1 KORINTUS 6 - Kitta' Passitallikang Bau KAREBA BAJI'

A'boja kaadelang ri tau gele injo tappa' 6:1-11

¹ Rie'ka tau ri kaui, ampa a'beserei surangang tau maraeng, baranii a'boja kaadelang ri tau gele injo naba, na gele ri tau tangkasa?

² Iyareka geleika muisseki ma'nassana tau tangkasa inni langadeli lino? Ampa pangadelanna rie'i lalang ri limammu, apa geleiko akkulle appassilolongang passala nutide' injo matu-matunna?

³ Geleika muisseki ma'nassana ditte langadeli risikuanna malaeka'? Jari, apa pole ripalakara ki'di' injo lalang rikatallasang allo-allota.

⁴ Manna injo appakonjo, ampa paralluko appassilolongang palakara ki'di', apa lamupassareangi passilolongammu mange ri iyai tugele injo rirekeng lalang ri jamaah?

⁵ Kupau passala inni laappakasiri' ri kau. Geleka rie' manna se're ri kaui tusara'de', tuakkulle appassilolongang risikonjo palakara battu risikonjo urang siana' julu katappakanna?

⁶ Apa se're injo urang siana' a'bojai kaadelang mange ri urang siana' maraeng, na ri appakonjona mangei ri tau gele injo tappa'?

⁷ Parie'na jua palakara ri kaui injo assimpolemu se're kabetaang ri kaui. Ngura nagele la'bi mungaiang assinsara rinugele adele? Ngura nagele la'bi mungaiang riparugi?

⁸ Mingka kaui anggeokang todo' nugele adele surang appa'rugi tau lalang ripangelo-ngelo, na passala injo mugeokang todo'i mange ri urang siana' julu katappakammu.

⁹ Iyareka geleika muisse' ma'nassana sikuanna tau gele adele gelei languppa dahuang lalang ri Pakkaraengang Allataala. Akolalo lingui! Tau Balere, pasomba barahala, pasangkili, bura'ne assurang paranna bura'ne, uranna tau anggeokang appakonjo,

¹⁰ palukka', tau pakaha-kaha, pa'bengoang, papitina surang tau pakelo-kelo gele languppa dahuang lalang ri Pakkaraengang Allataala.

¹¹ Rie'mo sikonjo lohena tau ri kaui appakonjo toje' riolo. Mingka maeng mupassareangi kalemmu ribissai, kau maeng tangkasimoko, kaui maeng ripa'naba lalang arenna Karaeng Isa Almase surang lalang areng Nyaha Allataalata.

Pappiu'rangi ripassala kabalerang 6:12-20

¹² Iangase'na hallala ri nakke, mingka gele iangase'na rie' matu-matunna. Sikuanna hallala ri nakke, mingka gele kupa'biang kalengku ripaa'jari ata manna ri apajua.

¹³ Kanre iamo intu tujunna pompong, na pompong tujunna kanre: Mingka ruaiya ripakamate ri Allataala. Mingka batangkale gele laripake rikabalerang, passangadinna tujunna Karaeng, na Karaeng tujunna batangkale.

¹⁴ Allataala, tuappakaattallasa injo Karaeng Isa, laappakaattallasa todo'i ri ditte rikahasaNa.

¹⁵ Geleika muisseki ma'nassana batangkalemmu ngase' intu bageangi ri Almase? Jari, lakualle bageangika ri Almase na lakupaa'jari batangkale pasundala? Gelei appakonjo!

¹⁶ Iyareka geleika muisseki ma'nassana inai jua lapassareang kalenna ri bahine balere, a'jari intu se're batangkale surangang ia? Saba', appakonjomu pauna kitta' inni: ”Ruaiya a'jari se're batangkale.”

¹⁷ Mingka inai jua lapassareang kalenna mange ri Almase, a'jari se're nyaha surangang Ia.

¹⁸ Pakaderelalo kalemmu battu rikabalerang! Sikonjo kadorakaang maraeng nulageokang injo rupatau, a'jari pantarang kalenna. Mingka tau anggeokang injo kabalerang dorakai mange ri kalenna to'jua.

¹⁹ Iyareka geleka muisse' ma'nassana batangkalemmu ngase' intu sapo Nyaha Tangkasa nuammari injo lalang ri kau, Nyaha Tangkasa numuuppa injo battu ri Allataala – na ma'nassana batangkalemmu gelemo kau opuna?

²⁰ Saba' kau maeng rihalli na maeng bajaramu ballinna: Injomo saba'na pakala'biri Allataala lalang ri kalemmu!