1 KORINTUS 7 - Kitta' Passitallikang Bau KAREBA BAJI'

Passala pakkalabiniang 7:1-16

¹ Na konni-konnina risikonjo passala muukiri injo mae ri nakke. Baji'i ri bura'ne inni ampa ia gele akkalabini,

² mingka ngu'rangi rilohena nulandaai rikabalerang, baji'mu sikuanna bura'ne parallui rie' bahinenna na sikuanna bahine parallui rie' bura'nenna.

³ Parallui bura'ne inni lapa'rupa tanggonganna mange ri bahinenna, appakonjo todo'i bahine inni mange ri bura'nenna.

⁴ Bahine inni gele kahasa ri batangkalenna to'jua, mingka bura'nenna, appakonjo todo'i bura'ne inni gele kahasa ri batangkalenna, mingka bahinenna.

⁵ Akolalo assikaderei, passangadinna lalang ripassamaturukang sikurang hattu sallona, solanna nguppaiko sa'la' hattu langera dowaang. Maeng injo paralluko tallasa assurang-surang, solanna gelei ambaja'-banja' Ibilisi ri kau, saba' geleiko akkulle nahangang napasu.

⁶ Kupaui passala inni mange ri kaui assimpole kalogaang, gele assimpole parenta.

⁷ Manna appakonjo sanna'i baji'na, ampa assimpolei nakke; mingka tasse're-se're tau latarima dalle'na battu ri Allataala, rie' tau dalle'na appakonni, tumaraeng injo dalle'na appakonjo.

⁸ Mingka mange ri tau gele injo akkalabini surang mange ri tau balu-balu injo kupassuroangi, solanna baji'mu iyai tulusu tallasa assimpole nakke.

⁹ Mingka ampa iyai injo gelei akkulle latahang kalenna, baji'mu iyai akkalabini. Saba' la'bi bajikangi akkalabini nalapanra'i rikanara napasu.

¹⁰ Mange ri tau maeng akkalabini injomo nakke – gele, gele nakke, mingka Karaeng Isa – assare parenta, solanna se're inni bahine andai assipela' surangang bura'nenna.

¹¹ Ampa assipelai', ia parallui tulusu tallasa tide' bura'nenna iyareka a'dame surangang bura'nenna. Na se're inni bura'ne andalalo lapela' bahinenna.

¹² Mange risikuanna tau maraeng nakke, gele Karaeng Isa, appau: Ampa rie' se're urang siana' julu katappakang a'bahine se're tau gele tappa' na bahine injo a'ra'i tallasa surangang ia, andalalo urang siana' injo lapela' bahinenna.

¹³ Ampa rie' se're bahine a'bura'ne se're tau gele tappa' na bura'ne injo a'ra'i tallasa surangang ia, andalalo lapela' bura'ne injo.

¹⁴ Saba' bura'ne gele injo tappa' ritangkasi kanara bahinenna na bahine gele injo tappa' ritangkasi kanara bura'nenna. So'di injo gele appakonjo, tantu ana'-ana'mu sanging ana' buni, mingka konni-konnina iyai injo ana'-ana' tangkasa.

¹⁵ Mingka ampa tau gele injo tappa' a'ra' assipela', lappasammu ia assipela'; lalang ripassala appakonni inni urang siana' bura'ne iyareka urang siana' bahine injo gele tassikko'. Mingka Allataala akkeo' ri kaui laattallasa lalang dame salehangang.

¹⁶ Saba' appaanteekamua lamuisse', oe bahine, apa gele lamupakasalama' bura'nemmu? Iyareka appanteekamua lamuisse' oe bura'ne, apa gele lamupakasalama' bahinemmu?

Tallasa assimpole rihattu ampana rikeo' ri Allataala 7:17-40

¹⁷ Sitarrusu'na parallui sikuanna tau tulusu tallasa assimpole numaeng latantuang injo Allataala mange ri ia na lalang ritallasa assimpole rihattu rikeo'na ri Allataala. Iamo inni katantuang kupassareang injo mange risikonjo jamaah.

¹⁸ Ampa rie' se're tau rikeo' lalang tallasa assunna', gelejuai parallu lapasala tanra-tanra sunna' injo. Ampa rie' se're tau rikeo' lalang tallasa gele assunna', gelejuai parallu assunna'.

¹⁹ Saba' assunna' iyareka gele assunna' gelejuai parallu. Nuparallu iamo intu tunru' risikonjo hukkung Allataala.

²⁰ Baji'i tasse're-se're tau ammari lalang ritallasa assimpole rihattu ampana rikeo' ri Allataala.

