1 TESALONIKA 2 - Kitta' Passitallikang Bau KAREBA BAJI'

Panjampanginna Paulus ri Tesalonika 2:1-12

¹ Manna kau pole toje' muisse'na, Urang siana' ma'nassana pariekamba ritangnga-tangngamu gelei tide' matu-matunna.

² Mingka manna injo kambe riolo, assimpole numuisse' injo, maeng ripa'ri'-pa'risi surang ritua-tuai ri Filipi, mingka lalang ripattulungang battu ri Allataala Karaengta, injo kambe nguppakang kabaraniang laappala'bang Injili mange ri kaui lalang rikareso terasa.

³ Saba' pappiu'rangimba gele nubattu ripappalingu iyareka nubattu ri ati gele lambusu surang lapinahang todo'i bura-bura.

⁴ Sibale'na, passabakang Allataala maeng larapangkang siratang sa'genna Ia lapassareangi Injili mae ri kambe, jari a'bisarakang, gele laappakasannang rupatau, mingka laappakasannang Allataala assare injo passo'ri mae ri atita.

⁵ Saba' assimpole numuisse' injo, gelekang minang appau nubura, gelekang minang ngampunnai ateka' ngowa nutassa'bu – Allataalamo sa'bi ri kambe.

⁶ Kambe gele todo'kang minang a'boja pappakala'biri battu ri rupatau. Baji' injo ri kau, iyareka battu ri tau maraeng, manna injo kambe akkullekang a'bua' appakonjo assimpole suro-suro ri Almase.

⁷ Mingka kambe appau lumu ri kau, assimpole se're indo lakatuho surang lakahaki ana'na.

⁸ Appakonjomu kambe, lalang ripangamaseang bakka' mange ri kaui, gele sangga rella jua a'dahu-dahu Injili Allataala mange ri kaui, mingka tallasa'ba pole mange ri kaui, saba' maeng takamaseangiko.

⁹ Saba' muu'rangi juapai, Urang siana', kareso surang panjama terasa'ba riolo. Allo bangngikang anjama, solanna gelei a'jari pamberaki mange ri kaui, rihattunna kambe appala'bang Injili Allataala mange ri kaui.

¹⁰ Kaumo surang Allataala a'jari sa'bi ri kambe, appaanteekamua lumu nyahaba assambajang, adele surang gele rie' daana panggeokamba mange ri kaui tutappa' intu.

¹¹ Muisseki ngase'i, anteekamua kambe, assimpole amma mange ri ana'-ana'na, maeng assare pappiu'rangi surang appakaterasa nyaha rise're tau passabakang rise're tau maraeng,

¹² na sanna' taerana, solanna kau tallasa assituru' ria'ra' Allataala, tuakkeo' injo ri kau antama' ri Pakkaraengang surang kala'biranNa.

Karannuang kanara jamaah 2:13-20

¹³ Injomo saba'na gele todo'kang minang ammari-mari appanai' sukkuru mange ri Allataala, saba' maeng mutarimana pauna Allataala nutapala'bang injo, gelei assimpole pau rupatau, mingka assimpolei pau Allataala, injo todo'mo anjama ri kau tutappa' intu.

¹⁴ Saba' kau, Urang siana', maeng mupinahammu kabajikanna sikonjo jamaah Allataala nurie' injo ri Yudea, iamo intu jamaah anunna Isa Almase. Saba' maengi todo'ko marasai battu ribaha'-bahaang julu bangsamu, assimpole jamaah ri Yudea marasai battu risikuanna tau Yahudi.

¹⁵ La'bipa pole tau Yahudi injo maemmu lahuno Karaeng Isa surang sikonjo nabbi na maeng lasissa todo'kang. Apa nubaji' mange ri Allataala gelei lapaduli na lakalikkingangi paranna rupatau,

¹⁶ saba' iyai injo a'ra'i ngampang-ngampang ri kambe laappala'bang pauna Allataala mange risikuanna tau maraeng tuju kasalamakanna. Appakonjomu iyai tarru'-tarrusu latambai kadorakaannai sa'genna ganna' jumallana na konni-konnina pangukukinna Allataala maeng latabai ngase'mu.

¹⁷ Mingka kambe, Urang siana', nusinampe' jua assisa'la' battu ri kau, derei battu ri mata, mingka gelei dere ri nyahaba, sanna' pa'bojaimba, natoje'i maeng taparri-parri laassijanjang rupa surangang kau.

¹⁸ Saba' maeng tania'kammu labattu mange ri kaui – nakke, Paulus, gele lapinsikali jua –, mingka Ibilisi maeng ngampang-ngampangi ri kambe.

¹⁹ Saba' inai pattajalliamba iyareka karannuamba iyareka tutabangga-banggaang injo ri a'rakanna Isa, Karaengta, rihattu pariekanNa, ampa gele kaui?

²⁰ Toje'i, kaumo kala'birang ri kambe surang karannuang ri kambe.