1 PETRUS 5 - Kitta' Passitallikang Bau KAREBA BAJI'

Kalahaki bakkalang jimbala'na Allataala 5:1-11

¹ Nakke appaiu'rangi mange risikonjo tutoa-toa ri kau, nakke todo' uranna tutoa-toa injo surang sa'bi kasissaanna Almase, ri tunguppa injo todo' dahuang lalang ri kala'birang nularipappijanjangang injo sallo'.

² Kalahakilaloi bakkalang jimbala'na Allataala nurie' injo ri kau, anda kanara passaang, mingka kanara karellaang assituru' ria'ra'na Allataala, na anda kanara laa'boja pasahalang, mingka assituru' ripa'bisonaang nyaha.

³ Andalaloko anggeokang assimpole kalena kau marenta ri iyai turipassareang injo mange ri kau, mingka sibaji'na kau a'jari pinahangang ribakkalanna jimbala injo.

⁴ Ampa rie'mu Pakalahaki toje' injo, injo kau lanarima songko' kala'birang nugelemo akkulle panra'.

⁵ Appakonjo todo'i, oe kau taruna intu, tunru'laloko mange risikuanna tau toa. Na kau ngase', pakatunalalo kalemmu battu rise're tau mange ri tau maraeng, saba': ”Allataala labaliangi tau tampo intu, mingka assarei barakka' pangamaseang mange ri tau tuna injo atina.”

⁶ Injomo saba'na, pakatunalalo kalemmu rirahangang limanna Karaeng nugassing injo, solanna kau ripakala'biri ri Ia rihattunna.

⁷ Passareanglalo sikonjo bata-batamu mange ri Ia, saba' Ia lakatuhoko!

⁸ Ngu'rangilaloko surang akkaletutuiko! Balimmu, Ibilisi a'lingka mange-mange assimpole masang a'ngaong-ngaong na a'bojai tau akkulle injo lakanre.

⁹ Balianglalo ia surangang katappakang jarre', saba' muisse'i ma'nassana sikonjo urang siana' julu katappakammu ri sibatu lino nguppa todo'i kasissaang assimpole.

¹⁰ Na Allataala, poong riiangase'na barakka' pangamaseang, tumaeng akkeo' injo ri kau lalang ri Almase mange rikala'biranNa nutide' injo la'busu'na, laappakasangka', laappakajarre', laappakagassing surang laappakasa'ga' ri kau, rimaemmumo sissa sinampe'.

¹¹ Iamo ampunna kahasa sa'genna situli-tulinna! Aming.

Sallang Pappikatu 5:12-14

¹² Ri patteteang Silwanus nukurapang injo assimpole se're urang siana' julu katappakang nuakkulle ripatappa', nakke ngukiri sura' bo'do' inni mange ri kau laappiu'rangi na laappakajarre' ri kau ma'nassana iamo inni barakka' pangamaseang toje' battu ri Allataala. Ammenteng kajangko ri injo!

¹³ Sallang mange ri kau ngase' battu ribahaammu turipile injo ri Babel na battu todo' ri Markus, tau longko' injo juapa na tulusu assarei pattulungang mae ri nakke.

¹⁴ Sarelalo barasallang se're tau mange ri tau maraeng surangang panghau pangamaseang. Dame salehangang minahang ri kau ngase' turie' injo lalang ri Almase. Aming.