1 TESALONIKA 1 - Kitta' Passitallikang Bau KAREBA BAJI'

Barasallang 1:1

¹ Battu ri Paulus, Silwanus surang Timotius. Mange ri urang siana' jamaah ri Tesalonika anunna Allataala Amma na Karaeng Isa Almase. Barakka' pangamaseang na dame salehangang minahang ri kau.

Hassele pappala'banganna Paulus 1:2-10

² Kambe sanging pasukkuru mange ri Allataala kanara kau ngase' na ripau-paui lalang ripangera dowaamba.

³ Saba' kambe sanging pangu'rangi rijama-jamaang katappakammu, kareso pangamaseammu na rikasabbarang pattajalliammu mange ri Karaengta Isa Almase ri a'rakanna Allataala na Ammanta.

⁴ Na taisse'i, Urang siana' mala'biri ri Allataala ma'nassana Ia maeng mile ri kau.

⁵ Saba' Injili nutapala'bang injo gelei ripabattu mange ri kaui sangga ripau jua, mingka pole surangang katerasang ri Nyaha Tangkasa na surangang se're katappakang jarre'. Toje'i muissekinna, anteekamua kambe anjama ritangnga-tangngamu rikanara kau.

⁶ Na kau minahang ripanggeokamba surang ripanggeokanna Karaeng; lalang ripassissa bakka' injo kau maeng narima pau Allataala lalang rikarannuang nulajama injo Nyaha Tangkasa,

⁷ sa'genna kau maeng a'jari pinahangang mange risikuanna tau tappa' ribageang Makedonia surang Akhaya.

⁸ Saba' battu ri kaumo pauna Karaeng alla'bang mange-mange gele sangga ri Makedonia surang ri Akhaya jua, mingka risikonjo tampa' maeng alla'bammu kareba passala katappammu mange ri Allataala, sa'genna kambe gelemu parallu tapau passala injo.

⁹ Saba' iyai to'juamo allagara passala ri kambe, anteekamua panruppaimmu mae ri kambe na anteekamua kau a'giling battu risikonjo somba-sombaang mange ri Allataala laanjampangi Allataala attallasa surang nutoje' injo,

¹⁰ na attajang pariekanna Ana'Na battu ri suruga, numaeng lapakaattallasa injo muliang Allataala battu ritangnga-tangngana tau mate, iamo intu Isa, tuappakasalama' injo ri ditte battu rikuku'na Allataalla nularie' injo sallo'.