1 TESALONIKA 3 - Kitta' Passitallikang Bau KAREBA BAJI'

Kareba baji' nulaerang Timotius 3:1-13

¹ Pa'bojaimba ri kau gelemu akkulle tatahang, injomo saba'na ngallekang katappukang laammari kale-kale ri Atena.

² Jari tasuroi Timotius urang siana' julu katappakanta surang urang sipanjamaang ri Allataala lalang ripappala'bangang Injili'na Almase, laappakaterasa ri nyahamu na laappakajarre' ri kau passala rikatappakammu,

³ solanna anda rie' tau bata-bata tappa'na passabakang lohena kasukkarang appakonni. Muisseki ngase' todo'mu ma'nassana ditte ritantuangki laappakonjo.

⁴ Saba', kambe rihattu assurang-surangta todo', maemmu tapau mange ri kaui ma'nassana ditte languppa kasukkarang. Assimpole numuisse' injo, passala injo maemmu a'jari.

⁵ Iamo injo saba'na, rihattunna gelemu akkullei ritahangang, nakke assuro mange ri ia, solanna nakke akkullei kuisse' passala katappakammu, saba' nakke bata-bata barangsikali kau maeng riso'ri ripanbanja'-banja' surang barangsikali kareso ri kambe tide'jua matu-matunna.

⁶ Mingka konni-konnina, sungka'i Timotius rie' muliang battu ri kau na ngerangi kareba appakarannu passala rikatappakammu surang pangamaseammu, na ma'nassana kau sanging muu'rangi kabajikang ri kambe na sanging a'ra' assijanjang surangang kambe, assimpole todo' kambe a'ra' assijanjang surangang kau,

⁷ jari kambe todo' urang siana', lalang risikonjo kasusaang surang kasukkarang a'jari ripakaterasa ri kau na rikatappakammu.

⁸ Konni-konnina kambe tallasakang muliang, ritaisse'na ma'nassana ammenteng sa'gaki juako ri Karaeng.

⁹ Saba' pappanai' sukkuru apamo akkulle tapassareang mange ri Allataala saba' lohena karannuang, nutauppa injo rikanara kau, ri a'rakanna Allataalata?

¹⁰ Allo bangngimu kambe ngera dowaang lalang rikatojekang, solanna kambe akkulle assijanjang rupa na langgannaki nukurang injo juapa rikatappakammu.

¹¹ Bisannabali Ia, Allataala surang Ammanta, na Isa, Karaengta, ambungkara mae ri kambe lalang mange ri kaui.

¹² Bisannabali Karaeng lapaa'jariko attamba lohe na kala'bi-la'biang lalang ripangamaseang mange risikuanna tau maraeng, assimpole kambe todo' ngamaseang ri kau.

¹³ Bisannabali Ia lapakaterasa atimu, solanna tide' nudaa surang tangkasa, ri a'rakanna Allataala na Ammanta rihattu pariekanna Isa, Karaengta, surangang sikuanna tau tappa'Na.