1 TESALONIKA 4 - Kitta' Passitallikang Bau KAREBA BAJI'

Pappiu'rangi solanna tallasa tangkasa 4:1-12

¹ Kala'busanna, Urang siana', taerai na appiu'rangikang mange ri kaui lalang ri Karaeng Isa: Maeng mulangngeremu battu ri kambe anteekamua kau sibaji'na tallasa solanna langai Allataala. Passala injo maeng muturuki toje'mu, mingka baji'mu ampa mupassukku'i pole mugeokanna.

² Muisseki todo'mu pappijo'jo' anteeang maeng tapassareang mange ri kaui lalang ri arenna Karaeng Isa.

³ Saba' iamo inni nulakaa'raki Allataala: Pakabaji' tallasa'mu ri Allataala, iamo intu kaderei kabalerang inni.

⁴ Sibaji'na kau parallu para ngalle se're bahine a'jari bahinemmu na tallasa siratang ri a'rakanna Allataala surang la'biri ri a'rakanna rupatau,

⁵ gele lalang a'ra' hawa napasu, assimpole nulageokang sikonjo bangsa gele injo tappa' ri Allataala,

⁶ na solanna lalang ripassala inni, andai appa'rugi mange ri urang siana' julu katappammu iyareka lakelo-keloi. Saba' Karaengmo laassare hukkungang mange tau a'geo' apakonjo, assimpole numaeng tapau surang nutapassuroang injo riolo mange ri kaui.

⁷ Allataala akkeo' ri kau gele laanggeokang nurammasa, mingka nutangkasa.

⁸ Injomo saba'na, inai latolla'i inni injo gelemo rupatau latolla', mingka Allataala latolla' numaeng lapassareang injo todo' Nyaha Tangkasa'Na mange ri kaui.

⁹ Passala passikamaseang ri urang siana' gelejuai parallu riukiri mange ri kaui, kanara maemmoko appilajara assikamaseang battu ri Allataala.

¹⁰ Passala injo mugeokang todo'i mange risikonjo urang siana' risibatu tana Makedonia. Mingka kambe appiu'rangi ri kau, Urang siana', solanna la'bi mupassukku'i pole mugeokanna.

¹¹ Na rapangi assimpole se're kala'birang laattallasa sannang, laappassilolongang sikonjo passala na anjama kale-kale, assimpole numaeng tapappasangang injo mange ri kaui,

¹² sa'genna kau tallasa assimpole tau lumu nyaha ri a'rakang matanna tau maraeng na gele anrannuang mange ri iyai.

Pariekanna Karaeng 4:13-18

¹³ Rikala'busanna, Urang siana' gelei takaa'raki ma'nassana kau gele muisse' passala iyai tumate injomo, solanna andai pa'risi assimpole tau maraeng nutide' injo pattajallianna.

¹⁴ Saba' ampa tappa'ki ma'nassana Isa maeng matemu na maemmu attallasa muliang, injo ditte tappa' todo'ki ma'nassana patteteang ri Isa, Allataala lalaparappungki surangang Isa, iyai tumaeng injomo mate laammari surangang Ia.

¹⁵ Passala inni tapaui ri kau assimpole pangajara battu ri Karaeng: Ditte tuattallasa inni, tuammari injo juapa ri lino inni sa'genna larapi' pariekanna Karaeng, gele sikalii laripilombai iyai tumaeng mate injomo.

¹⁶ Saba' rihattunna parenta injo ripassareang, rihattunna ponggaha malaeka' appau bakka' na timboe'na Allataala assa'ra, jari kalennamo Karaeng lanaung battu ri suruga na iyai tumate tappa' injo ri Almase lala'bi riolo attallasa muliang;

¹⁷ maempa injo, ditte tau attallasa inni, tuammari injo juapa ri lino inni, lariangka' assurang-surang iyai lalang rirammang laanruppai Karaeng ri langi'. Ri appakonjonamo ditte lasitulusu'na assurang-surang Karaeng.

¹⁸ Injomo saba'na, lengung-lengunglaloi tau maraeng intu lalang ri pau inni.