1 TIMOTIUS 3 - Kitta' Passitallikang Bau KAREBA BAJI'

Atorang mange ri panatua jamaah 3:1-7

¹ Toje'i pau inni, Tau lakaa'raki injo jama-jamaang panatua jamaah injo lakaa'raki jamaang nula'biri.

² Injomo saba'na, panatua jamaah parallui se're tau tide' daana, bura'ne battu rise're bahine, akkulle lakahasai kalenna, langai assare pamminsamboang, sara'de'i ngajara tau,

³ gelei painung, gele tupakkukukang mingka tungamaseang, appaa'damei, gele sanging doe' jua laboja,

⁴ se'rei amma baji' ri saponna, rikamallakangi surang rikangalikangi ri ana'-ana'na,

⁵ ampa rie' tau gele ngisse' a'jari amma lalang ri saponna, anteekamua ia akkulle lapasilolongang jamaah Allataala?

⁶ Andalalo ia se're tau bau a'jari tappa' ri Isa, solanna ia anda a'jari tampo na lataba hukkungang assimpole kajariang ri Ibilisi.

⁷ Sibaji'na ia rie' todo' areng baji'na pantarang jamaah, solanna ia gele lagagai tau na antama'i rijangona Ibilisi.

Atorang mange ri diakeng 3:8-13

⁸ Appakonjo todo'i sikonjo diakeng sibaji'na tau rikangalikang, gele tau appangka lilana, gele tau painung anggoro, gelei ngoa,

⁹ mingka tau a'bitantang jarre' ripangajarang nubattu ri Allataala surangang ri ati alusu nusi'nong injo.

¹⁰ Iyai injo parallui riparessa la'bi riolo, maempa injo ampai ritantuang lalang ripanjampangi ri maeng riissekinnamo tide' daana.

¹¹ Appakonjo todo'i sibaji'na bahinenna tau rikangalikang, gelei papitina, sibaji'na ia akkulle latahang kalenna na akkullei ripatappa' lalang risikuanna passala.

¹² Diakeng parallui tusikalijua akkalabini na lapassilolongang baji'i ana'-ana'na surang pakkalabinianna.

¹³ Saba' tuanjampangi injo languppai pattolongang baji' lalang rikatappakang mange ri Isa Almase iyai injo akkulle barani assare passa'bi.

Jamaah Allataala, poong surang panumpa kanabaang 3:14-16

¹⁴ Iangase'na injo kuukirii mange ri kau, manna injo kuminasai akkullea lassiri a'lingka-lingka mange ri kau.

¹⁵ Jari, ampa nakke ka'jala rie', injo muisse'mu anteekamua tau inni parallu attallasa a'jari bija pamanakang ri Allataala, iamo intu jamaah battu ri Allataala nuattallasa, panumpa' na poong kanabaang.

¹⁶ Sitoje'na sanna' bakka'na pangajarang nulapassareang injo Allataala mae riditte, ”Ia, tumaeng lapappisa'biang injo kalenNa lalang ri rupatau, ripa'nabai lalang ri Nyaha; tumaeng lapappijanjangang injo kalenNa mange risikonjo malaeka', ripala'bangi mange ri tau maraeng; turipatappa' lalang ri lino inni, riangka'i lalang rikala'birang.”