1 KORINTUS 8 - Kitta' Passitallikang Bau KAREBA BAJI'

Passala passidakka ri barahala 8:1-13

¹ Passala assi binantang nuripassidakkaang mange ri barahala, riisse'i: ”Ditte rie' ngase' pangisse'.” Pangisse' appakonjo injo lapaa'jari tampo tau inni, mingka pangamaseang appakasa'ga' tau.

² Ampa rie' tau larapangi ma'nassana ia ngampunnai se're ”pangissengang”, injo ia gelepai anrapi' ripangisse', appaanteekamua nuparallu injo ripirapiki.

³ Mingka tau ngamaseang injo ri Allataala, ia riisse'i ri Allataala.

⁴ Passala nganre assi binantang nuripassidakkaang ri barahala, ditte riisse'i: ”Gele rie' barahala ri lino inni na gele rie' Allataala maraenganna Allataala nukale-kalenna injo.”

⁵ Saba' toje'i rie' nuriare' ”sombaang”, baji' ri suruga, iyareka ri lino – na toje'i nabana lohe ”sombaang” surang lohe ”kara'-karaeng” appakonjo –

⁶ mingka mae ri ditte se're jua Allataala, iamo intu Amma, iangase'na nubattu ri Ia na mange ri Ia tallasa'ta, na se're jua Karaeng, iamo intu Isa Almase, nupatteteang ri Ia sikuanna maeng ripaa'jari na kanara ri Ia ditte nguppa tallasa.

⁷ Mingka gele sikuanna tau lauppai pangisse' injo. Rie' tau, nukanara tassikko' juapai ri barahala, nganre assi binantang assimpole assi binantang nuripassidakkaang ri barahala. Passabakang lammai ati si'nonnai, ati si'nonnai rirammasii ri injo.

⁸ ”Kanre inni geleki laerang seppa' mange ri Allataala. Tide' jua karugianta, ampa geleta jua nganre surang tide' to'jua sahala'na ampa nganreki.”

⁹ Mingka katutui, solanna kalaloasaammu inni andai a'jari batu patatto'roang mange ri tau lamma injo.

¹⁰ Saba' ampa rie' tau anjanjang ri kau turie' intu ”pangisse'na”, attangnga attolong nganre lalang ri sapo somba-sombaang, gelejua tau lamma injo ati si'nonna assimpolei turipassuroang langanre assi binantang nuripassidakkaang ri barahala.

¹¹ Ri appakonjona, tau lamma injo, iamo intu urang siana' julu katappakammu, numange ri ia maeng lakamatei Almase, a'jari mate pole kanara ”pangisse'mu” injo.

¹² ampa kau lalang rita'ra appakonjo doraka mange ri urang siana' julu katappakammu surang mupa'risi nyahanai nulamma injo, sitoje'na kau doraka ri Almase.

¹³ Injomo saba'na, ampa kanre injo laa'jari batu patatto'roang ri urang siana' julu katappakangku, nakke gelema langanre assi binantang situlusu'na, solanna nakke gelea a'jari batu patatto'roang ri urang siana' julu katappakangku.