1 YAHYA 2 - Kitta' Passitallikang Bau KAREBA BAJI'

Almasemo patteteanta 2:1-6

¹ Ana'-ana'ku, passala inni kuukirii mange ri kau, solanna andako anggeokang kadorakaang. Mingka ampa rie' se're tau anggeokang kadorakaang, ditte ri ampunnai se're tau patteteang mange ri Amma, iamo intu Isa Almase tuadele injo.

² Iamo appaa'dame mae risikonjo kadorakaanta na gele sangga kadorakaanta jua, mingka kadorakaanna todo' sibatu lino.

³ Iamo inni tanrana ma'nassana ditte riisse'i Allataala, iamo intu ampa rituruki sikonjo passuroanNa.

⁴ Inai jua tau appau: Nakke minahang ri Ia, mingka ia gele laturuki passuroanNa, ia injo se'rei pabura-bura na lalang ri ia gelei rie' kanabaang.

⁵ Mingka inai laturuki pauNa, lalang ri tau injo sangka' toje'mu pangamaseanna Allataala; lalang ri injomo ditte riisse'i ma'nassana ditte rie' lalang ri Ia.

⁶ Inai jua tau appau ma'nassana ia rie'i lalang ri Ia, ia parallui tallasa assimpole Almase tuattallasa injo.

Parenta bau 2:7-17

⁷ Urang siana' mala'biri'ku, gele parenta bau kuukiri mange ri kau, mingka parenta sallomo numaeng rie' ri kau minang ripakaramulana. Parenta riolo injo iamo intu pau numaemmo mulangngere riolo.

⁸ Mingka kuukiri todo'i mange ri kau parenta bau, nunaba lalang ri Ia surang lalang ri kau; saba' lannya'mu nukalammang injo na assaumu sinara toje' injo.

⁹ Inai jua appau ma'nassana ia rie'i lalang risinara injo, mingka ia likingi mange ri urang siana' julu katappakanna, ia rie'i lalang rikalammang sa'genna konni-konnina.

¹⁰ Inai jua ngamaseang ri urang siana' julu katappakanna, ia tulusu rie'i lalang risinara injo, na lalang ri ia gele rie' pappalingu.

¹¹ Mingka inai lakalikkingang urang siana' julu katappakanna, ia rie'i lalang rikalammang na tallasai lalang rikalammang injo. Ia gelemu laisse' laantee mae laa'lampa, saba' kalammang injomo maeng lapakabutai matanna.

¹² Nakke ngukiri mange ri kau, oe ana'-ana'ku, saba' kadorakaammu maemmu riampungi passabakang ri arenNa.

¹³ Nakke ngukiri mange ri kau, oe amma intu, saba' kau maeng ngisse' ri Ia, nurie' injomo minang ripakaramulana. Nakke ngukiri mange ri kau tau longko intu, saba' kau maeng mubetamu sipa' daa inni.

¹⁴ Nakke ngukiri mange ri kau ana'-ana', saba' kau ngisse' ri Amma. Nakke ngukiri mange ri kau, oe kau amma intu, saba' kau ngisse' ri Ia, nurie'mo minang ripakaramulana. Nakke ngukiri mange ri kau, oe tau longko intu, saba' kau gassing na pauna Allataala rie'i ammari lalang ri kau na kau maeng ambeta sipa' daa.

¹⁵ Akolalo ngamaseang ri lino inni surang apa nurie' lalang ri lino inni. Ampa rie' se're tau ngamaseang lino, injo pangamaseang mange ri Amma gele rie' ri tau injo.

¹⁶ Saba' iangase'na nurie' lalang ri lino inni, iamo intu a'ra' rupatau surang a'ra' mata na katampoang tallasa, nugele battu ri Amma assala'na, mingka nubattu ri lino inni.

¹⁷ Na lino inni lalannya'i surangang sikonjo a'ra'na, mingka tau anggeokang injo a'ra'na Allataala laattallasai situlusu'na.

Balinna Almase 2:18-27

¹⁸ Ana'-ana'ku, hattu inni iamo intu hattu kala'busang, na assimpole numaeng mulangngere ma'nassana larie'i battu balinna Almase, konni-konnina lohemo ammenteng balinna Almase. Battu ripassala innimo ditte riisse'i ma'nassana hattu inni toje'i hattu kala'busammo.

¹⁹ Iyai toje'i assala'na tubattu ri ditte, mingka iyai toje'i tugele antama' ri ditte, saba' ampa antama'i risala se'renna ri ditte, iyai tulusu assurang-surangi ri ditte. Mingka passala injo a'jari, solanna kaissekangi ma'nassana iyai ngase' injo gelei antama' ri ditte.

²⁰ Mingka kau maemmoko nguppa pambarakkaki battu ri Tukaminang Tangkasa, na ri appakonjona kau muisse' ngase'mu.

²¹ Nakke ngukiri mange ri kau, gele kanara gelena muisse' kanabaang inni, mingka kanara muisse'na na kanara muisse'na todo' ma'nassana gele rie' bura-bura nuassala'na battu rikanabaang.

²² Inaimo pabura-bura injo? Gelejua ia tulasangkali injo ma'nassana Isamo Almase? Innimo balinna Almase, iamo intu ia tulasangkali injo baji' Amma iyareka Ana'.

²³ Saba' inai lasangkali Ana', ia gelei ngampunnai Amma. Inai jua ngaku ri Ana', ia ngampunnai todo'i Amma.

²⁴ Na kau, apa numaeng mulangngere minang ripakaramulana, injo parallui tulusu ammari lalang ri kau. Ampa numaeng mulangngere injo minang ripakaramulana tulusu ammari lalang ri kau, injo kau tulusu laammari lalang ri Ana' surang lalang ri Amma.

²⁵ Na iamo inni talli' numaeng latallikang injo Allatala mae ri ditte, iamo intu tallasa mannannungang.

²⁶ Iangase'na inni kuukirii mange ri kau, iamo intu passala'na sikuanna tau apparri-pari injo laappakalingu ri kau.

²⁷ Saba' lalang ri kalemmu tulusu rie' pambarakkaki numaeng mutarima battu ri Ia. Injomo saba'na, gelemoko lariajara ri tau maraeng. Mingka assimpole pambarakkakinNa ngajara mange ri kau passala riiangase'na na pangajaranNa injo nabai, gelei bura na assimpole Ia riolo maeng ngajara mange ri kau, appakonjomu intu sibaji'na kau parallu tulusu ammari lalang ri Ia.

Ana'-ana'na Allataala 2:28–3:10

²⁸ Jari konni-konnina, ana'-ana'ku, ammariko lalang ri Almase, solanna ampa Ia lapappisa'biang kalenNa, ditte nguppaki kabaraniang latappa' na geleki parallu siri' mange ri Ia rihattu pariekanNa.

²⁹ Ampa muisse'i ma'nassana Ia nabai, parallu todo'i muisse' ma'nassana sikuanna tau anggeokang kanabaang, laherei battu ri Ia.