1 KORINTUS 3 - Kitta' Passitallikang Bau KAREBA BAJI'

Pa'beserang 3:1-9

¹ Na nakke, urang siana', rihattu injo gelea akkulle a'bisara surangang kau assimpole surangang rupatau nguppa Nyaha Allataala, mingka surangang rupatau gele nguppa Nyaha Allataala, nugelepa toa tappa'na ri Almase.

² Dadi' kusareangiko, gele kanre terasa, saba' kau gelepai akkulle mutarima. Na konni-konnina kau gelepai pole akkulle mutarima.

³ Saba' kau rupatau kasara juapa. Saba', ampa ri kau rie' passiiriatiang surang pa'beserang gelejua passala injo lapappiissekangi ma'nassana kau rupatau ri lino na attallasa assituru' rupatau gele nguppa ri Nyaha Allataala?

⁴ Saba' ampa rie' se're tau appau, ”Nakke battu risossoranna Paulus,” na tumaraeng appau, ”Nakke battu risossoranna Apolos,” gelejua passala injo lapappiissekangi ma'nassana kau rupatau ri lino juapa?

⁵ Jari, inaika Apolos? Inaika Paulus? Sanging pajampangi nurikanarana kau a'jari tappa', tasse're-se're tau assituru' jama-jamaang nulapassareang injo Karaeng mange ri ia.

⁶ Nakke a'lamung, Apolos ambasa, mingka Allataala appatimbo.

⁷ Injomo saba'na nuparallu gele tau a'lamung iyareka tau ambasa injo, mingka Allataala tuappatimbo injo.

⁸ Baji' tau a'lamung iyareka tau ambasa injo assimpole juai; na para latarima sahala'na assituru' rijama-jamaanna to'jua.

⁹ Saba' kambe urang sipanjamaang ri Allataala; kaui intu kokonna Allataala, saponna Allataala.

Pallangga surang nuribaung injo 3:10-23

¹⁰ Assituru' ribarakka' Allataala, nurisareang injo mae ri nakke, nakke assimpole se're mataguri' sapo sara'de' maemmo a'bua' pallangga, na tau maraeng latarrusangi ri bahonna. Mingka sikuanna tau parallui lapariati, anteekamua ia parallu appaenteng ri bahonna.

¹¹ Saba' gele rie' manna se're tau akkulle a'bua' pallangga maraeng battu ri pandasi numaeng ribua' injomo, iamo intu Isa Almase.

¹² Baji' tau appaenteng ribahonna surangang bulaeng, salaka, batu parammata, kaju, ruku' kalotoro iyareka batang bae,

¹³ rie' se're hattu sallo' sikuanna tau lakajanjangangi jamaanna, saba' hattunna Karaeng lapappiissekangi. Saba' hattu injo larie'i assimpole api na anteekamua jamaanna sikuanna tau, lariso'ri ri api injo.

¹⁴ Ampa jamaang lapaenteng injo se're tau attahangi ripasso'ri, ia languppai sahala.

¹⁵ Ampa lakanrei api jamaanna, ia languppai karugiang bakka'; ia laripakasalama' juai, mingka assimpole tubattu lalang ri api.

¹⁶ Geleika muisse' ma'nassana kau ngase' intu saponna Allataala na ma'nassana Nyaha Allataala ammari lalang ri kaui?

¹⁷ Ampa rie' tau appakamate Sapo Allataala, injo Allataala laappakamate ri ia. Saba' Sapo Allataala intu tangkasa na Sapo Allataala injo iamo intu kau ngase'.

¹⁸ Andalalo rie' tau kalenna to'jua labanja'-banja'. Ampa rie' ri kaui tularapang kalenna jua sara'de' assituru' lino inni, lappasammu ia a'jari ba'ga, solanna ia sara'de'.

¹⁹ Saba' kasara'dekang ri lino inni iamo kaba'gaang ri Allataala. Saba' rie' ta'ukiri: ”Ia tuanjakkala injo tau sara'de' lalang rikajekkonganna.”

²⁰ Na rie' pole: ”Karaeng latarrusui sikonjo pikkiranna tau sara'de' inni; sitoje'na iangase'na injo tide' jua matu-matunna.”

²¹ Injomo saba'na andalalo rie' tuattampo-tampo ri a'rakanna rupatau inni, saba' iangase'na injo anummu:

²² baji' Paulus, Apolos, iyareka Kefas, baji' ri lino, tallasa, iyareka mate, baji' hattu rikonni-konnina, iyareka hattu larie' injo sallo'. Iangase'na injo sanging anummu,

²³ mingka kaui intu anunna Almase, na Almase anunna Allataala.