'i Allataala.

⁸ Inai jua gele ngamaseang, ia gelei laisse' Allataala, saba' Allataala iamo intu pangamaseang.

⁹ Lalang ripassala innimo pangamaseanna Allataala ripappisa'biang ritangnga-tangngata, iamo intu ma'nassana Allataala maeng lasuromu Ana' sitau-tauNa antama' mae ri lino inni, solanna ditte attallasa rikanaraNa.

¹⁰ Iamo inni pangamaseang injo: Gele ditte maeng ngamaseang Allataala, mingka Allataala maeng ngamaseang ri ditte na lasuro ana'Na laa'jari pa'dameang mange risikonjo kadorakaanta.

¹¹ Urang siana' mala'biri'ku, ampa Allataala ngamaseang appakonjo mae ri ditte, injo ditte parallu todo'ki assikamaseang.

¹² Tide' manna se're tau minang anjanjang Allataala. Ampa assikamaseangki, injo Allataala tulusu rie' lalang ri ditte, na pangamasaeanNa sangka'i lalang ri ditte.

¹³ Appakonjomu ditte riisse'i ma'nassana ditte tulusu rie'ki lalang ri Allataala na Ia lalang ri ditte, saba' Ia maeng lapassareammu NyahaNa mae ri ditte.

¹⁴ Na kambe maeng anjanjang surang assa'bi ma'nassana Amma maeng assuro ri Ana'Na laa'jari Pappakasalama'na lino inni.

¹⁵ Inai jua ngaku ma'nassana Isa intu Ana' Allataala, Allataala tulusu rie'i lalang ri ia na ia lalang ri Allataala.

¹⁶ Ditte maeng riisse'mu na maeng tappa'ki ripassala pangamaseanna Allataala mae ri ditte. Allataala iamo intu pangamaseang, na inai tulusu rie' lalang ripangamaseanna Allataala, ia tulusu rie'i lalang ri Allataala na Allataala lalang ri ia.

¹⁷ Lalang ripassala innimo pangamaseanna Allataala sangka' lalang ri ditte, iamo intu ampa ditte ngampunnai kabaraniang tappa' mange riallo pangadelang, saba' assimpole Ia, ditte rie' todo'ki lalang ri lino inni.

¹⁸ Lalang ripangamaseang tide' malla': Pangamaseang sangka' injo appakalannya'i malla'; saba' malla' injo ngimbolongi hukkungang na inai malla', ia gelei sangka' lalang ripangamaseang.

¹⁹ Ditte ngamaseang, saba' Allataala la'bi riolo ngamaseang mae ri ditte.

²⁰ Ampa rie' se're tau appau, Nakke ngamaseang ri Allataala, mingka ia likingi mange ri urang siana' julu katappakanna, injo ia pabura-burai, saba' inai gele ngamaseang ri urang siana'na nukajanjangang injo, gelei ma'ring ngamaseang ri Allataala nugele injo kajanjangang.

²¹ Iamo inni parenta numaeng ritarima injo battu ri Ia: Inai jua ngamaseang ri Allataala, ia parallu todo'i ngamaseang ri urang siana'na.