1 PETRUS 1 - Kitta' Passitallikang Bau KAREBA BAJI'

Barasallang 1:1-2

¹ Battu ri Petrus, surona Isa Almase. Mange risikuanna tau battu-battu alla'bang injo ri Pontus, Galatia, Kapadokia, Asia Ki'di' na Bitinia,

² kau ngase' intu tau ripile, assituru' a'ra'na Allataala, Ammanta, na turipakatangkasa ri Nyaha Tangkasa, solanna tunru' mange ri Isa Almase na nguppa pambe'besang ri raraNa. Bisannabali barakka' pangamaseang surang dame salehangang pela' kala'bi-la'biangi ri kau ngase'.

Pattajalliang, katappakang na pangamaseang 1:3-12

³ Maeki appanai' sukkuru mange ri Allataala na Amma Karaengta Isa Almase. Saba' pangamaseang bakka'Na lapaa'jariki rilaherang muliang patteteang riattallasa'na muliang Isa Almase battu ritangnga-tangngana tau mate, mange ritallasa rassi injo pattajalliang.

⁴ Ia laassare dahuang nugele akkulle la'busu, nugele akkulle rammasa na nugele akkulle laju, nutattaro ri suruga tujummu.

⁵ Iamo intu kau, turikatuho injo lalang ripangamaseanna Allataala patteteang rikatappakammu, rihattu mutajanna kasalamakang numaeng sadia injomo laripappijanjangang ri allo kala'busang.

⁶ Injomo saba'na rannuimoko, manna injo konni-konnina paralluko pa'risi sinampe' rilohena passo'ri.

⁷ Tujunna ri iangase'na injo iamo intu laappattoje' rikasi'nonganna katappakammu. Bulaeng nulapanra' injo parallui risappo lalang ri api, la'bipa pole katappakammu nula'bi langkasang anggaranna battu ri bulaeng parallu todo'i riso'ri. Ri appakonjona kau languppa pammuji na kala'birang na kangalikang rihattunna Isa Almase lapappijanjangang kalenNa sallo'.

⁸ Manna injo Ia gelepai minang mujanjang, mingka kau ngamaseang ri Ia. Kau tappa' mange ri Ia, manna injo kau konni-konnina Ia gelepai mujanjang. Sungguko lalang rikate'neang bakka' nugele akkulle ripapau,

⁹ saba' maeng muuppaimu pamangeanna katappakammu, iamo intu kasalamakanna batemmu.

¹⁰ Kasalamakang injomo lapappilajari na laparessa sikonjo nabbi, na iyai maengimu lapau passala barakka' nularipassareang injo mange ri kau.

¹¹ Iyai pole maressa sikuraiya hattu na anteeang lakuangang ri Nyaha Almase, nurie' lalang ri iyai. Nyaha injomo assa'ra laassa'bi ripassala sikuanna kasissaang nulalataba injo Almase na sikuanna passala kala'birang numinahang rimaennamo a'jari.

¹² Mange risikonjo nabbi maeng ripappiissekangi ma'nassana iyai injo gele sangga kalenna jua lalajampangi. Mingka iyai laanjampangi ri kau lalang ri iangase'na numaeng ripala'bang injomo konni-konnina mange ri kaui patteteang battu ri tau ngerang injo kareba Injili. Iyai injo lapala'bangi kareba injo mange ri kaui patteteang rikahasa Nyaha Tangkasa nurisuro injo battu ri suruga. Na malaeka' injo pole a'ra'i lapiisseki kareba nulapala'bangi injo.

Katangkasang na passikamaseang passianakang 1:13-25

¹³ Injomo saba'na, pakabaji' akkala'mu surang pakarie' pappahammu, tutulaloko na pa'batui pattajalliammu mange ribarakka' pangamaseang nularipassareang injo mange ri kaui rihattunna Isa Almase lapappijanjangang kalenNa sallo'.

¹⁴ Tallasa assimpolelaloko ana'-ana' tunru' injo na andai mupinahang hawa napasu daa lakahasai injoko rihattu gelemupa ngisse' ri Allataala.

¹⁵ Mingka parallulaloko a'jari tangkasa lalang risikuanna tallasa'mu assimpole Ia Tutangkasa, tumaeng akkeo' injo ri kau,

¹⁶ saba' rie' ta'ukiri: Tangkasalaloko, saba' Nakke tangkasa.

¹⁷ Na ampa kau a'ngare' Allataala injo Amma, iamo intu Ia Tugele injo mile tau assituru' nukajanjangang injo jua langadeli sikuanna tau assituru' ripanggeokanna, injo parallulaloko tallasa malla' mange ri Allataala rihattu amminsambomu juapa ri lino inni.

¹⁸ Saba' muisse'i ma'nassana kau maeng ripakalappasa battu rita'ra tallasa'mu nutide' injo matu-matunna numukaharisang injo battu ri puwa-puwamu. Nuappakalappasa injo ri kau gele nubattu ripa'barang-barangang lapanra', gele todo' surangang salaka iyareka bulaeng,

¹⁹ mingka surangang rara ka'jala, iamo intu rarana Almase nuassimpole rara ana' jimbala tide' injo daana na tide' sallaanna.

²⁰ Ia maeng ripilei rigelenapa ripaa'jari lino. Mingka rijammang kala'busang innipa ampamu lapappijanjangang kalenNa kanara kau.

²¹ Patteteang ri Iamo kau tappa' mange ri Allataala. Allataala maeng injo lapakaattallasai muliang Ia battu rikamateang na maeng appakala'biri ri Ia, sa'genna katappakammu na pattajalliammu a'ma'ra' mange ri Allataala.

²² Kanara maennamo mutangkasi kalemmu passabakang tunru' rikanbaang, jari akkulleiko ngamaseang mange ri urang siana' julu katappakammu. Injomo saba'na parallui mupassukku' atimu laassikamaseang.

²³ Kanara maengimmu rilaherang muliang gele nubattu rilamungang lala'busu injo, mingka nubattu rilamungang nugele lala'busu, patteteang ri pau Allataala, nuattallasa na nutide' tappu'na.

²⁴ Saba': ”Sikonjo nuattallasa injo assimpolei ruku' na sikonjo kala'birang assimpolei taju' ruku', a'jari kalotoroi ruku' injo, na tantangi taju'na,

²⁵ mingka pau Karaeng latuli rie'i situlusu'na.” Pau innimo Injili nuripappauwang injo mange ri kau.