1 PETRUS 3 - Kitta' Passitallikang Bau KAREBA BAJI'

Tallasa sikalabini 3:1-7

¹ Appakonjo todo'i kau, oe bahine intu, tunru'laloko mange ri bura'nemmu, solanna ampa rie' ri iyai tugele tunru' mange ri Pau, iyai injo akkullei a'jari tappa' mange ri Allataala. Ripakangu'rangii kanara ripanggeokang bahinenna, nagele juako parallu appau-pau mange riyai,

² ampa iyai lajanjangi anteekamua si'nonna surang tunru'na tallasa bahinenna.

³ Kaballoammu andai nukajanjangang injo jua, assimpole ngappi'-ngappi' uhu', make lohe bulaeng iyareka pakeang ballo.

⁴ Mingka kaballoammu iamo intu rupatau bateng nutassa'bu surangang kaballoang nugele lapanra'. Kaballoang inni assala'na nubattu ri nyaha pa'mai' baji' na ngerangi kasannangang, nasanna' langkasa anggaranna ri a'rakanna Allataala.

⁵ Saba' appakonjomu ta'ranna sikonjo bahine tappa' inni riolo laparakai kalenna, iamo intu bahine lataro injo pattajallianna mange ri Allataala; iyai injo tunru'i mange ri bura'nenna,

⁶ assimpole Sara tunru'i mange ri Abraham na laare'i karaengna. Kau intu ana'-ana'na, ampa kau anggeokang nubaji' na gele malla' ripanggaratta'.

⁷ Appakonjo todo'i kau, oe bura'ne intu, tallasa baji'laloko mange ri bahinemmu, assimpole tau la'bi lamma! Ngali'ko ri iyai assimpole urang tulanguppa dahuang battu ribarakka' pangamaseang, iamo intu katallasang, solanna pangera dowaammu gelei kaampangang.

Pangamaseang surang dame 3:8-12

⁸ Kala'busanna, parallulalo kau ngase' intu a'julu pau, assikatutui nyaha, ngamaseang risikonjo urang siana' julu katappakang, a'rikodong na tuna ati,

⁹ na akolalo a'balasa daa surang nudaa, iyareka pau daa surangang pau daa. Mingka sibale'na, sibaji'na kau ambarakkaki, saba' iamo injo tujunna kau rikeo', iamo intu languppa barakka'. Saba':

¹⁰ ”Inai a'ra' lakamaseang tallasa'na na a'ra'i anjanjang allo baji', ia parallui lajaga lilana mange risikonjo nudaa na babana mange risikonjo pau bura-bura.

¹¹ Ia parallui lakaderei nudaa inni na anggeokangi nubaji', ia parallui a'boja passidameang na laparri-parrii lapiuppai.

¹² Saba' matanna Karaeng a'ma'ra' mangei risikuanna tau naba, na tolinNa mange ripangeranai tungera tulung injo, mingka tappana Karaeng labaliangi sikuanna tau anggeokang nudaa.”

Assinsara lalang rikasabbarang 3:13–4:6

¹³ Rie' pole, inaimo laanggeokang nudaa mange ri kau, ampa sanging nubaji' mugeokang?

¹⁴ Mingka manna injo kau parallu todo' lasissa kanara kanabaang, languppako kasungguang. Injomo saba'na akolalomo kamallakangi apa nulakamallakangi injo na akolalo bentere.

¹⁵ Mingka pakatangkasalalo Almase lalang ri atimu a'jari Karaeng! Na tulusu sadiako laassare pappihali mange risikuanna tau akkuta'nang injo mange ri kau ripassala pattajalliang nurie' injo ri kau. Mingka parallui mupihalii lalang rikalumuang nyaha surang ngali',

¹⁶ na lalang ri ati alusu si'nong injo, solanna iyai, tuappitina injo ri kau kanara panggeokang baji'mu lalang ri Allataala, a'jarimu siri' malongko' kanara pappitinana.

¹⁷ Saba' la'bi baji'i ampa lakaa'raki Allataala kau intu sissa kanara anggeokang nubaji', na larisissa kanara anggeokang nudaa.

¹⁸ Saba' Almase maeng todo'mu mate sikali kanara kadorakaanta, Ia tunaba tujunna tau gele injo naba, solanna Ia laerangki mange ri Allataala; Ia, tumaeng rihuno injo lalang rikatallasanNa assimpole rupatau, mingka maeng ripakaattallasai muliang lalang ri Nyaha Tangkasa.

¹⁹ Na lalang ri Nyaha Tangkasa injo todo'mo Ia a'lampa appala'bang Injili mange risikonjo nyaha tattarungku injo,

²⁰ iamo intu mange risikonjo nyahanai tau gele injopa tappa' mange ri Allataala rijammanna Nuhung. Rihattu injo Allataala sabbarai attajang ri Nuhung lapakasadia lopinna. Ri injo siso'di' jua, turipakasalama' battu ri a'ba bakka', iamo intu karua tau.

²¹ Konni-konnina kau ripakasalama' todo'ko ri ja'banganna, iamo intu panrio. Pattujunna gele laappakatangkasa karammasang rinukajanjangang injo jua, mingka laripangeraangi ati si'nong mange ri Allataala. Panrio injomo lapakasalama'ko patteteang riattallasa'na muliang Isa Almase,

²² tuattolong injo risa'ri kananna Allataala. Sungka'na Ia nai' ri suruga rimaenna sikonjo malaeka', kahasa surang kagassingang ripatunru' mange ri Ia.