1 KORINTUS 16 - Kitta' Passitallikang Bau KAREBA BAJI'

Sokongang lamange Jamaah ri Yerusalem 16:1-4

¹ Passala pappasse'reang doe' mange risikuanna tau tappa', parallui mugeokangi assituru' pappijo'jo' nukusareang injo mange risikonjo jamaah ri Galatia.

² Ri allo makase're lalang risijumaa injo parallulaloi ri kau ngase' – assituru' ri numuuppa injo – ngalle siso'di' na munanro, solanna pappasse'reang injo gele mugeokangi rihattungkumo rie'.

³ Sungka'ku ambattu, nakke laassuro lohe tau, tumurapangi injo siratang, ripierangi sura' pangantara mange ri Yerusalem laappabattu passaremu.

⁴ Ampa toje'i parallu ma'nassana nakke pole a'lampa, injo iyai laa'lampai surangang nakke.

Naha-nahanna Paulus 16:5-9

⁵ Nakke larie' mange ri kaui, ampa maemmu kulimbangi Makedonia, saba' nakke laa'limbang ri Makedonia.

⁶ Ri Korintus ma'ringi nakke laammari sikurang hattu sallona surangang kau iyareka nakke laammari sa'genna lappasa hattu bosi, jari akkulleiko assare sokongang mae ri nakke lanarrusang pa'lingkaangku.

⁷ Saba' konni-konnina nakke gelea a'ra' laassijanjang surangang kau lasinampe' jua. Nakke tajalli akkulle ammari sallo-sallo surangang kau, ampa lakaa'raki Karaeng.

⁸ Mingka nakke laammaria ri Efesus sa'genna lappasa allo pa'lappasang maka limampulo injo,

⁹ Saba' rie' sa'la' hattungku laanjama jama-jamaang bakka' surang nuparallu, manna injo rie' lohe tau a'bali.

Papasanna Paulus 16:10-18

¹⁰ Ampa ambattumu Timotius, erai solanna ia ammari ritangnga-tangngamui nagele appisa'ring malla', saba' ia maemmu lajama jama-jamang Karaeng, assimpole nakke.

¹¹ Jari, andalalo rie' tau larapangi ia tuna! Sibale'na, sokonglaloi, solanna ia akkulle latarrusang paa'lingkaanna lalang salama', bisannabali ia rie'i pole mae ri nakke, saba' nakke ri inni attajang parie'na assurang-surang urang siana' julu katappakang maraeng injo.

¹² Passala urangta siana', Apolos, maeng a'mole-molemu kusuro passa laa'lingka-lingka mange ri kaui assurangang urang siana' maraengang injo, mingka ia konni-konnina gele sikalii a'ra' rie'. Ampa rie' sa'la' hattu baji' sallo', ia larie'i.

¹³ A'jaga-jagailaloko! Ammenteng ka'jangiko lalang rikatappakang! Assippa' baranilaloko na tulusu terasa!

¹⁴ Geokangi sikonjo jamaammu lalang ripangamaseang!

¹⁵ Rie' pole se're pangera mange ri kaui, Urang siana'. Muisse'mu ma'nassana Stefanus surang sikonjo bija-bijanna iamo tau kaminang riolo jarra ri Akhaya, na ma'nassana iyai maeng lapattujumu kalenna ripanjampangi mange ri tau tappa' injo.

¹⁶ Injomo saba'na, pinahanglalo tau appakonjo injo surang sikonjo tuminahang anjama terasa na akkareso.

¹⁷ Nakke rannu riparie'na Stefanus, Fortunatus surang Akhaikus, saba' iyai lasambei parie'mu;

¹⁸ saba' iyai injo lapakasannang nyahaku surang nyahamu. Anggarangi tau appakonjo injo!

Sallang Pappikatu 16:19-24

¹⁹ Sallang mange ri kaui battu ri jamaah rie' injo ri Asia Ki'di'. Akwila, Priskila surang jamaah rie' injo ri saponna appabattui siloheang sallang lalang ri Karaeng mange ri kaui.

²⁰ Sallang pappikatu mange ri kaui battu risikonjo urang siana' julu katappakang. Pabattulalo sallang pappikatu rise're tau mange ri tau maraeng lalang risallang passikamaseang.

²¹ Surangang limangku to'jua ngukiri inni: Sallang battu ri Paulus.

²² Inai jua gele ngamaseang ri Karaeng, laallelaloi pua. Karaengba rie'muKi!

²³ Barakka' ri Karaeng Isa minahang ri kau.

²⁴ Pangamaseangku minahang ri kau ngase' lalang ri Isa Almase.