1 PETRUS 2 - Kitta' Passitallikang Bau KAREBA BAJI'

Isa Almase batu possi' 2:1-10

¹ Injomo saba'na, pela'i sikonjo sipa' daa, sikonjo panipu, na sikonjo rupanna bura-bura, siriati surang pitina.

² A'jari assimpole ana' lolo ampa injo rilassukang, nusanging tirere injo a'ra' nginung ere susu si'nong na nuappakasa'ga' nyaha. Ri appakonjona passabakang ri iamo injo kau akkulle a'bakka' na nguppa kasalamakang,

³ saba' toje'i maemmu mupisa'ringi kabajikanna Karaeng.

⁴ Ambattuimoko mange ri Ia, ri batu attallasa injo, numaeng ripela' ri rupatau, mingka ripile na rikangalikangi ri a'rakanna Allataala.

⁵ Konjomu kau todo' ripake assimpole batu attallasa ripappaentengang sapo laappakasa'ga' nyaha. Ri appakonjona kau laanggeokang rijama-jamaang imang tangkasa, langerang pappassidakka appakasa'ga' nyaha nukanara Isa Almase a'jari ringai ri Allataala.

⁶ Saba' rie' ta'ukiri lalang ri Kitta' Tangkasa: ”Sitoje'na, Nakke maeng naro ri Sion se're batu, se're batu possi' nuripile na nuka'jala, na inai tappa' mange ri Ia, gelei ripakasiri'.”

⁷ Injomo saba'na, mange ri kau, Ia ka'jalai, mingka mange ri iyai tugele injo tappa': ”Batu maeng ripela' injo ri tukang batu, maeng a'jarimu batu possi', a'jari todo'i batu pangali-ngali na se'rei batu patatto'roang.”

⁸ Iyai tatto'roi mange ri Ia, kanara geleinna a'ra' tunru' mange ri pauna Allataala; na iyai maeng todo'i ritantuang laappakonjo.

⁹ Mingka kaumo tau maeng ripile, imang laanjampangi karaeng, tau tappa', umma' kalenna Allataala, solanna kau appala'bang sikonjo panggeokang bakka' battu ri Ia tumaeng lakeo' injoko ansulu' battu rikalammang mange risinara'Na nugele injo laambang naha-naha:

¹⁰ Kau, turiolo gele umma' Allataala, mingka konni-konnina maeng a'jarimo umma'Na, nuriolo gele rikamaseang mingka konni-konnina maeng nguppamo pangamaseang.

Pappiu'rangi laattallasa assimpole ata ri Allataala 2:11-17

¹¹ Urang siana' mala'biri'ku, nakke appiu'rangi ri kau, solanna assimpole tau battu-battu na tau mange'-mangeang, pakaderei kalemmu battu risikonjo a'ra'na lino inni nutulusu a'bali injo ri bateng.

¹² Pakei tallasa baji' inni ritangnga-tangngana sikuanna tau gele injo tappa' ri Allataala, solanna ampa iyai injo appitina ri kau assimpole tau anggeokang nudaa, injo iyai akkullei lajanjang sikonjo panggeokang baji'mu na appakala'birii Allataala rihattunnamo Ia ambattu mange ri iyai.

¹³ Kanara ri Karaeng, tunru'laloko mange ri sikuanna tau rie' kahasana, baji' mange ri karaeng assimpole tuneteng kakahasaang kaminang bakka',

¹⁴ iyareka mange risikonjo tukahasa risuro injo ri karaeng laassare hukkungang mange risikuanna tau a'geo' daa na ngali'i mange risikuanna tau a'geo' baji'.

¹⁵ Saba' iamo inni a'ra'na Allataala, iamo intu solanna lalang ri geo' baji' mujempangi akkala daana sikuanna tau ba'ga.

¹⁶ Tallasalaloko assimpole tau laloasa na gele assimpole tau lageokang sala injo kalaloasaang inni nalatongko'-tongko'i sikonjo geo' daana, mingka tallasalaloko assimpole ata ri Allataala.

¹⁷ Ngali'laloko mange risikuanna tau, kamaseangi sikonjo urang siana' julu katappakammu, malla'laloko mange ri Allataala, ngali'ko mange ri karaeng!

Kasissaanna Almase a'jari pinahangang 2:18-25

¹⁸ Oe kau, ata intu, tunru'laloko lalang rikamallakang mange ri tau lapajama injoko, gele sangga mange ri tau baji' na lumu nyaha injo jua, mingka mange pole ri tau gagarang injo.

¹⁹ Saba' se'rei barakka' pangamaseang ampa se're inni tau kanara laisse'na a'ra' Allataala naparallui nanggong kasissaang nusitoje'na gele ia parallu lananggong.

²⁰ Akkulle juaika riare' se're kaporeang, ampa sissako ripanjaguru kanara a'bua'mu kadorakang? Mingka ampa nubaji' mugeokangi na kanara injo paralluko sissa, injo se'rei barakka' pangamaseang ri a'rakanna Allataala.

²¹ Saba' iamo injo rikeokangko, saba' manna Almase maeng sissa todo'i tujummu na maengi ambokoi pinahangang ri kau, solanna kau minahang rita'ra tallasa'Na.

²² Ia gelei a'bua' kadorakaang, na bura gele rie' lalang ri babaNa.

²³ Rihattunna Ia ritua-tuai, Ia gelei a'balasa surangang pattua-tua; rihattunna Ia sissa, Ia gelei anggaratta, mingka lapassareangi kalenNa mange ri Ia tulangadeli injo lalang ri kaadelang.

²⁴ Iamo maeng lasompoi kadorakaanta lalang ri kalenNa ri kaju salli', solanna ditte, tumaeng inni mate kanara kadorakaang, attallasa tujunna kanabaang. Passabakang riloko'-loko'Na kau a'jari pia.

²⁵ Saba' riolo linguko assimpole jimbala, mingka konni-konnina maeng muliammoko mange ripakalahaki na pakatuho ri batemmu.