1 KORINTUS 5 - Kitta' Passitallikang Bau KAREBA BAJI'

Kadorakaang lalang ri jamaah 5:1-13

¹ Toje'i lalangngerei tau ma'nassana rie' kabalerang ri kaui, na kabalerang appakonjo injo, la'bipa pole nuassimpole injo tide' ri tau maraeng gele injo tappa' ri Allataala, iamo intu ma'nassana rie' tau assipake surangang bahinenna ammanna.

² Manna appakonjoi tampoi juako. Geleika la'bi siratang ri kaui pa'risi na mupakaderei tau injo ritangnga-tangngamui?

³ Saba' nakke, manna injo tide' ri batangkale kasara, mingka ri batangkale alusu, nakke – assimpole nakke rie' – maeng assare hukkungang ri ia, tumaeng injo anggeokang passala appakonjo.

⁴ Ampa asse're-se'reiko na nakke rie' lalang batangkale alusu, surangang kahasa Isa, Karaengta,

⁵ tau injo parallui ripassareang mange ri Ibilisi lalang arenna Karaeng Isa, jari matei kalenna, bisannabali ripakasalama' nyahana rihattu rie'na Karaeng.

⁶ Gele baji' katampoammu. Geleka muisse' ma'nassana so'di' bibi appakaassoho injo buakang kanrejaha?

⁷ Pela'i bibi toa injo, solanna a'jariko buakang kanrejaha bau, ampa toje'i tide'pa bibimu. Saba' ana' jimbala Pa'lappasangta, iamo intu Almase, maeng todo'mu risumbele.

⁸ Injomo saba'na maemoko a'bua'ki, gele surangang bibi toa, gele todo' bibi panggeokang daa surang sipa' daa, mingka surangang roti nutide' bibina, iamo intu kasi'nongang nyaha na katojekang.

⁹ Ri sura'ku inni maeng kuukiri mange ri kaui, solanna andako a'bahaang surangang tau balere injo.

¹⁰ Nukukuangang injo gele iangase'na tau balere ri lino inni iyareka iangase'na pakaha-kaha na pakelo-kelo iyareka iangase'na tau nyomba injo barahala, saba' ampa appakonjo kau parallui mubokoi lino inni.

¹¹ Mingka nukuukiri mange ri kaui konni-konnina iamo intu, solanna andako a'bahaangi, manna injo tulaare'i kalenna urang siana' julu katappakang iamo intu tau balere injo, pakaha-kaha, tau nyomba-nyomba barahala, papitina, pa'bengoang iyareka pakelo-kelo; akolalo assurang-surangi nganre ri tau a'geo' appakonjo injo.

¹² Saba' kahasa apa lakupake ngadeli ri iyai, ri turie' injo pantarang jamaah? Gelejua siratanna kau parallu ngadeli ri iyai turie' injo lalang ri jamaah?

¹³ Iyai turie' injo pantarang jamaah lariadeli ri Allataala. Surolalo a'lampa dere tau anggeokang injo sipa' daa ritangnga-tangngamu.