1 TESALONIKA 5 - Kitta' Passitallikang Bau KAREBA BAJI'

A'jaga-jaga 5:1-11

¹ Mingka passala hattu kajarinna, Urang siana', gelejuai parallu riukiri mange ri kaui,

² saba' muisseki toje'mu ma'nassana hattunna Karaeng larie'i assimpole palukka' ribangngina.

³ Ampa rie' lapaui: Dame surang amangi sikuanna – injo iyai gelei lasanna-sanna latabai kapanrakang, assimpole se're bahine tianang lataba pa'risi pamana' – iyai tantu gelena akkulle lappasa.

⁴ Mingka kau, Urang siana', geleiko attallasa lalang rikalammang, sa'genna hattu injo gele musanna-sanna narie'i mange ri kau assimpole palukka',

⁵ kanara kaui ngase' intu ana'-ana' sinara na ana'-ana' allo. Ditte geleki tau bangngi iyareka tau lalang rikalammang.

⁶ Injomo saba'na baji'mu andaki tinro assimpole tau maraeng, mingka a'jaga-jagaki surang ngu'rangiki.

⁷ Saba' iyai tutinro injo, tinroi rihattu bangngina na iyai tuhuja injo, hujai rihattu bangngina.

⁸ Mingka ditte, tau allo inni, baji'mu ngu'rangiki, pakei pakeang pa'bundu' katappakang surang pangamaseang, na attopi baja' pattajalliang rikasalamakang.

⁹ Saba' Allataala geleki latantuang lalataba pangukuki ri Allataala, mingka languppa kasalamakang patteteang ri Isa Almase, Karaengta,

¹⁰ tumaeng injomo mate tujunta, solanna baji' injo a'jaga-jagaki, baji' injo tinroki, injo ditte attallasaki assurang-surang Ia.

¹¹ Injomo saba'na assipiu'rangilaloko na assipakaterasako assimpole numugeokang toje' injomo.

Pappiu'rangi 5:12-22

¹² Taerai ri kau, Urang siana', solanna kau appakala'biri mange ri iyai tuakkareso terasa injo ritangnga-tangngamu, turipile injo ri Karaeng na laappisangka ri kau;

¹³ na solanna kau ngali' toje' mange ri iyai lalang ripangamaseang kanara jama-jamaanna. Tulusu tallasalaloko lalang ridame salehangang surangang tau maraeng.

¹⁴ Kambe appiu'rangi todo'kang ri kau, Urang siana', pisangkaii tugele injo baji' ta'ra tallasa'na, lengung-lengungilaloi tau la'ba injo nyahana, urangangi tau lamma injo, sabbaralaloko mange risikuanna tau.

¹⁵ Pariatilalo, solanna anda rie' tau a'balasa daa surangang daa todo', mingka karesoi sanging nubaji', mange ri kaui tasse're-se're na mange risikuanna tau.

¹⁶ Sanging rannuilaloko.

¹⁷ Tulusu ngera dowaangiko.

¹⁸ Panai'i sukkuru lalang risikuanna passala, saba' iamo injo lakaa'raki Allataala lalang ri Isa Almase mange ri kaui.

¹⁹ Akolalo ampang-ampangi jama-jamaanna Nyaha Tangkasa injo,

²⁰ na akolalo rapangi tuna sikonjo panjanjang ri allo riboko.

²¹ Paressalaloi iangase'na na bitantangilaloi nubaji' inni.

²² Pakaderei kalemmu battu risikonjo rupanna sipa' daa.

Sallang pappikatu 5:23-28

²³ Bisannabali Allataala dame salehangang appakatangkasa ri kau ngase' na bisannabali Nyaha, harasia surang batangkalemmu takkatuho baji' tide' daana rihattu pariekanna Isa Almase, Karaengta.

²⁴ Ia tuakkeo' injo ri kau iamo mallang, Ia todo' lalapa'rupai.

²⁵ Urang siana' pangera dowaangikang.

²⁶ Pabattulaloi sallamba mange risikonjo urang siana' julu katappakang lalang ri passikamaseangang.

²⁷ Pasabakang areng Karaeng nakke sanna' pangeraku mange ri kaui, solanna sura' inni riaji mange risikonjo urang siana' julu katappakang.

²⁸ Barakka' pangamaseang ri Isa Almase, Karaengta, minahang ri kau!