1 TIMOTIUS 2 - Kitta' Passitallikang Bau KAREBA BAJI'

Passala pangera dowaang 2:1-7

¹ Injomo saba'na, uru-uruna nakke appiu'rangi: Appabattulaloko pangera, dowaang surang appanai' sukkuru risikuanna tau,

² risikonjo karaeng surang risikonjo tukahasa, solanna akkulle sannang tallasa'ta na masagena lalang risikonjo katunrukang ri Allataala surang la'biri ri tau maraeng.

³ Injomo baji' na langai Allataala, Pappasalama'ta,

⁴ nulakaa'raki solanna iangase'na tau ripakasalama' surang nguppa pangisse' ripassala kareba baji' nubattu ri Allataala.

⁵ Saba' Allataala tide' ruana na tide' todo' ruana pajarumang ri Allataala na rupatau inni, iamo intu Isa Almase,

⁶ numaeng lapassareang injo kalenNa a'jari pallappasi mange risikuanna rupatau: Inni passa'bi rihattu ritantuang injo.

⁷ Ripassa'bi injomo nakke maeng ripattantu laa'jari pappala'bang surang suro – nukupau inni toje'i, nakke gelea a'bura-bura – na a'jari guru ri tau gele injo Yahudi, ripassala katappakang na nunaba.

Passala bura'ne na bahine lalang ripassambajanganna jamaah 2:8-15

⁸ Injomo saba'na, nakke a'ra'a, solanna ri antee-tee mae bura'ne injo ngera dowaang lalang appatara pala'lima tangkasa, gele rie' kuku' na gele rie' pa'beserang.

⁹ Appakonjo todo'i a'ra'na bahine inni. Sibaji'na ia makeang siratangi, baji'i na gelei alla'ju' andai laappi' uhu'na, andai make bulaeng iyareka muttiara iyareka pakeang ka'jala,

¹⁰ mingka sibaji'na ia makeangi, lalang ripanggeokang baji', assimpole nusiratang mange ri bahine assambajang.

¹¹ Parallulaloi bahine inni sannang na latarima baji'i pangajarang injo.

¹² Nakke gelei kupa'biang bahine inni langajara na gele todo'i kupa'biang lamarenta bura'ne; sibaji'na ia sannangi.

¹³ Saba' Adam tau kaminang riolomo ripaa'jari, maennapa injo ampamo Hawa.

¹⁴ Rie' pole, gele Adam riso'ri, mingka bahine injomo ribanja'-banja' na a'dappe'i antama' rikadorakaang.

¹⁵ Mingka bahine injo ripakasalama'i kanara mana'na ana', assala'na ia jarre' tappa'na surang ngamaseangi na lapaa'batu nyahana ri Allataala surangang tunai panggeokanna.