²¹ Apa injo ata rihattu rikeo'mu? Injo gelejuai ngura-ngura! Mingka ampa kau nguppa sa'la' hattu ripakalappasa, pakei sa'la' hattu injo.

²² Saba' se're ata turikeo' ri Karaeng lalang ri panjampanginNa, iamo tau lappasa, anunna Karaeng Isa. Appakonjo todo'i tau lappasa rikeo' injo ri Almase, iamo injo atanNa.

²³ Kau maemmo rihalli na ballinna maeng bajaramu. Injomo saba'na andalaloko a'jari ata ri rupatau.

²⁴ Urang siana' parallui tasse're-se're tau ammari ri a'rakang Allataala lalang tallasa assimpole rihattu ampana rikeo'.

²⁵ Hattu inni passala tau gele injo akkalabini. Ri iyai nakke gelea akkulle assare parenta battu ri Karaeng Isa. Mingka nakke laassare panguppa assimpole se're tau akkulle ripatappa' kanara passare ri Allataala.

²⁶ Panguppaku ma'nassana, assituru' simpiri'na hattu konni-konnina, baji'mu ri rupatau latulusu rie' lalang rikatallasanna.

²⁷ Ampa kau tassikko' rise're tau bahine? Akolalo apparri-parri assipela'! Ampa kau gele tassikko' rise're bahine? Akolalo a'boja tau maraeng!

²⁸ Mingka, ampa akkalabiniko, geleko doraka. Appakonjo todo'i, ampa se're inni ana'rara akkalabini, ia gele a'bua' kadorakaang. Mingka tau appakonjo injo anrumpa'i kasusaang batangkale kasara na nakke a'ra'i lakupalili ngase'ko battu rikasusaang injo.

²⁹ Urang siana', iamo inni kukuangang, iamo intu: Simpirimu hattu! Injomo saba'na, lalang rihattu rie' inni juapa tau rie' injo bahinenna a'geo' assimpolekalena tutide' bahinenna;

³⁰ na tau ammarrangi injo a'geo' assimpolekalena tugele ammarrang; na tau a'rannu-rannu injo a'geo' assimpolekalena tugele rannu; na tau ammalli injo a'geo' assimpolekalena tutide' anunna;

³¹ Bodona pau, tau make injo pa'barang-barangang ri lino assimpolekalena tugele make. Saba' lino assimpole nuriisse' injo konni-konnina laallaloi.

³² Kukaa'raki, solanna tallasako tide' bata-batana. Tau tide' injo bahinenna akkulle lapa'batu nyahana risikonjo passala mange ri Karaeng, appaanteekamua ia appakasannang ri Karaeng Isa.

³³ Sibale'na, tau rie' injo bahinenna lapa'batu nyahana mange risikonjo passala rie' ri lino, appaanteekamua ia appakasannang ri bahinenna,

³⁴ na ri appakonjona ta'bage-bage nyahana. Bahine gele injo a'bura'ne surang ana'rara injo lapa'batu nyahanai risikonjo passala mange ri Karaeng, solanna tangkasa batangkale kasara'na surang batenna. Mingka bahine rie' injo bura'nenna lapa'batu nyahana ripassala rie' ri lino inni, appaanteekamua ia appakasannang ri bura'nenna.

³⁵ Iangase'na inni kupaui rikaparalluammu to'jua, gele lamolo'-molongi ri kau, sibale'na solanna kau anggeokang apa nusiratang, na anjampangi Karaeng tide' salibanrana.

³⁶ Mingka ampa rie' se're tau larapangi ma'nassana ia gele baji' panggeokanna mange ri bajuanna, ampa attamba toamu bajuanna na ia lapisa'ring toje'i ma'nassana ia parallui akkalabini, baji'mu iyai a'bonting, ampa lakaa'raki. Passala injo gele kadorakaang.

³⁷ Mingka ampa rie' se're tau, nugelejua ripassa laanggeokang appakonjo, toje'i jarre' atina na toje'i akkulle latahang a'ra'na, maeng ngalle katappukang lagele a'bonting surangang bajuanna. Ia baji' panggeokanna.

³⁸ Jari, tau a'bonting injo surang bajuanna baji' panggeokanna, na tau gele injo a'bonting surang bajuanna la'bi baji' panggeokanna.

³⁹ Bahine inni tasikkoi' ampa attallasa juapai bura'nenna. Ampa matemu bura'nenna, ia laloasamu laa'bonting inai jua lakaa'raki, assala'na tau injo se'rei tau tappa'.

⁴⁰ Mingka assituru' panguppaku, ia la'bi sunggui, ampa ia tulusu ammari lalang rikatallasanna. La'bipa pole panguppaku ma'nassana ri nakke rie' todo' Nyaha Allataala.