1 TIMOTIUS 4 - Kitta' Passitallikang Bau KAREBA BAJI'

Jama-jamaanna Timotius lalang langa'rakang tungajara sala 4:1-16

¹ Mingka Nyaha lalang rikaterasang lapappisa'biangi ma'nassana rihattu labattu injo sallo', larie' tau laa'boko ri Allataala ampai minahang ri nyaha pappakalingu surang ajarang setang

² ripambuju'-buju'na tau pabura-bura panra'ki injomo ati si'nonna.

³ Iyai lapisangkai tau inni akkalabini, lapisangkai tau inni nganre kanre nulapaa'jari injo Allataala solanna lalang riappanai' sukkuru lakanre tau tappa' na maeng laisse'mu kanabaang.

⁴ Saba' sikonjo nulapaa'jari Allataala injo baji'i na manna se're gele rie' nuharang, ampa ritarimai lalang rikasukkurang,

⁵ saba' iangase'na injo ripakatangkasai ripauna Allataala surang ripangera dowaang.

⁶ Surangang risanging pappiu'rangi ripassala injo mange ri urang siana' julu katappakanta, kau laa'jari se're pajampangi baji' ri Isa Almase, sara'de' lalang ripoong katappakanta na lalang riajarang naba numaeng mupinahang injo risikonni inni.

⁷ Mingka kadereilalo tula-tulaang gelena toje' turiolo inni. Ajarai kalemmu assambajang.

⁸ Pangajara ri batangkale injo rie' matu-matunna, mingka sambajang injo rie' matu-matunna lalang risikuanna passala, saba' ngimbolongi sapatta, baji' injo ritallasa konni-konnina iyareka ritallasa larie' injo sallo'.

⁹ Pau inni toje'i na pato'i ritarima ngase'.

¹⁰ Injomo saba'na ditte apparri-parri surang akkareso terasa, saba' annanroki pattajalliang mange ri Allataala attallasa injo, Pappakasalama'na sikuanna rupatau, kaminang poong mange ri iyai tutappa' injo.

¹¹ Pala'banglalo na pangajarangi iangase'na injo.

¹² Andarie' manna se're tau larapangko ki'di' kanara longko juapako. A'jarilaloko pinahangang mange risikuanna tau tappa', lalang ripappaumu, lalang ripanggeokammu, lalang ripangamaseammu, lalang rikamallangammu, surang lalang rikalambusammu.

¹³ La'bipa pole, sa'gengku rie' sabbarako lalang ripangajiang risikonjo Kitta' Tangkasa, riappakaterasa nyaha surang ngajara.

¹⁴ Akolalo takkaluppa laanggeokang kasara'dekang nurie' injo ri kau, numaeng ripassareang injo ri kau patteteang panjanjang surang pappatilompangang pala' limanna ri tutoa-toa injo.

¹⁵ Pariatilalo iangase'na injo, tallasako ri injo solanna kajanjangangi kasara'dekammu mange risikuanna tau.

¹⁶ Jagailalo kalemmu surang numupangajarang injo. Sabbarako ri iangase'na injo, saba' riappaanggeokang appakonjomu mupakasalama'i kalemmu surang sikuanna tau appilangngeri injo ri kau.