1 TIMOTIUS 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Paulus, suro ri Isa Almase assituru' parentana Allataala, Pappakasalama'ta, na battu ri Isa Almase, pattajallianta.

² Mange ri Timotius tukurapang injo ana' lalang rikatappakang: Barakka' pangamaseang, barakka' surang dame salehangang battu ri Allataala Amma surang ri Isa Almase, Karaengta, minahang ri kau.

Passala ajarang lingu 1:3-11

³ Rihattu a'ra'na kutarrusang pa'lingkaangku mange ri tana Makedonia, nakke maeng assuro ri kau solanna kau ammari ri Efesus na appiu'rangi mange risikuanna tau attantu, solanna iyai andai lapangajarang ajarang maraeng

⁴ iyareka gele sahe lalang ritula-tulaang na lontara bilang tide' injo tappu'na, nuappabattu passala tide' matu-matunna, na gele ta'ra tallasa kasalamakang nulapassareang injo Allataala lalang rikatappakang.

⁵ Pattujunna pappiu'rangi injo iamo pangamaseang nuammumba battu ri ati si'nong, battu ri nyaha alusu na battu rikatappakang lambusu injo.

⁶ Mingka rie' tau a'lili na tulingu lalang ripau tide' matu-matunna.

⁷ Iyai injo a'raki todo'i a'jari tulangajara hukkung Tora' na manna pauna gelei lapahang surang pappoongang nulapau injo gele todo'i laisse'.

⁸ Ditte riisse'i ma'nassana hukkung Tora' injo baji'i ampa nabai pakena,

⁹ iamo intu lalang ripangu'rangi ma'nassana hukkung Tora' injo gelei lamange jua ri tau naba inni, mingka ri tau kapere surang ri tau doraka na ri tau gele tunru', mange ri tau assipa' lino inni na ri tau tide' injo agamana, mange ri tau lahuno injo ammanna na idonna, mange ri tau pahuno-huno injo,

¹⁰ mange ri tau balere surang ri bura'ne assingai injo paranna bura'ne, mange ri palukka', mange ripabura-bura, mange ri tau attunra bura injo na sitarrusu'na iangase'na ajarang assisala injo riajarang baji'

¹¹ nuassituru' Injili battu ri Allataala nula'biri na ripakabakka', assimpole numaeng ripassareang injo mae ri nakke.

Kasukkurang saba' barakka'na Allataala 1:12-17

¹² Sukkurua mange ri Ia tuappakaterasa injo ri nakke, iamo intu Isa Almase, Karaengta, saba' Ia larapanga mallang na lapassareangi mae ri nakke laanjampangi mange ri Ia –

¹³ nakke nuriolo tau patadea surang tau pasissa-sissa na tau karrasa mingka maeng rikamaseang ri Ia, saba' iangase'na injo kugeokang gele rie' pangisse' iamo intu tide' katappakang.

¹⁴ La'bipa pole barakka' pangamaseang Karaengta injo maeng lapassareangi surangang lohena mae ri nakke lalang rikatappakang na pangamaseang lalang ri Isa Almase.

¹⁵ Pau inni nabai na pato'i ritarima ngase' Isa Almase rie'i antama' mae ri lino inni laappakasalama' tau doraka, ri iangase'na injo nakkemo kaminang doraka.

¹⁶ Mingka rikanara appakonjonamo nakke rikamaseang, solanna lalang ri kalengku inni, assimpole tau kaminang doraka, Isa Almase lapappijanjangangi sikonjo kasabbaranNa. Ri appakonjona, nakke a'jaria pinahangang mange ri iyai tulatappa' injo mange ri Ia na languppai tallasa mannannungang.

¹⁷ Somba surang kala'birang sa'genna situlusu'na mange ri Karaeng tide' injo sangganna, Allataala mannannungang, nugele injo kajanjangang surang nutide' ruana! Aming.

Jama-jamaanna Timotius 1:18-20

¹⁸ Jama-jamaang inni kupassareangi mange ri kau, Timotius ana'ku, assituru' lalang riapa numaeng ripappijanjangang injo mae ri nakke passala ri kalemmu, solanna patteteang ripanjanjang injo akkulleko apparri-parri ripapparri-parriang nubaji' patteteang ri kareba baji' battu ri Allataala surangang ri ati si'nong.

¹⁹ Rie'mo sikura tau maeng latolla'i ati alusu nusi'nong injo, na kanara injo tassengke'mu katappakanna,

²⁰ sala se'renna ri iyai injo Himeneus surang Aleksander, tumaeng kupassareang injomo mange ri Ibilisi, solanna ammono' ngase'i attadea.