1 TIMOTIUS 5 - Kitta' Passitallikang Bau KAREBA BAJI'

Passala urang siana' julu katappakang 5:1-2

¹ Akolalo terasa mange ri tau toa, mingka piu'rangii assimpole se're amma. Piu'rangilalo tau longko injo assimpole urammu siana',

² bahine toa injo assimpole se're idong na bahine longko injo assimpole arimmu lalang rikalambusang.

Passala balu-balu 5:3-16

³ Ngali'laloko mange ri tau toje' injo balu-baluna.

⁴ Mingka ampa rie' tau balu-balu rie' ana'na iyareka ampunna, sibaji'na iyai injo kaminang riolo appilajara akkasihiang mange ri passiana'na na labalasai kabajikang tau toana surang puwa-puwanai, saba' iamo injo baji' mange ri Allataala.

⁵ Mingka tau toje' injo balu-baluna, turibokoi kale-kalenna, lapasampe pattajallianna mange ri Allataala na sabbarai ripangera dowaang lalang ripattajalliang allo bangngi.

⁶ Mingka tau balu-balu loga injo tallasa'na na kala'bi-la'biangi, injo ia panra'mu riattallasa'na juapa.

⁷ Pappiu'rangiang todo'i passala inni mange ri balu-balu injo solanna iyai tallasa tide' daana.

⁸ Mingka ampa rie' tau gele lakalahaki passiana'na, la'bipa pole sisapona, a'boko ri Allataala tau injo na la'bi daa sipa'na battu ri tau gele injo tappa'.

⁹ Turidattara injo assimpole balu-balu, injo jua tugele injo kurang ri annampulo taung ummuru'na, tupinsikali injo jua akkalabini

¹⁰ na toje'i maengi anggeokang jama-jamaang baji', assimpole akkalahaki ana', assare pamminsamboang, ambissai bangkeng ri urang siana' julu katappakang, assare pattulungang mange ri tau tallasa injo lalang ri kakurangang – bodona pau iyai tumaeng injo lapake hattunna lappaanggeokang baji'.

¹¹ Tolla'laloi dattara'na balu-balu lolo injo juapa. Saba' ampa iyai injo ripakaammumba napasu balere'na, lapassisa'la'i kalenna battu ri Almase, iyai a'rakii pole a'bura'ne

¹² na latinrang bokoi kamallanganna riolo mange ri Ia, iyai injo appabattui hukkungang mange ri kalenna.

¹³ La'bipa pole, riansulu' antama'na tau inni ri sapo, iyai lapakanarangi kalenna jamala na gele sangga jamala'na jua, mingka sanging allagara daai na lapantamai passilolonganna tau maraeng na appau-paui passala nugele siratang.

¹⁴ Injomo saba'na nakke a'ra'a solanna balu-balu lolo injo a'bura'nei pole, nguppai ana', lapaulu pakkalabinianna na andai assare alasang mange ri bali laappakadaa arengta.

¹⁵ Saba' rie' sikura balu-balu lingumu minahang ri Ibilisi.

¹⁶ Ampa rie' se're bura'ne iyareka bahine tappa' rie' passiana'na balu-balu, sibaji'na iamo lasokongi sa'genna iyai injo andai a'jari pamberaki ri jamaah. Ri appakonjona jamaah akkullei assare sokongang mange ri iyai tutoje' injo balu-baluna.

Pappijo'jo' surang pappiu'rangi 5:17–6:2a

¹⁷ Sikonjo tutoa-toa jamaah baji' injo ta'ranna a'jari ponggaha siratangi rikangalikang surang ribajara a'lappi rua, la'bipa pole mange ri iyai tuakkareso terasa injo a'hato'ba surang ngajara,

¹⁸ Saba', Kitta' Tangkasa appau, ”Akolalo assare sa'mang mange ri baba sapi attangnga injo allesoro anggoro,” na rie' pole, ”Se're pajama siratangi lauppa sahala'na.”

¹⁹ Akolalo narima pappitina rise're tutoa-toa jamaah passangadinna ampa risokongi battu ri rua iyareka tallu tau sa'bi.

²⁰ Iyai tuanggeokang injo kadorakaang parallui muto'ro ri a'rakanna tau lohe solanna manna tau maraeng injo malla' todo'i.

²¹ Ri a'rakanna Allataala surang Isa Almase na sikonjo malaeka' pileanNa kupappasangang toje'i mange ri kau: Pariatilaloi pappijo'jo' inni surangang tide' bata-bata na geokangi sikuanna gele ngalle'-ngalleang se're tau.

²² Akolalo a'nyara-nyara ambarakkaki mange rise're tau na akolalo kapina'-panahangang antama' lalang rikadorakanna tau maraeng. Jagailalo katangkasanna kalemmu.

²³ Anda sangga ere jua muinung, mingka tambaii siso'di' anggoro, kanara gele baji' assinna pompommu na pa'garring-garringangko.

²⁴ Kadorakaanna rie' sikura tau lohena baji' kaissekanna na lapilombai mange ripangadelang, mingka kadorakaanna rie' sikura tau lohena ampamu laa'jari kajanjangang sallo'.

²⁵ Appakonjo todo'i, panggeokang baji' intu lassirii kaissekang na ampa gelei appakonjo, panggeokang injo gelei akkulle tarrusu latassa'bu.