1 PETRUS 4 - Kitta' Passitallikang Bau KAREBA BAJI'

¹ Jari, kanara Almase maeng sissa batangkale, kau pole parallu todo' mupakasadia kalemmu surangang pikkirang appakonjo. Inaimo maeng risissa batangkalenna, ia ammono'mu anggeokang kadorakaang.

² Injomo saba'na, hattu rie' inni juapa andalaloko pakei assituru' a'ra'na rupatau inni, mingka assituru' a'ra'na Allataala.

³ Saba' sanna'mo lohena hattu mupake laanggeokang apa nulangai lageokang sikuanna tau maraeng gele injo laisse' Allataala. Maemmoko tallasa lalang rilohe rupanna napasu daa, sikonjo a'ra' rupatau, a'huja-huja, a'roa'-roa', nginung-nginung surang nyomba barahala nugele injo ripakkulleang.

⁴ Injomo saba'na, lannasa ngase'i ma'nassana kau gele minahang mupaantama' kalemmu assurang-surang iyai lalang ri pattombangang gele injo siratang nuassimpole na iyai appitina ri kau.

⁵ Mingka iyai injo parallui assare pappihali mange ri Ia tumaeng tulusu sadia injomo langadeli tau attallasa surang tau mate.

⁶ Iamo injo saba'na, Injili maeng ripala'bang todo'i mange risikuanna tau mate, solanna assimpole sikuanna rupatau, iyai injo lariadelii lalang ri batangkale. Mingka kanara ri nyaha iyai injo akkullei attallasa assituru' a'ra'na Allataala.

Tallasa'na tau Karisteng 4:7-11

⁷ Gelemu sallo nakala'busangi ri iangase'na, injomo saba'na, kahasai kalemmu na a'jaga-jagalaloko, solanna akkulleko ngera dowaang.

⁸ Mingka numakasere: Passukku'i pangamaseammu ri tau maraeng, saba' pangamaseang intu sanna' lohe kadorakaang latongko'.

⁹ Sarei pamminsamboang tau maraeng intu na anda rie' moro-moro.

¹⁰ Assijampa'-jampangiko, assituru' ridalle' numaeng ripassareang injo mange risikuanna tau. Parallui mupattuju baji' barakka'na Allataala.

¹¹ Ampa rie' tau a'bisara, baji'mu ia a'bisara assimpole tau appabattu pau Allataala; ampa rie' tau anjampangi, baji'mu ia lageokangi lalang rikaterasang nulapassareang injo Allataala, solanna Allataala ripakala'biri lalang risikuanna passabakang ri Isa Almase. Iamo ampunna kala'birang surang kahasa sa'genna situli-tulinna! Aming.

Assinsara kanara a'jari Karisteng 4:12-19

¹² Urang siana' mala'biri'ku ngase', akolalo lannasa ribola' api sissaang nularie' injo mange ri kau laa'jari passo'ri, assimpolekalena rie' se're numara'-maraeng kajariang ri kau.

¹³ Sibale'na, a'rannu-rannuilaloko, assituru' ridahuang muuppa injo lalang rikasissaanna Almase, solanna nguppai todo'ko karannuang surang kate'neang rihattunna Ia lapappisa'biang kala'biranNa.

¹⁴ Sunggulaloko, ampa ritua-tuaiko kanara arenna Almase, saba' Nyaha kala'birang, iamo intu Nyahana Allataala rie'i ri kau.

¹⁵ Andalalo rie' ri kau parallu lasissa assimpole pahuno tau iyareka palukka' iyareka tudaa sipa'na, iyareka tua'bua' pa'bi'naang.

¹⁶ Mingka, ampa ia sissa kanara a'jari Karistengi, injo andalalomu siri', mingka sibaji'na ia appakala'biri Allataala lalang ri arenna Almase.

¹⁷ Saba' konni-konnina maeng larapi'mu hattunna pangadelang injo ripakaramula battu ri saponna Allataala. Ampa pangadelang injo ripakaramula mae riditte, anteekamua kala'busanna ri iyai tugele injo tappa' ri Injili'na Allataala?

¹⁸ Ampa tau naba inni sukkarai ripakasalama', apamo lakajariang ri tau gele injo naba surang tau doraka injo?

¹⁹ Injomo saba'na, baji' todo'mu ampa iyai tuparallu injo lasissa kanara ria'ra'na Allataala, lapassareang nyahanai mange ri Ia Tumallang na Tuappaa'jari injo ri iyai, na tulusu anggeokangi nubaji'.