1 TIMOTIUS 6 - Kitta' Passitallikang Bau KAREBA BAJI'

¹ Iangase'na tau a'jari ata injo sibaji'na larapangi karaenna siratang languppa sikuanna kala'birang, solanna arenna Allataala na ajaranta gele latua-tuai tau.

^2a Ampa karaenna injo se'rei tutappa', andalaloi ia gele rikangalikang passabakang assiana'na lalang ri Almase. Mingka sibaji'na karaeng injo lajampangi la'bi baji' pole, saba' karaeng injo tunarima barakka' panjampanginnai iamo intu urang siana' tappa' na tuassikamaseang.

Passala garring assigaga na passala angngai ri doe' 6:2b-10

^2b Pangajaranglaloi na pappiu'rangianglaloi iangase'na inni.

³ Ampa rie' se're tau lapangajarangi ajarang maraeng na gelei assituru' pau-pau baji' – iamo intu pauna Karaengta Isa Almase – na gelei assituru' sambajangta,

⁴ ia assimpolekalena tusara'de' padahala tide'jua laisse'-isse'. Garrinna iamo intu a'boja pa'bi'naang surang passigagaang, nuappabattu kalikingang, passisalapahangang, pitina, bata-bata,

⁵ pa'beserang ri tau gele injomo baji' pikkiranna na tide'mo nunabana. Iyai injo larapangi sambajang inni se're poong passahalang.

⁶ Toje'i sambajang intu akkullei assare passahalang bakka' ampa lapinahangi pappisa'ring ganna'.

⁷ Saba' ditte gele rie' rierang-erang manna se're antama' mae ri lino inni na gele todo' rie' larierang-erang ansulu' battu ri lino inni.

⁸ Assala rie' kanre surang pakeang, injo ganna' tommo.

⁹ Mingka iyai tua'raki injo kalumannyang a'dappe'i antama' ripasso'ri, antama' lalang rijango surang antama' lalang rilohe rupanna napasu tide' matu-matunna na nuappakasilaka, nuappakatallang rupatau antama' lalang rikapanrakang surang kamateang.

¹⁰ Saba' aka' sikuanna sipa' daa iamo intu angngai sarro doe' na kanara andatalamo doe' rie'mo sikura tau maeng a'lili battu rikatappakang jari sissa nyahana saba' lohena kapa'risang lauppa.

Pappasang panongko' 6:11-21

¹¹ Mingka kau oe tau anunna Allataala, kadereilalo iangase'na injo, a'jariko tau adele ri a'rakanna Allataala, tau assambajang na mallang mange ri Allataala, ngamaseang mange ri tau maraeng, sabbara rikasissaang surang lumu nyaha.

¹² Apparri-parriko lalang ripapparri-parriang rikatappakang toje' injo na piuppai tallasa mannannungang injo. Injomo pattujunna kau maeng rikeo' na kaumo maeng assare passa'bi naba ri a'rakanna tau lohea.

¹³ Ri a'rakanna Allataala tuassare injo tallasa mange ri iangase'na na ri a'rakanna Isa Almase tumaeng injo assare passa'bi toje' ri a'rakanna Pontius Pilatus, kupassuroangi mange ri kau:

¹⁴ Turukilalo parenta inni, surangang tide' sallaanna, sa'genna larapi' hattunna Karaengta Isa Almase lapappijanjangang kalenNa,

¹⁵ iamo intu hattu nuritantuang injo ri Tukahasa tide' ruana na rassi barakka', Karaeng risikonjo karaeng na Tukahasa risikonjo tukahasa.

¹⁶ Iamo tide' ruana gele tunru' mange rikamateang, ammarii rikasinarang nugele injo akkulle laseppaki rupatau. Gele rie' manna se're tau maeng anjanjang ri Ia na toje'i rupatau inni gelei akkulle anjanjang ri Ia. Mange ri Iamo sombaang na kahasa mannannungang! Aming.

¹⁷ Piu'rangilaloi sikuanna tau kalumannyang ri lino inni solanna iyai anda a'la'bi'-la'biri na akolalo tajalli mange rise're nugele attantu assimpole kakalumannyangang, mingka mange ri Allataala lalang rikakalumannyanganNa lapassareangi sikuanna mae ri ditte larikasia'i.

¹⁸ Piu'rangilaloi solanna iyai injo nubaji' lageokang, a'jari kalumannyang lalang ripanggeokang baji', langai assare surang a'dahu-dahu

¹⁹ na ri appakonjona apparappungi se're pa'barang-barangang assimpole poong nubaji' mange ri kalenna rihattu larie' injo sallo' languppa tallasa toje' injo.

²⁰ Oe Timotius, katutui apa numaeng injo ripassareang mange ri kau. Liliangi pau bura-bura inni na nugele injo tangkasa surang sikonjo passigagaang nuassala'na battu rinularapang injo tau pangisse', mingka sitoje'na bura-bura jua,

²¹ saba' rie'mo sikura tau lohena lapangajarangi na ri appakonjona maeng a'lilimu battu rikatappakang. Barakka' pangamaseang minahang ri kau!