1 KORINTUS 9 - Kitta' Passitallikang Bau KAREBA BAJI'

Dahuang surang jama-jamaang nuparallu ri suro-suro injo 9:1-27

¹ Gelejua nakke tau laloasa? Gelejua nakke suro? Gelejua nakkemo maeng assiuppa Isa Karaengta? Gelejua kaui intu hassele rijama-jamaangku lalang ri Karaeng?

² Manna injo mange ri tau maraeng gelea suro, mingka mange ri kaui nakkemo suro. Saba' tallasa'mu lalang ri Karaeng Isa iamo injo sura' segele ria'jariku suro.

³ Iamo inni pappauku mange ri iyai tuappote-pote injo mae ri nakke.

⁴ Gele kanara rie' dahuang ri kambe langanre surang langinung?

⁵ Gelejua kambe rie' dahuamba langurang se're bahine julu katappakang, lalang ripaa'lingkaamba, assimpole nulageokang suro-suro maraeng na urang siana' lalang ri Karaeng surang Kefas?

⁶ Iyareka sangga nakke jua surang Barnabas tide' dahuanna ripakalaloasa battu rijama-jamaang kasara?

⁷ Inaimo maeng minahang lalang ripa'bundukang riongkoso kalenna to'jua lapake? Inaimo maeng a'lamung ri koko anggoro'na nagele lakanre hassele'na? Iyareka inaimo maeng akkalahaki sibakkalang bakka' jimbala nagelei nginung dadi' battu ri jimbala injo?

⁸ Apa kupau inni gele sangga pikkirang rupatau jua. Gelejua hukkung Tora' appakonjo todo'i pauna?

⁹ Saba' lalang ri hukkung Musa rie' ta'ukiri: ”Akolalo sa'mangi baba tedong attangnga injo anjama!” Tedongka Allataala lapariati?

¹⁰ Iyareka dittemo Ia lakuangang? Ya, tujuntamo passala inni riukiri, iamo intu tau anrangkala tana parallui anrangkala lalang pattajalliang na tau anjama inni parallui anjama lalang ripattajalliang languppa dahuang.

¹¹ Jari, ampa kambe maeng attahuru lamungang nyaha alusu mange ri kaui, a'la'bi-la'bika, ampa kambe ngalle hassele assituru' ri lino inni battu ri kau?

¹² Ampa tau maraeng rie' dahuanna laattajang ripassala injo battu ri kau, gelejua manna kambe rie' todo' dahuang nula'bi bakkakang? Mingka kambe gele tapake dahuang injo. Sibale'na, kambe tatanggong to'juai sikuanna, solanna anda kambe appa'rie' salibanra mange ripappala'bangang Injili'na Almase.

¹³ Geleika muisseki ma'nassana iyai tau anjampangi injo lalang ri tampa' tangkasa nguppai katallasang battu ri tampa' tangkasa injo na ma'nassana iyai tau anjampangi injo mejang pakkoro'bangang, iyai injo nguppai dahuang battu ri mejang pakkoro'bangang injo?

¹⁴ Appakonjo todo'i Karaeng Isa maeng appattantu ma'nassana iyai tuappala'bang injo Injili, parallui tallasa battu ripappala'bangang Injili injo.

¹⁵ Mingka nakke manna sikali gele minang ngalle dahuang ri injo. Gele kuukiri iangase'na inni, solanna manna nakke ripakaappakonjo todo'. Saba' la'bi bajikangi matea ampa laanggeokang nuassimpole injo. Toje'i, kabakkakanna sumanga'ku gele akkulle lapattide' manna inai jua.

¹⁶ Saba' ampa nakke appala'bang Injili, tide' pammentengangku laappakabakka' sumanga' ri kalengku to'jua. Injomo saba'na a'jari nuparallu ri nakke. Silakama nakke, ampa nakke gele appala'bang Injili!

¹⁷ So'di injo nakke anggeokang assituru' a'ra'ku to'jua, toje'i nakke siratang languppa dahuang. Mingka kanara nakke anggeokang gele assituru' a'ra'ku to'jua, pappala'bangang injo se're jamaang panjampangi nuripassareang mae ri nakke.

¹⁸ Ampa appakonjoi, apamo sahala'ku? Sahala'ku iamo inni: Ma'nassana nakke akkullea appala'bang Injili tide' sahala'na, na ma'nassana nakke gelea ngalle dahuang assimpole tuappala'bang Injili.

¹⁹ Manna injo toje'i nakke laloasa mange risikuanna tau, nakke kupaa'jari kalengku ata battu risikuanna tau, solanna nakke akkulle ambeta lohe tau.

²⁰ Appakonjomu mange ri tau Yahudi nakke a'jaria assimpole tau Yahudi, solanna nakke ambeta ri tau Yahudi injo. Mange ri tau tallasa injo lalang ri hukkung Tora' nakke a'jaria assimpole tau tallasa lalang ri hukkung Tora', manna injo nakke gelea tallasa lalang ri hukkung Tora', solanna nakke akkulle ambeta ri iyai tutallasa injo lalang ri hukkung Tora'.

²¹ Mange ri tau gele injo tallasa lalang ri hukkung Tora' nakke assimpole tugele tallasa lalang ri hukkung Tora', manna injo nakke gele tallasa pantaranganna hukkung Allataala, saba' nakke tallasa lalang ri hukkung Almase, solanna nakke akkulle ambeta ri iyai tugele injo tallasa lalang ri hukkung Tora'.

²² Mange ri tau lamma injo nakke a'jari tau lamma, solanna nakke akkulle ambeta ri tau lamma injo. Mange risikuanna tau nakke maeng a'jarimo risikuanna, solanna ampa akkulle juai laappakasalama' siloheang battu ri iyai.

²³ Kugeokangi iangase'na inni kanara Injili, solangku nguppa dahuang lalang ri injo.

²⁴ Geleka muisse' ma'nassana ri tampa' pattandingang sikuanna tau attanding minahangi allari, mingka se're jua tulanguppa lomoro. Injomo saba'na, allari toje'ko, jari kaumo muuppai!

²⁵ Sikuanna tau minahang ngase'i ngalle dahuang lalang ripattandingang, latahangi kalenna lalang risikuanna passala. Iyai a'geo' appakonjo languppa songko' kakaraengang nuladaa, mingka ditte languppaki songko' kakaraengang nugelemo ladaa.

²⁶ Injomo saba'na, nakke gelea allari ampa tide' matu-matunna na nakke gelea pakontau laanjaguru sambarang.

²⁷ Mingka nakke kupakabiasai batangkalengku na kutahangi, solanna ampa maemma appala'bang Injili mange ri tau maraeng, anda nakke pole ritolla'.