1 YAHYA 3 - Kitta' Passitallikang Bau KAREBA BAJI'

¹ Janjangimu, anteekamua bakka'na pangamaseang nulapassareang injo Amma mae ri ditte, sa'genna ditte riare' ana'-ana'na Allataala, na toje'i ditte inni ana'-ana'na Allataala. Injomo saba'na, lino inni geleki laisse', saba' lino inni gelei ngisse' ri Ia.

² Urang siana' mala'biri'ku, konni-konnina ditte intu ana'-ana'na Allataala, mingka gelepai kajanjangang anteekamua katallasangta sallo', mingka, riisse'i ampa Almase ri pappisa'biang, ditte laa'jari assimpole Ia, saba' dittemo laanjanjang ri Ia lalang rikatallasang toje'Na.

³ Sikuanna tau lataro injo pattajallianna mange ri Ia, lapakatangkasa kalenna assimpole Ia tutangkasa.

⁴ Sikuanna tau anggeokang injo kadorakaang, labaliang todo'i hukkunna Allataala, saba' kadorakaang iamo intu a'bali rihukkunna Allataala.

⁵ Na kau muisse'i ma'nassana Ia maeng lapappisa'biammu kalenNa, solanna Ia lalu'lu'i sikonjo kadorakaang, na lalang ri Ia gele rie' kadorakaang.

⁶ Sikuanna tau tuli rie' injo lalang ri Ia, gelemu anggeokang pole kadorakaang, sikuanna tau anggeokang kadorakaang, gelei minang anjanjang surang gelei minahang ri Ia.

⁷ Ana'-ana'ku, akolalo lappasangi manna se're tau appakalingu ri kau. Inai jua anggeokang kanabaang injo iamo naba, assimpole Almase injo nabai;

⁸ inai tulusu anggeokang kadorakaang, assala'na nubattu ri Ibilisi, saba' minang ripakaramulana Ibilisi tarru'-tarrusui anggeokang kadorakaang. Iamo inni pattujunna Ana' Allataala lapappijanjangang kalenNa, iamo intu Ia laappakamate risikonjo panggeokanna Ibilisi.

⁹ Sikuanna tau lahere battu ri Allataala, gelei tarrusu anggeokang kadorakaang; saba' lamunganna Allataala tuli rie' lalang ri ia na ia gelei akkulle tarru'-tarrusu anggeokang kadorakaang, saba' ia laherei battu ri Allataala.

¹⁰ Iamo inni tanrana ana'-ana'na Allataala surang ana'-ana'na Ibilisi: Sikuanna tau gele anggeokang kanabaang, assala'na gele nubattu ri Allataala, appakonjo todo'i inai tau gele ngamaseang ri urang siana' julu katappakanna.

Pangamaseang mange ri urang siana' julu kappakang assingkamua tanra tallasa bau 3:11-18

¹¹ Saba' iamo inni kareba numaeng mulangngere minang ripakaramulana, iamo intu ma'nassana ditte paralluki assikamaseang;

¹² gelei assimpole Kain nuassala'na battu ri tau daa na lahuno arinna. Ngura ia lahunoi? Saba' sikonjo panggeokanna nudaa na panggeokang arinna nubaji'.

¹³ Akolalo lannasa, Urang siana', ampa lino inni liking ri kau.

¹⁴ Ditte riisse'i ma'nassana ditte maeng a'lette'maki battu rikamateang antama' rikatallasang, iamo intu kanara ditte ngamaseang mange riurang siana'ta. Inai jua gele ngamaseang, ia tulusu tallasai lalang ri kamateang.

¹⁵ Sikuanna tau liking injo mange ri urang siana' julu katappakanna iamo pahuno rupatau. Na muisse'mu ma'nassana gele rie' pahuno tau latulusu nguppa tallasa mannannungang lalang ri kalenna.

¹⁶ Lalang ri innimo ditte ngisse' ripangamaseanna Almase, iamo intu ma'nassana Almase maeng lapassareangi nyahaNa tujunta; jari manna ditte parallu todo'i ripassareang nyahata tujunna sikonjo urang siana' julu katappakanta.

¹⁷ Inai jua ngampunnai pa'barang-barangang ri lino inni na lajanjang urang siana' julu katappakanna assinsara kakurangang mingka ia latongko'i atina mange ri urang siana'na injo, anteekamua lama'ring pangamaseanna Allataala akkulle tulusu ammari lalang ri kalenna?

¹⁸ Ana'-ana'ku, maeki assikamaseang gele sangga ripau jua iyareka ri mori-mori jua, mingka ripanggeokang surang kanabaang.

Kajarrekang ri a'rakanna Allataala 3:19-24

¹⁹ Appakonjomu ditte ri isse'i ma'nassana assala'ta nubattu rikanabaang na akkullei ripakasannang nyahata ri a'rakanna Allataala,

²⁰ ampa nyahata appitina ri ditte. Saba' Allataala la'bi bakkakang battu ri nyahata na laisse'i sikuanna.

²¹ Urang siana' mala'biri'ku, ampa nyahata gelei appinra ri ditte, jari ngampunnai kabaraniang laseppa' mange ri Allataala,

²² na apa jua riera, ditte riuppai battu ri Ia, saba' ditte rituruki passuroanNa na rigeokangi apa nubaji' injo mange ri Ia.

²³ Na iamo inni passuroanNa: Solanna ditte tappa' ri arenna Isa Almase, Ana'Na, na assikamaseangki assituru' riparenta nulapassareang injo Almase mae ri ditte.

²⁴ Inai jua laturuki sikonjo passuroanNa, ia rie'i lalang ri Allataala na Allataala rie'i lalang ri ia. Lalang ri innimo ditte riisse'i ma'nassana Allataala rie'i lalang ri ditte, iamo intu lalang ri Nyaha numaeng lapassareang injo mae ri ditte.